NATIONAL NEWS

Ibinasura ng Department of Justice ang mga kasong money laundering laban kay Lucky South 99 official na si Cassandra Li Ong dahil sa kakulangan ng ebidensya.

Inkinatuwa naman ng kaniyang legal counsel na si Atty. Ferdinand Topacio ang desisyon ng DOJ.

Nagpasalamat din si Atty. Topacio dahil nakita ng Panel of Prosecutors ang kakulangan sa ebidensya ng kasong inihain laban kay Ong.

Samantala, pinakakasuhan ng DOJ Panel of Prosecutors si Alice Guo at tatlumpung iba pa ng animnapu’t dalawang bilang ng money laundering dahil sa pagkakasangkot ng mga ito sa operasyon ng mga POGO hub na sinalakay sa Bamban, Tarlac. - sa panulat ni John Riz Calata

Nilinaw ni Senate Committee on Women, Children, Family Relations and Gender Equality Chairperson Risa Hontiveros na hindi ibabatay sa international standards ang pagtuturo sa Comprehensive Sexuality Education.

Ayon kay Senador Hontiveros, gagamitin lamang na gabay ang mga international standards na nakabatay naman na guidelines ng UNESCO at World Health Organization.

Kung mayroon mang anyang hindi akma sa konteksto at kultura ng Pilipinas ay hindi ito gagamitin.

Binigyan-diin pa ng Senador na kapakanan at proteksyon pa rin ng mga bata ang pangunahing layunin ng nasabing panukalang batas. –  Sa panulat ni Kat Gonzales

Aminado ang mga guro na hindi sapat ang limang araw na training na ibinigay ng Department of Education bilang paghahanda sa kanilang pagtuturo ng comprehensive sexuality education sa mga mag-aaral.

Sa eksklusibong panayam ng DWIZ, sinabi ni Benjo Basas, ang Chairman ng Teachers Dignity Coalition, na hindi dumaan sa konsultasyon ang mga guro na magtuturo ng CSE program.

Binigyang diin ni Basas, na maselan ang bagong programa sa sektor ng edukasyon kaya dapat na mas matutukan ito sa ilalim ng mas pinalawak na special training ng mga guro.

Matatandaang sa naging pagdinig ng House Committee on Basic Education, kinwestiyon kung bakit nagsisimula sa kinder ang Comprehensive Sexuality Education dahilan ng pag-alma ng mga magulang.

Sinabi ni Basas, na sakaling aprubahan ang senate bill 1979 o “Prevention of Adolescent Pregnancy” Act dapat ikunsidera ang relihiyon at kultura ng bawat isa.

Tiniyak ng Department of Agriculture na hindi magdadagdagan ang inaangkat na bigas ng pilipinas sa kabila ng nakaambang pagdedeklara ng food security emergency on rice dahil sa mataas pa ring presyo ng bigas.

Sa press briefing sa Malacañang, sinabi ni Agriculture Sec. Francisco Tiu Laurel Jr., na sa halip ay uudyukan nila ang mga negosyante na gawing patas at katanggap-tanggap ang presyo ng nasabing produkto, habang pinapanatili rin ang kanilang profitability o kita.

Ngayong taon, inaasahang mag-iimport ang bansa ng kabuuang 5 million metric tons ng bigas.

Samantala, sinabi rin ng Kalihim na sa halip na manawagang babaan muli ang taripa sa imported na bigas, magrerekomenda na lamang siya ng hybrid rice o ibang uri ng bigas na hahaluan ng broken rice para sa mas mababang presyo.

Tinatayang limang milyong pilipinong manggagawa ang nanganganib na mawalan ng trabaho ngayong taon dahil sa Artificial Intelligence (A.I.) at climate change.

Ayon sa Federation of Free Workers, batay ito  sa projection ng International Monetary Fund, kung saan 14% ng kabuuang workforce sa Pilipinas ang posibleng mapalitan ng A.I., gayundin ang pagkawala ng 2.3 milyong trabaho dahil sa mga epekto ng bagyo noong nakaraang taon.

Kabilang sa mga maaaring maapektuhan nito ang service sector, business process outsourcing industry, at manufacturing sector.

Batay sa November 2024 Labor Force survey, tinatayang nasa 49.54 million ang employed individuals sa bansa, habang nasa 1.66 million individuals naman ang walang trabaho.

Naglunsad ng alyansa ang mga grupong nagsusulong ng impeachment laban kay Vice President Sara Duterte para manawagan ng suporta mula sa publiko at mga mambabatas kaugnay sa mga inihaing reklamo sa Kamara.

Pinangunahan ng mga indibidwal na nasa likod ng impeachment complaints ang pagtitipon na tinawag na “Misa ng sambayanan: May kapayapaan kung may pananagutan”.

Kabilang sa mga dumalo sina Sister Lisa Ruedas; Fathers Flavie Villanueva at Joel Sarabia; at Francis “Kiko” Aquino Dee, apo ni dating Senador Benigno “Ninoy” Aquino Sr.

Hindi nabanggit ang pangalan ni VP Sara sa misa, gayunman, nagsalita si Fr. Angel Cortez kaugnay sa impeachment at nanawagan sa publiko na tumindig para sa mga maling ginagawa ng pamahalaan.

Ayon naman kay Fr. Ruedas, responsibilidad ng mga pilipino na kumilos ng may moral obligation at iginiit na dapat managot ang mga may sala ng kasakiman, katiwalian at maling paggamit ng pera ng bayan.

Ginawa ang pagtitipon sa Edsa Shrine, tatlong araw matapos ang ikinasang national rally for peace ng Iglesia ni Cristo. –  SA panulat ni Laica Cuevas

Pinaiimbestigahan ni Senador Grace Poe sa Senado ang kabiguan ng Social Security System na makolekta ang bilyun-bilyong pisong kontribusyon ng mga delinkwenteng employer.

Sa inihaing resolusyon ng Senador, tinukoy ang 2023 report ng Commission on Audit kung saan nabunyag na hindi nakolekta ng sss ang nasa 89.17 billion pesos na kontribusyon mula sa mahigit 420-thousand employers.

Lumabas sa COA Report na apektado nito ang delivery ng social security protection, claims at benefits ng sss members at kanilang beneficiaries.

Ayon kay Senador Poe, kailangan itong siyasatin dahil malinaw na may problema ang SSS sa collection ng unremitted contributions ng mga miyembro gayong nagtaas pa ito ng singil sa kontribusyon.

Bago ito, naghain din si Senador Risa Hontiveros ng resolusyon para busisiin kung makatwiran ang SSS contibution hike sa pagpasok ng taon. – Sa panualt ni Laica Cuevas mula sa ulat ni Celt Ortega-Bueno (Patrol 19)

Nababahala ang Commission on Population and Development dahil sa patuloy na pagtaas ng bilang ng mga batang nabubuntis, partikular na sa mga 15-anyos, pababa.

Dahil dito, iginiit ni CPD Undersecretary Lisa Grace Bersales, kailangan na ng agarang aksyon tulad ng pagtulak para sa komprehensibo at age-sensitive na sexual education.

Batay aniya sa datos ng Philippine Statistics Authority, lumobo ang bilang ng mga batang babae na may edad 10 hanggang 14 ang nanganak, na umabot na sa 3,343 noong 2023; mas mataas aniya ito ng 6.6% sa 2,411 noong 2019.

Dagdag pa ni Bersales mayroon ding naitalang 38 batang babae na wala pang 15-anyos ang nakaranas ng paulit-ulit na pagbubuntis noong 2023; habang 17 kababaihan naman ang sinasabing wala pang 20-anyos ang nakapanganak ng limang beses o higit pa. –  Sa panulat ni John Riz Calata