NATIONAL NEWS

Isinusulong sa mababang kapulungan ng kongreso ang panukalang batas na layong i-regulate ang surrogacy at Assisted Reproductive Technology (ART), upang magkaroon ng legal framework sa bansa.

Batay sa house bill 11259 na inihain ni 4Ps Partylist Rep. JC Abalos, isa ang Pilipinas sa mga natitirang bansa na wala pa ring batas ukol sa makabagong pamamaraan ng pagbubuntis.

Ayon kay Cong. Abalos, karamihan sa mga Pinay workers ay nagagamit sa human trafficking at mapagsamantalang surrogacy arrangements kung saan, ipinapadala sila sa ibang bansa para isagawa ang proseso ng pagbubuntis.

Aniya, kung walang batas para dito, magdudulot lamang ito ng panganib at paglabag sa mga karapatang pantao partikular sa karapatan ng mga sanggol.

Binigyang diin ng Mambabatas, na nalalagay sa hindi ligtas na medical procedures ang mga stakeholder.

Sakaling maisabatas, bubuo ng isang komisyon sa kamara upang bantayan ang ART and surrogacy activities sa bansa.

Bukod pa dito, aatasan din silang magpatupad ng mga patakaran gaya ng pag-isyu at pagbawi ng lisensya sa mga art clinic at surrogacy bank kung mapapatunayang sangkot ang mga ito sa unethical practices.

Naniniwala si Philhealth President at Executive Officer, Emmanuel Ledesma Jr., na isa sa dahilan kung bakit mabagal ang pagtaas ng benepisyo sa kanilang mga miyembro ay dahil sa patuloy na pagpapalit ng mga head o namumuno sa kanilang korporasyon.

Ginawa ni Ledesma ang pahayag sa gitna ng pagdinig ng House Committee on Health, na mula noong panahon ng Aquino administration hanggang sa panahon ng Duterte administration, pumalo na sa 12 ang bilang ng mga namuno o namahala sa PhilHealth.

Bukod pa dito, kahit nasa pitong libo ang bilang ng mga empleyado sa PhilHealth, aminado si Ledesma na may kakulangan parin sa kanilang mga tauhan partikular sa hanay ng legal, HR, finance department at iba pa.

Aniya, pinag-aaralan na nila ang pagragdag ng mga tauhan na makakatulong sa pagbilis ng serbisyo sa mga Pilipino.

Kumpiyansa ang PhilHealth Official, na malaki rin ang maitutulong ng digitalization program na inisyatiba ni Pangulong Ferdinand Marcos Jr., upang mapalakas ang payment of claims, benefit packages at iba pang serbisyo.

Ibinulgar sa pagdinig ng House Quinta Committee, ni AGAP Partylist Rep. Nicanor Briones, na mayroong mga magmamanok sa bansa na iligal na gumagamit ng bakuna laban sa bird flu.

Iginiit ng Mambabatas, na maraming layer farm owners ang iligal na nagbabakuna sa kanilang mga manok, dahil sa takot na baka matamaan ng bird flu ang kanilang farm.

Nabatid na sa kasalukuyan, wala pang aprubadong bakuna sa Pilipinas na maaaring gamitin laban sa naturang sakit kaya iligal ang hakbang na ginagawa ng mga negosyante sa pagbili ng H5N1 o influenza vaccines.

Nanawagan sa publiko si Cong. Briones, na mas mainam kung nasa tama ang proseso ng pagtuturok ng bakuna dahil subok na aniya ang mga ito at ginagamit narin sa ibang mga bansa gaya ng Europa at Amerika.

Sa pahayag naman ni Agriculture Usec. Constante Palabrica, target ng departamento na magkaroon ng aprubadong bakuna kontra bird flu sa buwan ng abril o mayo ng kasalukuyang taon.

Bukod pa dito, pinapaspasan na rin nila ang pagbabakuna naman sa mga baboy, sa gitna pa rin ng tumataas na kaso ng african swine fever o ASF virus.

Kumpiyansa ang opisyal na mauubos ang nasa 500,000 doses ng mga bakuna mula sa Vietnam bago matapos ang taong 2025.

Kinumpirma ni Agriculture Sec. Francisco Tiu Laurel, na inaprubahan na ng National Price Coordinating Council ang resolusyon na nagtutulak sa deklarasyon ng food security emergency para sa bigas.

Sa bisa ng nasabing resolusyon, papayagan ang national food authority na maglabas ng buffer stock para patatagin ang presyo ng nasabing produkto.

Binigyang diin naman ng kalihim na isa itong mahalagang hakbang upang matugunan ang mataas na presyo ng bigas.

Ibinunyag ni Interior Secretary Jonvic Remulla na posibleng mapalawig ang termino ni PNP Chief Gen. Rommel Francisco Marbil.

Ayon sa Kalihim, may mga indikasyon na mapahaba ang termino ng PNP Chief hanggang Hunyo.

Gayunman, tanging si Pangulong Ferdinand Marcos Jr., lamang aniya ang mag-aanunsyo hinggil dito.

Magreretiro sa Pebrero si Marbil at siya rin ang ikatlong pnp chief sa ilalim ng administrasyong Marcos.

Samantala, tumanggi naman si PNP Chief marbil na magkomento hinggil sa posibleng extension ng kanyang termino.

Plastic pa rin ang pinakamalaking bahagi ng basura na nagkalat sa Manila Bay.

Ayon sa isang survey na ginawa bilang bahagi ng Enhancing Marine Litter Management in Manila Bay Project ng Korean International Cooperation Agency at ng Korean Marine Environment Management Corporation, nasa mahigit walong milyong marine litter ang naitala sa loob ng coastline ng Manila Bay noong 2023 hanggang 2024 kung saan karamihan dito ay plastic.

Ang mga natitira pa rito ay mula sa kahoy, metal, natural fibers, glass, rubber, paper at mixed materials.

Dahil dito, ipanawagan ng Ecowaste Coalition ang mas mahigpit na pagpapatupad ng mga batas tulad ng ra 9003 o Solid Waste Management Act at ra 9275 o Clean Water Act. –  Sa panulat ni Jeraline Doinog

Inatasan ni Pangulong Ferdinand Marcos Jr., ang Department of Budget and Management na ibalik ang apatnaraang milyong pisong branding budget ng Department of Tourism.

Sa pulong sa Malacañang, binigyang diin ni Pangulong Marcos na hindi dapat masayang ang momentum ng ahensya sa pag-angat ng international image ng bansa, lalo na’t naging sentro ng atensyon ang Pilipinas dahil sa mga nakamit na tagumpay ng ilang Pilipino.

Kabilang na rito ang nasungkit na dalawang gold medal ni Carlos Yulo mula sa Paris Olympics at ang pagka-panalo ni Sofronio Vasquez sa isang prestihiyosong talent search show.

Binanggit din ng Pangulo ang hindi malilimutang dedikasyon ng Filipino Health Workers sa buong mundo noong panahon ng pandemya, na naging bahagi ng pagpapalaganap ng magandang imahe ng Pilipinas.

Dagdag pa ni PBBM, kukunin ang pondo mula sa contingency fund ng Office of the President. –  Mula sa ulat ni Gilbert Perdez (Patrol 13)

Tiniyak ng Department of Education na ‘culturally sensitive’ ang mga isasagawang hakbang upang matugunan ang pangangailangan ng mga mag-aaral.

Ayon kay Education Secretary Sonny Angara, nakikipag-ugnayan na ang DEPED sa ilang stakeholders kabilang na ang mga health service providers at community organization upang matiyak na epektibo at culturally sensitive ang mga gagawin nilang mga programa.

Ito’y matapos magpahayag ng pagkabahala ang  National Coalition for the Family and the Constitution hinggil sa mga diskusyon sa mga konseptong nakapaloob sa ilalim ng Comprehensive Sexuality Education (CSE).

Dahil dito, iginiit ni Secretary Angara na bukas ang ahensya sa mga rekomendasyon kaugnay sa nasabing isyu at nakikinig sila sa sentimyento ng publiko.

Dumistansya ang malacañang sa pagkakatanggal kay Ako Bicol Party-List Representative Elizaldy Co bilang Chairman ng House Appropriations Committee.

Ayon kay Executive Secretary Lucas Bersamin, discretion ito ng kongreso at walang kinalaman dito ang ehekutibo.

Matatandaang sa pagbabalik-sesyon ng kongreso noong lunes, idineklarang bakante ni House Senior Deputy Majority Leader Sandro Marcos ang posisyon ni Congressman Co.

Kasunod nito ay sinabi ng Ako-Bicol Partylist Solon na bumaba siya sa pwesto dahil sa health concerns.

Itinalaga namang acting Chairperson ng Komite si Marikina City Representative Stella Quimbo. –  Sa panulat ni Laica Cuevas

 Posibleng matigil na ngayong taon ang pagbibigay ng medical at burial assistance ng Office of the Vice President.

Ito ay matapos tablahin ng Kongreso ang pondo ng ovp para sa mga nasabing programa sa ilalim ng 2025 General Appropriations Act.

Sa 2025 GAA, makatatanggap lamang ang tanggapan ni Vice President Sara Duterte ng 733 million pesos, malaking agwat sa hinihingi nitong dalawang bilyong pisong budget.

Tinapyasan ng mga Mambabatas ang pondo ng pangalawang pangulo dahil sa paulit-ulit na pang-iisnab para ipaliwanag ang paggamit sa kontrobersyal na confidential funds ng OVP at Department of Education.

Bukod pa rito, dahil din sa sinasabing overlapping o pagkakapareho ng mga programa ng OVP sa social welfare projects ng DSWD at Department of Health.  Sa panulat ni Laica Cuevas