NATIONAL NEWS

Ibinunyag ng Department of Justice na mahigit kalahati ng mga nasa pangangalaga ng kanilang witness protection program ay biktima ng incest o panghahalay ng kapamilya.

Ayon kay Justice Undersecretary Raul Vasquez, nangangahulugan ito ng napakalaking pagtaas sa kaso ng sexual exploitation of minors and children, mapalalaki man o mapababae.

Kaugnay nito, isinulong na ng departamento ang pagbabawal sa recantation o pagbawi ng mga testimonya sa oras na maihain na ang kaso, upang matiyak na tuloy-tuloy ang prosekusyon.

Samantala, hinikayat naman ng ahensya ang Department of Interior and Local Government at department of Social Welfare and Development na maging mas aktibo pa sa pagprotekta at pagtulong sa mga biktima ng incest at iba pang uri ng sexual arrest. –  Sa panulat ni Kat Gonzales

Desisyon ni US Pres. Trump na suspendihin ang foreign development aid, wala pang epekto sa Pilipinas

Tikom ang Embahada ng Estados Unidos sa Pilipinas kaugnay sa posibleng epekto ng desisyon ni US President Donald Trump na suspendihin ng 90 araw ang foreign development aid.

Ayon sa US Embassy, mas mabuti kung mismong sa White House na malaman ang magiging implikasyon ng nasabing kautusan ni US President Trump sa mga programa ng US government sa Pilipinas.

Batay sa nilagdaang executive order ng bagong Presidente ng Amerika, agarang ihihinto ang new obligations at disbursements ng development assistance funds.

Nabatid na sa website na foreignassistance.gov ng US department of state, nasa 144 million dollars ang nakalaan na pondo para sa  iba’t ibang program sa bansa nuong nakaraang taon. –  Sa panulatn i ni Kat Gonzales

Matagumpay ang taong 2024 sa Department of Justice matapos tumaas ang bilang ng mga napanagot ng pamahalaan sa batas.

Ayon kay Justice Undersecretary Raul Vasquez, pumalo sa  78 percent ang prosecution success rate nuong nakaraang taon.

Mas mataas anya ito kumpara sa average na 26% nuong bago pumasok ang Marcos administration.

Ipinunto ni Usec. Vasquez na bunsod ito ng implementasyon ng case build up at mas mataas na degree of proof kaya naman gumanda ang lahat ng mga pamamalakad at pagsugpo sa krimen.

Binigyan-diin pa ng DOJ Official na nakatutok sila sa paghuli sa mga totoong kriminal; pantay na pagpapatupad ng batas, at pagsisiguro na ligtas ang mga inosente mula sa gastos at abala na maiidudulot ng paglilitis, dahil sa mga hindi seryosong reklamong ihahain sa korte. –  Sa panulat ni Kat Gonzales

Gumagamit na ang pamahalaan ng artificial intelligence  sa mga solar-pump irrigation systems sa bansa.

Sa Bagong Pilipinas Ngayon public briefing, ibinida ni NIA Administrator Eduardo Guillen na bahagi ito ng kanilang makabagong diskarte, kung saan namo-monitor nila ang mga irigasyon mula sa central office, gamit ang satellite, at nakikita kung gaano karaming tubig ang nailalabas bawat araw.

Ibinida pa ng opisyal na mas advanced ang disenyo ng NIA.

Binigyang diin pa ni Administrator Guillen na ang nia ay may short-term, medium-term, at long-term goals upang matiyak ang sapat na tubig sa mga sakahan. –  Mula sa ulatn i Gilbert Perdez (Patrol 13)

Pinag-iisipan na rin ng Department of Agriculture na ibenta sa mga supermarket at convenience store sa metro manila ang bigas na ibinebenta sa mga Kadiwa store.

Ito ay matapos ang pulong ni Agriculture Secretary Francisco Tiu Laurel Jr. sa mga pangunahing supermarket chains sa National Capital Region.

Ayon kay Agriculture Assistant Secretary at Spokesman Arnel De Mesa, pumayag na ang mga ito na magbenta ng kadiwa rice sa kanilang mga establisyemento at posibleng sa kaparehong presyo rin.

Pinaplantsa pa aniya ang mga detalye para sa rollout ng bentahan sa mga supermarket, kabilang na ang target timeline para sa implementasyon nito.

Bukod sa mahigit dalawampung KNP centers at kiosks sa mga pampublikong pamilihan, at piling LRT at MRT stations, nakipag-ugnayan na rin ang D.A. sa mga Alkalde ng Metro Manila para sa pagpapalawig ng inisyatiba sa 150 pang pampubliko at pribadong palengke sa NCR. –  Sa panualt ni Laica Cuevas

Maghahain si Senate Commitee on Women; Children; Family Relations and Gender Equality Chairperson Risa Hontiveros ng substitute bill para sa Senate Bill 1979 o panukalang Adolescent Prenancy Prevention.

Kasunod ito ng pagbawi ng pitong senador sa kanilang pirma sa Commitee report ng nasabing panukala.

Ayon kay Senador Hontiveros, ang Principal Author ng panukala, nauunawaan nya na may mga kunsiderasyon ang ilang kapwa senador kaya binawi ng mga ito ang suporta sa panukalang tutugon sa pagtaas ng teenage pregnancy sa bansa.

Binigyan-diin ng Senador na sana, sa paghahain niya ng panibagong panukala, mapag-aralan na itong mabuti ng mga kasamahan sa Senado. –  Sa panualtn i Kat Gonzales

Umapela ang Department of Agriculture sa mga rice retailer na sumunod sa mga bagong panuntunan sa presyo ng imported na bigas.

Sa pag-iikot ng D.A. at Department of Trade and Industry sa mga pamilihan, napag-alaman na mayroon pa ring mga nagbebenta ng imported na bigas na mas mataas sa 58 pesos kada kilo.

Gayunman, ikinatuwa pa rin ng departamento na marami na sa mga nagbebenta ng bigas ang sumusunod sa maximum suggested retail price.

Nagbabala naman  ang D.A. na mahigpit nang ipatutupad ang MSRP sa oras na mailabas na ang opisyal na regulasyon sa susunod na buwan. –  Sa panulat ni Kat Gonzales 

Nagbabala ang Department of Information and Communications Technology sa mga kandidatong gagamit ng text blast machines para sa pangangampanya ngayong 2025 midterm elections.

Ito’y matapos maaresto ang isang Malaysian national dahil sa iligal na pagbebenta ng text blast machine.

Ayon kay DICT Secretary Ivan Uy, iniimbestigahan na nila kung paano naipuslit sa bansa ang nasabing makina.

Nakatanggap rin anya sila ng impormasyon na ibinebenta mismo ang nasabing device sa mga pulitiko tuwing sasapit ang eleksyon.

Iginiit ng Kalihim, ang mga kandidatong mananalo sa iligal na paraan ay walang respeto sa batas at posible pang magdulot ng panganib sa publiko. –  Sa panulat ni Kat Gonzales

Nilinaw ni Senate President Francis Escudero na walang blangkong entries sa 6.352-trillion pesos sa 2025 national budget na pinirmahan ni Pangulong Ferdinand  Marcos, Jr.

Ito’y kasunod ng ginawang pagpuna nina dating Pangulong Rodrigo Duterte at davao city 3rd District Representative Isidro Ungab sa mga pagkakaiba sa ulat ng Bicameral Conference Committee sa kamakailang naaprubahang pambansang budget.

Naniniwala rin si Senate President Escudero na maaaring may kinalaman sa nalalapit na eleksiyon ang motibo ni rep. Ungab na dating Chairman ng House Committee on Appropriations.

Nalalapit na  ang election kaya’t hindi na aniya dapat magulat sa mga ganitong kaliwa’t kanang pag-atake.

Nauna nang sinabi ni Senate President Pro Tempore Jinggoy Estrada na imposibleng magkaroon ng blank entries sa Bicam report.

Maging si Senador Joseph Victor Ejercito na wala siyang nilagdaan sa kumalat na blangkong Bicam report. –  Sa panulat ni Jeraline Doinog

Kinastigo ng Makabayan Bloc ang liderato ng mababang kapulungan ng Kongreso kaugnay sa patuloy na hindi pag-aksyon sa tatlong impeachment complaint na inihain ng iba’t ibang grupo laban kay Vice President Sara Duterte.

Nangangamba ang nasabing grupo na ang hindi pag-aksyon ng kamara ay pag-iwas din na mabulatlat ang pondo ni Pangulong Ferdinand Marcos Jr.

Ayon sa joint statement ng nasabing grupo na kinabibilangan nina Act Teachers Rep. France Castro; Gabriela Party-List Rep. Arlene Brosas at Kabataan Party-List Rep. Raoul Manuel,  mula sa kasayasayan ng kongreso ngayon lang anila nangyari na nangungunod ang impeachment complaint sa opisina ng Secretary General ng higit isang buwan.

Naniniwala rin ang nasabing grupo na ang hindi pag-aksyon ng kongreso sa tatlong impeachment complaint ay dahil sa mga pag-amin ni Pangulong Marcos  na kinausap niya ang kanyang mga kaalyado na huwag ipa-impeach ang Pangalawang Pangulo. - Sa panulat ni Jeraline Doinog