NATIONAL NEWS

Mariing pinabulaanan ng Department of Budget and Management na in-edit nito ang kopya ng 2025 General Appropriations Act na naka-upload sa kanilang website.

Kasunod ito ng pahayag ni dating Pangulong Rodrigo Duterte tungkol sa sinasabing mga blankong items sa 2025 budget.

Ayon sa DBM, nagkaroon lamang ng maintenance sa website ang kanilang information and communications technology systems para i-upgrade at palakasin ang system capacity at overall speed at efficiency, matapos dagsain ng website visitors.

Kasabay nito, itinanggi ng ahensya ang mga paratang mula sa mga nagpapakalat ng fake news at professional government destabilizers na mayroong “fill in the blanks” sa GAA.

Wala anilang ni isang pahina o bahagi ang nawawala dito at bilang patunay, libu-libo katao na ang naka-access sa 2025 GAA mula nang i-upload ito noong Enero a-tres, bukod pa ang apatnaraang sets ng printed GAA na nasa kamara at senado na maaaring basahin.

Hinihikayat ng DBM ang publiko na maging maingat at mapanuri upang hindi mabiktima ng maling impormasyon. –  Sa panulat ni Laica Cuevas mual sa ulat ni Gilbert Perdez (Patrol 13)

Ikinabahala ng mismong Chairman ng House Quad Comm ang inilarawan niyang “gross miscarriage of justice” sa war on drugs campaign ng administrasyong Duterte.

Sa kanyang opening speech sa ika-14 na pagdinig ng Komite, ikinalungkot ni Surigao Del Norte Rep. Robert Ace Barbers na mga “fall guy” at hindi ang mga totoong mastermind sa smuggling ng iligal na droga sa bansa ang naparusahan kaugnay ng nasabing kampanya.

Ayon sa Quad Comm Chair, may mga inosente na makukulong ng hanggang 40 taon habang nananatiling nakakalaya ang mga totoong may kasalanan tulad na lamang ng negosyanteng si Mark Taguba, ang bodegerong si Fidel Anoche Dee at dating Bureau of Customs employee Jimmy Guban sa kabila ng kakulangan ng ebidensya.

Nagpahayag din ng pangamba si Cong. Barbers dahil sa pagkakatalaga ng dating Prosecutor na si Aristotle Reyes bilang RTC Judge kahit na fall guys lamang aniya ang mga naparusahan sa kasong hinawakan nito.

Binigyan-diin ni Cong. Barbers ang pangangailangan na amyendahan ang mga batas upang maiwasan ang kawalang hustisya sa hinaharap.

Dagdag pa ng Quad Comm Chair na maiiwasan ang injustice sa bansa sa pamamagitan ng pagpapatibay pa ng mga batas.

Dapat nang agarang kumilos ang senado upang mapahusay at mapalakas ang kasalukuyang anti-espionage law.

Ito ang inihayag ni Senate Committee on Women, Children, Family Relations and Gender Equality Chairperson Risa Hontiveros makaraang maaresto ang isang chinese national na sangkot sa pang-e-espiya.

Ayon kay Senador Hontiveros, napakaraming Chinese nationals ang nakapasok sa bansa nang hindi dumaraan sa kaukulang pagsusuri ng immigration bureau.

Gayunman, kumpiyansa ang Mambabatas na may ginagawa nang mga hakbang ang defense department,  kasama ang iba pang kinauukulang ahensya ng  pamahalaan upang mas mapaigting pa ang pagmamanman sa mga espiyang pumapasok sa bansa.

Binigyang diin ng Senador na mahalagang seryosohin ang ang nasabing usapin para sa kapakanan ng pambansang seguridad, pambansang interes, at soberanya. –  Sa panulat ni John Riz Calata mula sa ulat ni Cely Ortega-Bueno (Patrol 19)

Ipapatawag ng Philippine National Police-Civil Security Group ang nag-viral na estudyanteng nagtitinda ng sampaguita sa isang mall sa Mandaluyong City.

Ayon kay PNP-CSG Spokesperson Lt. Col. Eudisan Gultiano, saka-sakaling hindi ito tumugon ay magpapatuloy pa rin ang preliminary investigation sa insidente.

Gayunman, posible aniyang maka-apekto  sa administrative complaint laban sa gwardiya sakaling mabigo ang nasabing estudyante na maghain ng pormal na reklamo.

Sa ngayon, nananatiling nasa floating status ang security guard na nakatakdang magsumite ng kanyang kontra salaysay sa PNP-CSG, ngayong araw, January 22, 2025. –  Sa panulat ni Jeraline Doinog

Muling hinamon ng  House Quad Committee si dating PNP Chief at ngayo’y Senator Ronald Dela Rosa na humarap sa kanilang imbestigasyon imbes na magtago sa media.

Nabatid na muling ipinagpatuloy ng Komite ang  imbestigasyon kaugnay sa ilegal na droga, Philippine Offshore Gaming Operators at extra-judicial killings.

Ayon kay Manila rep. Bienvenido Abante Jr., nais lamang aniyang humarap si Sen. Dela rosa para maging malinaw ang lahat ng bagay kaugnay sa kalakalan ng dating administrasyon.

Iginiit pa ni Cong. Abante na ang kanilang imbestigasyon ay hindi political motivated sa mga nabanggit na isyu tulad ng ipinapalabas ng senador sa media tuwing nakakalkal ang kanyang papel sa war on drugs kung saan siya ang unang nagpatupad bilang PNP Chief ni dating Pangulong Rodrigo Duterte.

Dagdag pa ng Kongresista na hustisya ang hanap ng Kongreso para sa mga biktima ng EJK kung saan marami sa mga kasong ito ay hindi sangkot sa ilegal na droga subalit napatay o pinatay kaya naging ‘killing fields’ aniya ang bansa. –  Sa panulat ni Jeraline Doinog

Patuloy na pinag-aaralan ng Land Transportation Franchising and Regulatory Board ang hirit ng mga transport group na itaas ang minimum fare sa mga jeep sa 15 pesos.

Sa kabila ito ng sunod-sunod na dagdag-singil sa presyo ng produktong petrolyo.

Ayon sa LTFRB, titignan munang mabuti ng ahensya ang posibleng epekto ng taas-singil sa pasahe sa mga komyuter.

Kailangan anyang balansehin ito para sa kapakanan ng publiko.

Gayunman, tiniyak ng LTFRB na inilalatag na nila ang pagsasagawa ng public hearings at konsultasyon para masiguro ang pagiging bukas at inklusibo ng proseso bago makapagdesisyon sa petisyon.

Pinayuhan ng isang veteran Election Lawyer ang Commission on Election kaugnay sa patuloy na paglalabas ng temporary restraining order ng Korte Suprema sa mga diniskwalipikang kandidato.

Sa panayam ng DWIZ, binigyan-diin ni Atty. Romulo Macalintal na dapat isama na lamang ng COMELEC sa balota ang pangalan ng mga disqualified candidates na inapela ang naging desisyon ng poll body.

Sa ganitong paraan anya ay maiiwasan maantala ang preperasyon ng comelec sa halalan tulad ng pag-iimprenta ng mga balota.

Kaugnay nito, ipinunto pa ni Atty. Macalintal na hindi maaaring tanggalin sa balota ang pangalan ng disqualified candidate na tumatakbo sa ilalim ng isang political party, dahil anya may karapatan ang partido na palitan ito ng ibang kandidato.

Malabong ma-promote ang mga pulis na mapapatunayang nagpagamit sa politiko sa halalan.

Ito ang tiniyak ni Philippine National Police Chief General Rommel Francisco Marbil upang makamit ang tiwala at respeto ng taumbayan sa mga pulis.

Kasabay nito, sinabi ni General Marbil, na makikipag-ugnayan sila sa national security council at national intelligence coordinating agency hinggil sa naturang panuntunan.

Ituturing anyang “Goons” ang sinumang pulis na makikisawsaw sa halalan kasunod ng kanilang kampaniya laban sa “guns, gold” at “fake news.” –  mula sa ulat ni Jopel Pelenio (Patrol 17)

US President Trump, magdedeklara ng national emergency

Magdedeklara ng national emergency at magpapadala ng mga armadong tropa sa Southern border si US President Donald Trump.

Isa ito sa mga highlight at prayoridad sa talumpati ni US President Trump.

Nilagdaan na rin US President Trump ang halos 100 executive orders, kabilang ang 10 nakatuon sa border security at immigration, na kaniyang pangunahing prayoridad.

Sisikapin din ni Trump na wakasan ang tinatawag na birthright citizenship para sa mga batang ipinanganak sa us, na ang mga magulang ay walang legal status, isang hakbang na pinaniniwalaang labag sa konstitusyon ng bansa.

Si Trump ay nakapanumpa na bilang ika-47 na pangulo ng Estados Unidos.

Bukod dito, inanunsyo ng Pangulo na dalawang kasarian lang ang kikilalanin ng kanyang administrasyon sa kabila ng patuloy na pakikipaglaban ng LGBTQ+ community para sa kanilang mga karapatan.

Naniniwala ang isang Political Analyst na magiging positibo ang epekto sa Pilipinas ng pagbabalik White House ni US President Donald Trump.

Sa panayam ng DWIZ, binigyan diin ni Professor Ramon Casiple na wala siyang nakikitang mga polisiya ni US President Trump na posibleng maka-apekto sa malalim na ugnayan ng Pilipinas at US.

Gayunman, posible pa rin anya itong mabago dahil wala pang specific policy na inilalabas ang White House. –  Sa panulat ni Kat Gonzales