NATIONAL NEWS

 Kinumpirma ng Commission on Elections na pumalo na sa dalawangdaan dalawampu’t lima katao ang na-aresto kung saan kabilang na ang dalawang dayuhan dahil sa paglabag sa nationwide gun ban.

Ayon kay COMELEC Chairman George Garcia, naaresto ang nasabing bilang dahil sa iligal na pagdadala ng mga nasabing firearms sa labas ng kanilang bahay mula January 12 hanggang January 18 na siyang unang linggo mula ng naging epektibo ang gun ban.

Sa kabuuan, nakuha rin anya ang 228 firearms at explosives gayundin ang ilang libong rounds ng ammunition.

Dagdag pa ni Chairman Garcia, mayroon ng halos limampung libong COMELEC checkpoints sa iba’t ibang bahagi ng bansa kung saan isinagawa ang 200 gun ban operations na konektado sa 2025 midterm elections. –  Sa panualt ni Alyssa Quevedo

Muling dipensahan ni dating Chief Presidential Legal Atty. Salvador Panelo si dating Pangulong Rodrigo Duterte matapos ang naging remarks nito hinggil sa blangkong ilang item ng General Appropriations Act.

Unang binatikos ng dating pangulong si Pangulong Ferdinand Marcos Jr. dahil sa pagpirma sa nasabing 2025 budget sa kabila ng mga umano’y irregularidad.

Ayon kay Atty. Panelo, ang naging mga pahayag ni Duterte ay legal na opinyon lamang batay sa naging pagbubunyag ni Davao City 3rd District Rep. Isidro Ungab na mayroong mga blangko sa GAA.

Ginawa ni Panelo ang pahayag matapos na sabihin ni Pangulong Marcos na nagsisinungaling lamang ang dating Pangulo.  – Sa panulat ni Jeraline Doinog

Mahigit siyam na milyong mga Pilipino ang tinatayang maaapektuhan sa pag-usbong ng Artificial Intelligence  sa iba’t ibang sektor ng trabaho sa bansa.

Ayon kay Federation of Free Workers Vice President Julius Cainglet, posibleng may mga trabaho ang mawala ngunit hindi naman ito nangangahulugang mawawala ang employment sa bansa.

Kabulang nasa ang BPO na maaring maapektuhan sa job losses.

Pagdating naman sa isyu ng climate change, ibinihagi ni Cainglet na hindi pa ito masyadong napagtutuunan ng pansin ng gobyerno.

Aniya, malaki pa ang kailangang habulin at aksyunan ng bansa lalo na at nararamdaman na ng buong bansa ang epekto ng climate change na nakaaapekto rin sa lagay ng employment industry.

Iminungkahi naman din ni Cainglet na kailangang maghanda na ang Pilipinas at magkaroon ng maraming pagsasanay ang workforce ng bansa, tulungan ang mga small at medium enterprises para sa pagpaparami ng mga trabaho sa mas mahabang panahon, at pagbibigay-pansin sa agrikultura. –  Sa panulat ni Jeraline Doinog

Posibleng magkaroon ng epekto sa Pilipinas sakaling totohanin ni US President Donald Trump ang immigration crackdown nito.

Ito’y ayon kay University of the Philippines Diliman Political Science Professor Aries Arugay, dahil sa naiulat na maraming pinoy ang nakatira sa Amerika na walang kaukulang dokumento upang manatili sa nasabing bansa.

Dagdag pa ni Prof. Arugay, ito marahil ang isa sa mga unang gagawin ni President Trump dahil nagbigay babala na mismo ang US Ambassador ng Pilipinas na sumuko na ang mga Pilipinong kulang ang dokumento dahil maghihigpit o magiging harsh na ang parusa para sa mga undocumented.

Matatandaan nuong nakaraang taon, pinayuhan ni amabassador to the us jose romualdez ang mga iligal na Pinoy na nanatili sa Amerika na kusa ng umalis sa nasabing bansa. –  Sa panulat ni Alyssa Quevedo

Tinitingnan ng Malakanyang ang posibilidad na mapalawig pa ang termino ni Philippine National Police Chief, General Rommel Marbil hanggang matapos ang eleksyon sa Mayo ngayong taon.

Ito ang sinabi ni Pangulong Ferdinand Marcos Jr. sa harap ng mga mungkahi at argumento hinggil dito.

Binigyang-diin ni Pangulong Marcos ang malakas na argumento na nagsasabing hindi makabubuti sa katatagan ng bansa kung papalitan sa kalagitnan ng panahon ng kampanya at sa nalalapit na eleksyon ang pinuno ng PNP.

Idinagdag pa ng Pangulo, na pinag-aaralan nila ang argumentong ito na nakikita niyang malakas na dahilan para panatilihin muna si General Marbil sa puwesto hangga’t hindi natatapos ang eleksyon.

Si Marbil ay nakatakdang magretiro sa pebrero ngayong taon. - Mula sa ulat ni Gilbert Perdez (Patrol 13)

Walang nakikitang problema si Pangulong Ferdinand Marcos Jr. sa rekomendasyon ng Metropolitan Manila Development Authority na gawing alas syete ng umaga hanggang alas kwatro ng hapon ang pasok ng mga ahensya ng gobyerno.

Sinabi ng Pangulo, na pinag-aaralan nila ito kung maaari itong gawin.

Gayunpaman, binigyang-diin ng Pangulo na hindi sapat na tanging ang mga ahensya lamang ng pamahalaan manggaling ang mungkahing ito.

Kailangan din aniyang kuhanin ang punto de vista rito o opinyon ng publiko o mga pasahero na siyang maapektuhan ng panukala.

Una nang itinutulak ng MMDA, na ia-adjust ang pasok sa trabaho ng mga nasa gobyerno, mula alas-siyete ng umaga hanggang alas-kuwatro ng hapon, upang hindi magkasabay-sabay ang pasok ng lahat at maiwasan ang matinding trapiko sa Metro Manila. - Mula sa ulat ni Gilbert Perdez (Patrol 13)

Itinanggi ng Department of Budget and Management ang mga paratang kaugnay sa 2025 General Appropriations Act na nilagdaan ni Pangulong Ferdinand Marcos Jr.

Ayon sa DBM, walang blangkong pahina o numero sa 2025 national budget.

Binigyang diin pa ng ahensya na hindi ang GAA o  General Appropriations Bill ang ipinresenta ng mga ‘misinformed’ na indibidwal, kundi mga pahina mula sa Bicameral Conference Committee report.

Kaugnay nito, hinimok ng DBM ang publiko na maging maingat at i-verify muna ang impormasyon bago gumawa ng anumang alegasyon.

Siniguro ng Department of Agriculture na ang suhestiyon ng National Price Coordinating Council na magdeklara ng food emergency ay para lamang sa bigas at hindi sa lahat ng basic commodities sa merkado.

Ayon kay Agriculture Assistant Secretary for High Valued Crops, Sagip Saka and intellectual Property Deputy Spokesperson Atty. Joycel Panlilio, tiniyak niya na ang food emergency ay para ma-release na ang mga stocks sa mga warehouses ng national food authority at hindi naman aniya ito maaapektuhan ang ilang mga common goods na binibili ng merkado sa mga pamilihan.

Aniya, mayroon din kapangyarihan ang NPCC na maganunsyo ng food security emergency sa iba pang mga basic goods kung may makikitang iregularidad gaya ng illegal price manipulation o extraordinary increase sa mga presyo nito.

Samantala, patuloy naman na naghihintay ang panig ng da para sa pagdating ng resolution tungkol sa deklarasyon ng food emergency for rice. –  Sa panulat ni Jeraline Doinog

Binigyang diin ni Pangulong Ferdinand Marcos Jr ang kahalagahan ng sex education sa mga paaralan.

Ayon kay PBBM, mahalagang maituro ang mga bagay na ito sa mga kabataan, partikular ang kahinatnan ng early pregnancy at paglaganap o prevalence ng HIV.

Ibinahagi rin ng Pangulo ang kanyang karanasan sa sex education noong nag-aaral pa lamang siya kung saan itinuro ang anatomy at pagpapaliwanag sa proseso ng reproduksyon.

Ipinunto pa niya na mahalaga ang edukasyon upang mabigyan ang mga kabataan ng tamang kaalaman sa kanilang katawan at maiwasan ang maagang pagbubuntis at iba pang isyung pangkalusugan.

Gayunman, nilinaw ng Pangulo na dapat nakatuon anatomy at reproductive health ang sex education. –  mula sa ulat ni Gilbert Perdez (Patrol 13)

Nilinaw ni Senate Committee on Women, Children, Family Relations and Gender Equality Chairperson Risa Hontiveros na walang terminong “masturbation” at “try different sexuality” sa  panukalang batas sa Senado na naglalayong maprotektahan ang mga kabataang  sa dumaraming bilang ng maagang  pagbubuntis.

Ito ang tugon ni Senador Hontiveros sa naging pahayag ni Pangulong Ferdinand Marcos Jr na nagsasabing nagulat ito ng mabasa ang nilalaman ng Senate Bill 1979  of Prevention of Adolescent Pregnancies.

Gayunman, sinabi ng mambabatas na bukas siya sa pag-amyenda sa nasabing panukala.

Nabatid na, nangako ang Pangulo sa mga magulang  at mga guro na agarang ive-veto ang panukalang batas kapag hindi ito naamyendahan.  Sa panulat ni John Riz Calata mula sa ulat ni Cely Ortega-Bueno (Patrol 19)