NATIONAL NEWS

Hinihinalang mahigit 45 milyong data ng mga Pilipino ang nakuha ng hacker na may alyas na ‘Zodiac Killer’ mula sa National Bureau of Investigation (NBI).

Batay ito sa ulat ng cybersecurity group na Deep Web Konek kung saan ang mga nasabing datos na na-hack ay mula sa taong 2016 hanggang taong 2024.

Kabilang sa mga sinasabing impormasyong ni-leak ng zodiac killer ang pangalan; address; transaction id at contact information.

Sinabi naman ng Deep Web Konek na bago lamang sa dark web community ang nang-hack at laman lamang ng profile nito ang sinasabing data breached upang atakehin ang NBI.

Wala pa namang pahayag o kumpirmasyon ang ahensya tungkol sa nangyaring insidente. –  Sa panulat ni Alyssa Quevedo

Kinumpirma ng Public Information Office ng Baguio City na naitala sa lungsod ang una nitong kaso ng mpox.

Ayon sa Baguio City PIO, isang lalaking edad 28 taong gulang ang nagkaroon ng MPXV clade two infection.

Gayunman, sinasabing nakalabas na ito ng quarantine dahil natapos na nito ang isolation.

Una nang sinabi ni Health Secretary Teodoro Herbosa na naipapasa ang Mpox clade two sa pamamagitan ng skin-to-skin contact at sa paghawak ng mga bagay na hinawakan ng mga taong may active skin lesions. –  Sa panulat ni Alyssa Quevedo

Tiniyak ng Department of Human Settlements and Urban Development na kukumpunihin at tatapusin nila sa loob ng taong ito ang mga Yolanda housing units na hindi okupado at nabubulok sa Region 8.

Ito ayon kay DHSUD Secretary Jose Rizalino Acuzar ay matapos makita ni Pangulong Ferdinand Marcos Jr. ang mga nasabing depektibong bahay sa Leyte.

Dagdag pa ni Secretary Acuzar, nauna na silang naglabas ng 176 million pesos sa Local Government ng Tacloban upang masimulan agad ang rehabilitasyon ng mga nasirang pabahay at magdadagdag pa aniya sila ng 167 million pesos upang tuluyan nang matapos ang nasabing rehabilitasyon.

Sinabi naman ng Kalihim na habang inaayos ang mga depektibong housing units, magpapatuloy pa rin ang pagpo-proseso at pag-a-award ng mga units sa mga benipisyaryong nawalan ng tirahan bunsod ng pananalasa ng bagyong Yolanda. –  Sa panulat ni John Riz Calata

Naniniwala si Chief Presidential Legal Counsel Juan Ponce Enrile na ang isinagawang peace rally ng Iglesia ni Cristo ay isang “political pressure” upang hindi magampanan ni Pangulong Ferdinand Marcos Jr. ang tungkulin.

Kaugnay nito, ayon kay Enrile na tanging ang pangulo lamang ang may kapangyarihan ay responsibilidad upang makipag-ugnayan sa legislative at judiciary branches upang matiyak ang mabilis na operasyon ng pamahalaan.

Nilinaw rin ng Chief Presidential Legal Counsel na hindi siya tutol sa isinagawang rally ng INC at sinabing may karapatan ang sinuman na magtipon-tipon para umapela sa gobyerno. –  Sa panulat ni john Riz Calata

Tuluyan nang hindi ma-access o magagamit ng mga Tiktor users sa Amerika ang nasabing sikat na platform sa internet.

Kasunod ito ng desisyon ng US Supreme Court na nagpapatibay sa batas na nagbabawal sa Tiktok app,  na pag-aari ng isang Chinese company na Bytedance.

Kasabay nito, sinabi ni US President-Elect Donald Trump, na posibleng palawigin ng siyamnapung araw ang operasyon ng Tiktok sa Amerika.

Sa ngayon, wala pang nakikitang dahilan ang naturang bansa para gumawa ng aksyon ang Tiktok o iba pang kumpanya sa mga susunod na araw bago manungkulan ang si US President-Elect Trump, simula bukas.

Dahil dito, wala ng access sa video sharing app ang nasa 170 milyong users.

Inamin mismo ni House Secretary General Reginald Velasco na hindi pa sapat ang suporta ng mga mambabatas sa Kamara sa mga inihaing impeachment complaint laban kay Vice President Sara Duterte.

Ayon kay House Secretary General Velasco, nananatili sa anim na mambabatas ang nagpahayag ng kanilang buong suporta sa tatlong impeachment cases laban kay VP Sara.

Malabo pa anya ito sa  bilang na kinakailangan upang tuluyang umusad ang impeachment trial.

Idinagdag pa ni Velasco na kinakailangan ng 154 na boto mula sa 308 na bilang ng house members upang makuha ang majority votes sa plenaryo habang 16 mula sa 30 boto naman para sa miyembro ng Committee on Justice.

Nilinaw pa ng House Secretary General sa oras na pumalya ang impeachment cases laban kaya VP Duterte, isang taon pa umano ang bibilangin upang muling makapaghain ng bagong impeachment complaints sa isang opisyal.

Sa ngayon, hinihintay pa ni Velasco ang ika-apat na complaint bago ito ipasa o isumite sa tanggapan ni Speaker Ferdinand Martin Romualdez.

Ikinukunsidera ng Department of Migrant Workers na ipagbawal ang deployment ng mga Overseas Filipino Workers sa Kuwait.

Kasunod ito ng mga ulat na pagkamatay ng dalawang OFW na sina Dafnie Nacalaban at Jenny Alvarado sa Middle Eastern Country.

Ayon kay Migrant Workers Secretary Hans Cacdac, kasalukuyang ipinagbabawal ng Pilipinas ang mga first-timer sa pagiging domestic worker na i-deploy sa Kuwait.

Dahil dito, pinag-iisipan anya ng kagawaran na higpitan ang patakaran at kinakailangan para sa deployment ng mga Filipino Migrant Workers sa naturang bansa.

Idinagdag pa ng DMW Official na makatutulong ang suspensyon ng deployment upang hindi na maulit ang nangyari tulad kina Nacalaban at Alvarado.

Nakukulangan si Senate Blue Ribbon Committee Chairperson Pia Cayetano sa hakbangin ng Department of Trade and Industry hinggil sa e-cigarettes.

Ito’y matapos talakayin sa Senate Blue Ribbon Committe Hearing na hindi namo-monitor ng DTI ang health components ng mga vape chemical at ang tanging nare-regulate lamang ng kagawaran ay ang e-cigarretes device; battery; at charger.

Sinabi ng senador sa DWIZ, na kailangan ng amyendahan ang vape law upang hindi na ang dti ang magregulate ng e-cigarettes upang mailayo ang mga Pilipino sa bisyo ng paninigarilyo.

Kaugnay nito, sa halip na taasan ang buwis ng tabacco at vape products, pinahuhuli ng Senador ang mga importer ng illicit trade upang tuluyan nang mawala sa bansa ang mga smuggled na sigarilyo.

 Aminado si Senate Committee on finance Chairperson Grace Poe na hindi sapat ang motorcycle for hire bill upang malutas ang problema sa mga habal-habal.

Sa panayam ng DWIZ, sinabi ni Senador Poe na hindi maiiwasang may mga pasaway na lalabag sa mga batas.

Bagamat ayon kay Senador Poe, maaaring maging ehemplo ang nasabing panukalang batas sa ilang mga aspeto. –  Sa panulat ni John Riz Calata

Tiniyak ni Senate Committee on Finance Chairperson Grace Poe na malaki ang posibilidad na maisabatas ang motorcycle for hire bill.

Sa panayam ng DWIZ, ayon kay Senador Poe, ito ay kasunod ng isinagawang pangangalampag ng grupo ng mga rider upang maisabatas ang nasabing panukala nitong nakaraang linggo.

Sinabi ng mambabatas, maaaring ma-sponsor-an ang naturang panukala bago mag-recess ang Senado sa pebrero.

Dagdag pa ni senador poe, nabanggit mismo ni Senate Committee on Public Services Chairman Raffy Tulfo na kakayanin nitong ma-sponsor-an ang motorcycle for hire bill. –  Sa panulat ni John Riz Calata