NATIONAL NEWS

Kumbinsido ang isang Lider sa Kamara na layon ng pagpapakalat ni dating Pangulong Rodrigo Duterte ng maling impormasyon kaugnay ng 2025 national budget na maibalik ang confidential fund ng anak niyang si Vice President Sara Duterte.

Kasabay nito, kinondena ni Deputy Majority Leader at La Union Rep. Paolo Ortega ang tinagurian niyang “Lumang estilo” ng pagpapakalat ng fake news gamit ang mga sinasabing internet trolls upang mamanipula ang pag-iisip ng publiko.

Iginiit ni Rep. Ortega na malayo sa katotohanan ang alegasyong “Blank appropriations” ni dating Pangulong Duterte dahil sumailalim sa masusi at konstitusyunal na proseso ang 2025 budget bago ito pinirmahan upang maisabatas.

Inakusahan din ni Rep. Ortega ang dating pangulo na tinatangkang sirain ang proseso ng pagbabadyet upang ma-invalidate ang 2025 national budget at ang 2024 national badget ang gamitin ng pamahalaan kung saan mas malaki ang pondo ng OVP.

Panghuli, hinimok ni Cong. Ortega ang publiko na maging mapagmatyag at huwag basta magpadala sa paninira at fake news lalo’t papalapit na ang halalan.

Kukuwestyunin ng ilang grupo sa Korte Suprema ang mga sinasabing blangko sa Bicameral Conference Committee report ng 2025 national budget.

Ayon kay davao City Rep. Isidro Ungab, kasama siya sa mga mag-aakyat sa nasabing usapin sa kataas-taasang hukuman.

Nais anilang malaman kung paano napunan ng detalye ang mga blangko sa Bicam report bago ito nilagdaan ni Pangulong Ferdinand Marcos Jr. at naging national budget law.

Una nang isinapubliko ni Rep. Ungab kasama si dating Pangulong Rodrigo Duterte, ang natuklasang  dalawampu’t walong blankong entries sa Bicam report, na nasa labingtatlong pahina at posibleng umabot sa bilyun-bilyong piso ang halaga. –  Sa panulat ni Jeraline Doinog

Ipinagdiwang sa Thailand ang kauna-unahang same sex marriage matapos itong maisa-ligal.

Makalipas ang ilang dekadang pangangalampag ng activisit groups, Thailand ang unang bansa sa Southeast Asia at ikatlo sa Asian region na nagsabatas ng same sex wedding matapos ang Taiwan at Nepal.

Mahigit 200 couple ang nakiisa sa mass wedding sa Bangkok, na pinalibutan ng rainbow flags at iba pang pride decorations.

Target naman ng bansa na maabot ang 1,448 wedding registrations sa isang araw, at makilala sa Guinness Book of World Records. –  Sa panulat ni Laica Cuevas

Malapit nang mapalitan ang pangalan ng national Economic and Development Authoriy o NEDA.

Ito’y matapos aprubahan sa  Bicameral Conference Committee ang panukalang batas na naglalayong gawing Department of Economy; Planning and Development o DEP-DEV ang NEDA.

Ayon kay Senador Juan Miguel Zubiri, kapantay na ng DEP-DEV ang iba pang departamento ng pamahalaan at magbubunga aniya ito ng mas maraming trabaho; mas malaking kita at mas uunlad ang ekonomiya ng bansa.

Layunin ng panukalang batas na mas epektibong mapagsama-sama ang mga development plans ng local at national government agencies, at pamumunuan ito ng isang kalihim na siyang manguna sa pagbalangkas ng Philippine development plan.

Matapos aprubahan ng Bicam, kinakailangan na lamang ng enrolled bill na mai-transmit sa Malacañang para malagdaan ni Pangulong Ferdinand Marcos Jr. at  maging ganap ng batas. – Sa panulat ni Kat Gonzales

Magsisimula na ang unti-unting pagpapatupad ng binagong curriculum para sa senior high school sa school year 2025-2026.

Ayon kay Education Secretary Sonny Angara, mas maaga itong sisimulan kumpara sa orihinal na plano.

Sa ilalim aniya ng nasabing curriculum, babawasan na lamang sa lima hanggang pito ang core subjects mula sa 15.

Kaugnay nito, tiniyak naman ng Kalihim na mayroong kalayaan ang mga paaralan, lalo na ang mga pribado, na magdagdag ng electives batay sa pangangailangan ng mga estudyante.

Nabatid na layon ng nasabing curriculum na bigyan ang mga mag-aaral nang higit na kalayaan na pumili ng mga asignaturang angkop sa kanilang pipiliing propesyon. –  Sa panulat ni Kat Gonzales

Muling iginiit ni House Committee on Basic Education and Culture Chairman at Pasig City Representative Roman Romulo na kailangan nang repasuhin ang hindi epektibong K-12 curriculum.

Sa panayam ng DWIZ, sinabi ni Congressman Romulo, na maaari nang pumili sa dalawang education pathways ang mga mag-aaral na magtatapos ng grade 10.

Bukod dito, maaari ring tumuloy sa kolehiyo ang isang grade 10 student nang hindi na daraan sa grades 11 at 12 kapag naipasa ang honors exam.

Una nang inaprubahan sa ikalawang pagbasa ng Kamara ang Education Pathways Act upang maibsan ang pasanin ng mga mag-aaral gayundin ang mga magulang.

Hinikayat ni Senate Commitee on Women; Children; Family Relations and Gender Equality Chairperson Risa Hontiveros sina Pangulong Ferdinand Marcos Jr. at mga kapwa senador na basahin at pag-aralang mabuti ang substitute bill o ang binagong bersyon ng Anti-teen Pregnancy Bill.

Ayon sa Senador, tinanggal na sa kanyang substitute bill ang mga linya na pinagmulan aniya ng maling pag-unawa o misinterpretation.

Umaasa anya siya na bibigyan ang nasabing panukala ng fair chance ng mga kapwa senador, partikular na ng mga bumawi ng lagda sa orihinal na bersyon nito.

Nanindigan naman ang Senador na malaki ang maitutulong ng mandatory Comprehensive Sexuality Education sa pagsugpo sa dumaraming kaso ng maagang pagbubuntis ng mga bata.  –  Sa panualt ni Kat Gonzales

Inihain na ni Senator Risa Hontiveros ang substitute bill para sa panukalang tutugon sa lumalaganap na teenage pregnancy sa bansa.

Sa substitute bill para sa Senate Bill 1979 o ang Prevention of Adolescent Pregnancy Bill, inalis ang katagang “Guided by international standards” at nilinaw din dito na ang adolescents ay mga kabataang edad 10 hanggang 19 na taong gulang.

Sa nasabing edad lamang din ituturo ang Comprehensive Sexuality Education na siyang tutugon sa problema ng teenage pregnancy bilang health issue sa mga batang ina at sa kanilang mga sanggol.

Ang CSE ay isasa rin sa mga umiiral na programa ng DSWD, DEPED, DOH, at ito rin ay tatalakayin sa mga magulang sa mga PTA meeting.

Nakasaad din sa panukala ang pagbibigay ng social protection at serbisyo para sa pangangalaga sa kalusugan ng mga kapapanganak lamang na batang ina at mga bagong silang na sanggol.

Matatandaang pitong Senador ang bumawi ng kanilang pirma sa Committee report ng Senate 1979 sa harap ng mga grupo na kumukwestyun, tumututol at nababahala sa ilang probisyon na nilalaman ng  naturang panukalang batas. –  Sa panulat ni John Riz Calata