NATIONAL NEWS

Nakabalik na sa bansa ang 17 Pilipino na crew members ng MV Galaxy Leader na binihag ng Houthi rebels sa Yemen.

Bandang alas-nuwebe kagabi nang lumapag sa naia terminal 1 ang Oman Air 8-4-3 sakay ang nasabing mga tripulante.

Ayon sa Department of Migrant Workers, isang direktiba mula kay Pangulong Ferdinand Marcos Jr., ang agarang pagpapauwi at pagbibigay ng komprehensibong tulong at suporta sa mga pinalayang Pilipinong Marino.

Mahigit isang taong naging bihag ng Houthi rebels ang mga tripulanteng sakay ng nasabing barko nang kubkubin nila ito nuong November 2023.  – SA panulat ni Kat Gonzales

Umapela ang Presidential Commission for the Urban Poor na huwag nang idaan sa mga pulitiko ang mga ayuda ng gobyerno para sa mahihirap, tulad ng AKAP ng Department of Social Welfare and Development.

Ayon kay PCUP Chairman Meynardo Sabili, dapat i-diretso na sa tao ang pagbibigay ng mga ayuda.

Kapuna-puna na aniya ang ilang pulitiko na sumasama pa sa larawan sa pag-aabot ng ayuda sa mga benepisyaryo, kahit mula naman ito sa national government at hindi sa sarili nilang bulsa.

Binigyan-diin pa ni Chairman Sabili na mayroon din silang nakuhang impormasyon na ginagamit na panakot ng ilang pulitiko na hindi isasama sa AKAP o TUPAD ng DOLE ang mga benepisyaryo kung hindi sila iboboto.

Dahil dito, iginiit ng opisyal na mas nararapat na DSWD na lamang ang mamahagi ng mga ayuda sa pamamagitan ng kanilang regional, provincial, at municipal personnel dahil sila aniya ang may profile o listahan ng tunay na mahihirap. –  SA panulat ni Kat Gonzales

Nagpapatuloy pa rin ang masusing imbestigasyon ng Department of Justice sa mga kaso ng extrajudicial killings na iniuugnay kay dating Pangulong Rodrigo Duterte.

Ayon kay Justice Undersecretary Raul Vasquez, may mga kaso nang natukoy na posibleng may kinalaman sa EJK.

Gayunman, patuloy pa rin aniya ang isinasagawang pagsusuri sa mga ito upang matiyak na may sapat na ebidensya para makasuhan ang mga posibleng sangkot sa kaso.

Binigyan-diin pa ni Usec. Vasquez na layunin ng departamento na hindi lamang makapagsampa ng kaso kundi matiyak na magtatagumpay ito sa korte at hindi mapapawalang-saysay dahil sa kakulangan ng ebidensya.

Matatandaang noong Nobyembre, bumuo ang DOJ ng isang task force upang muling repasuhin ang mga kaso ng EJK na may kaugnayan sa war on drugs ng nakaraang administrasyon. –  Sa panulat ni Kat Gonzales

Handang makipagpulong ang pamahalaan sa International Criminal Court at talakayin ang ilang bagay kaugnay sa imbestigasyon nito sa madugong giyera kontra droga ng administrasyon ni dating Pangulong Rodrigo Duterte.

Ayon ito kay Justice Secretary Jesus Crispin Remulla,  na sinabing gaganapin ang pag-uusap sa lalong madaling panahon.

Mayroon aniyang mga partikular na bagay sa usapin na maaring mapagtulungan ng ICC at Department of Justice gayunman, dapat malinaw pa rin ang kanilang limitasyon.

Sinabi ng Kalihim na pinahihintulutan pa rin ang pakikipag-ugnayan ng pilipinas sa international tribunal sa ilalim ng batas, at sinabing labas-masok na ang miyembro ng ICC sa bansa ngunit hindi naman nagkakaroon ng isyu.

Iginiit pa ni Secretary Remulla na bagama’t palaisipan pa rin ang muling pagsali ng Pilipinas sa ICC, bukas ang administrasyon para malaman ang mga limitasyon ng hindi pagiging bahagi nito at lawak ng krimen bago ang pagkalas dito ng liderato ni dating Pangulong Duterte.

Ipinunto pa ng Justice official na sa kabila ng pagkakaroon ng sariling imbestigasyon ng Philippine authorities, malaki ang maitutulong ng ICC para sa magiging takbo ng nasabing imbestigasyon. –  Sa panulat ni Laica Cuevas

Iginiit ni House Committee on Basic Education and Culture Chairman at Pasig City Representative Roman Romulo na kailangang dumaan sa tamang proseso ang comprehensive sexuality education.

Sa panayam ng DWIZ, kwinestiyon ni Congressman Romulo ang Department of Education kung kinuha ba nito ang consent ng mga magulang para ituro ang nakapaloob sa CSE at kung nagkaroon ito ng konsultasyon sa mga guro.

Kaugnay nito, tiniyak ng Kongresista na hindi titigil ang kongreso hangga’t hindi nagagawa ang tamang nilalaman ng CSE para sa mga mag-aaral.

Magsasagawa naman ng committee hearing ang kamara katuwang ang DEPED, sa Lunes upang malaman kung tinutugunan ba ito ng kagawaran.

Babasahin muna ni Pangulong Ferdinand Marcos Jr. ang substitute bill ng Senate Bill 1979.

Ito ang ang sinabi ni PBBM matapos matanong ng media kung may pagbabago ba sa kanyang pananaw patungkol sa sb 1979 matapos alisin ang Comprehensive Sexuality Education (CSE), base sa international standards.

Ipinahiwatig ni Pangulong Marcos na mahalagang maingat na masuri ang substitute bill bago siya muling  magbibigay ng pahayag hinggil dito.

Ang SB 1979 ay isa sa mga panukalang batas na kasalukuyang tinatalakay sa senado.

Ang pagbabago dito, partikular ang pagtanggal ng CSE na naaayon sa mga pandaigdigang pamantayan, ay nagdulot ng diskusyon sa mga sektor ng gobyerno at iba pang stakeholder.

Una nang iginiit ni pbbm na ive-veto niya ang panukala lalo na ang probisyon na umano’y nagsusulong na turuan ng masturbation kahit ang mga apat na taong na bata.

Nananatiling mataas ang public satisfaction ratings ng Senado, Kamara at Korte Suprema sa isinagawang survey ng social weather stations noong December 2024.

Batay sa resulta ng SWS, 62% ng mga Pilipino ang kuntento sa performance ng Senado habang 18% ang dissatisfied.

Nasa 54% naman ang nagsabing satisfied sila sa performance ng kamara habang nasa 18% naman ang hindi nasiyahan sa performance nito.

Kuntento rin ang mga Pilipino sa performance ng Supreme Court kung saan nakakuha ito ng 58% habang 18% naman ang dissatisfied.

Isinagawa ang survey sa mahigit dalawang libong respondents noong December 12 hanggang 18, 2024, sa pamamagitan ng face-to-face interviews.

Irerekomenda ng Senado na taasan ang ipinapataw na buwis sa electronic cigarettes at licit o legal na sigarilyo sa bansa.

Ito’y matapos lumabas sa survey ng DOST-Food and Nutrition Research Institute na patuloy na tumataas ang bilang ng mga smoker na bumalik sa paggamit ng traditional cigarettes at e-cigarettes.

Ayon kay Senate Committee on Ways and Means Chairman Sherwin Gatchalian, hindi sapat ang ipinapataw na tax ng pamahalaan para mapababa ang consumption ng mga sigarilyo at e-cigarettes.

Dahil dito, iminungkahi ng Senador na dapat taasan ang buwis sa e-cigarettes at gawin itong unitary para madali ang koleksyon ng BIR.

Binigyan-diin pa ni Senador Gatchalian na pag-aaralan din kung sapat ba ang ipinapataw na kasalukuyang tax rates sa manufactured cigarettes para mapababa ang konsumo ng mga naninigarilyo.

Nabatid na batay sa survey, umabot na sa 9.5 million ang bilang ng mga maninigarilyo nuong 2023. –  Sa panulat ni Kat Gonzales