NATIONAL NEWS

Tikom ang bibig ng mababang kapulungan ng kongreso hinggil sa isyu ng blankong items sa Bicameral report sa 2025 national budget na tinawag ni dating Executive Secretary Atty. Vic Rodriguez na “biscam’ o Bicam scam.

Unang hiningan ng reaksyon si dating House Committee On Appropriations Chairman at Ako Bicol Party-List Rep. Elizaldy Co hinggil sa isiniwalat nina dating Pangulong Rodrigo Duterte, Davao City Rep. Isidro Ungab at Rodriguez subalit hindi ito sumagot.

Matatandaang, si Co ay tinanggal bilang chairman ng nasabing komite noong Enero a-tres sa pamamagitan ng mosyon ni House Senior Deputy Majority Leader at Presidential son na si Ilocos Norte Rep. Sandro Marcos.

Maging si acting Appropriations Chairperson Marikina Rep. Stella Quimbo ay tila umiiwas sa nasabing isyu habang wala ring sagot ang tanggapan ni House Speaker Martin Romualdez hinggil dito. –  Sa panulat ni Jeraline Doinog

Iginiit ng pamahalaan na hindi maaaring isnabin ang International Criminal Police Organization sakaling hilingin ng International Criminal Court ang tulong nito para arestuhin o maghatid ng kustodiya sa mga taong hinahabol nila para panagutin.

Ito, ayon kay Executive Secretary Lucas Bersamin, kasunod ng pahayag ni Department of Justice Secretary Crispin Remulla na makikipagtulungan ang gobyerno sa ICC sa kabila ng naging pahayag ni Pangulong Ferdinand Marcos Jr. na wala ng ugnayan ang Pilipinas sa ICC at hindi makikipagtulungan sa kanilang imbestigasyon sa war on drugs ng nakalipas na administrasyon.

Hindi aniya nagbago ang posisyon ng pilipinas sa ICC subalit ibang usapan na kung magpapatulong ito sa INTERPOL.

Binigyang-diin pa ng Kalihim na hindi maaaring balewalain ang interpol dahil maraming pagkakataon na nakatulong ito sa Pilipinas.

Hindi aniya nito alam kung ano ang ibig sabihin ni Secretary Remulla sa pahayag nitong makikipagtulungan sa ICC dahil malinaw ang posisyon ng pangulo na tapos na ang ugnayan ng Pilipinas dito. –  Sa panulat ni Jeraline Doinog

Duda si Senador Ronald Dela Rosa sa totoong paninindigan ni Pangulong Ferdinand Marcos Jr., kaugnay sa imbestigasyon ng International Criminal Court sa drug war campaign ng administrasyong Duterte.

Ito’y matapos ang pahayag n Justice Secretary Jesus Crispin Remulla na handa silang makipag-ugnayan sa international tribunal, sa kabila ng paulit-ulit na pagharang dito ni Pangulong Marcos.

Ayon kay Senador Dela Rosa, kahit sino ay magda-dalawang isip sa sinasabi ng pangulo, dahil taliwas ang kanyang mga pahayag sa salaysay ng kanyang mga gabinete.

Palaisipan din sa Senador kung sino talaga ang lider ng bansa dahil ‘tila wala aniyang sumusunod sa sinabi ng pangulo na hindi na nito kinikilala ang hurisdiksyon ng ICC. –  Sa panulat ni Laica Cuevas

Nanatili ng mahigit 10 taon sa Pilipinas ang naarestong pinaghihinalaang Chinese spy.

Ayon kay Immigration Commisioner Joel Anthony Viado, unang pumasok sa bansa ang dayuhang si Deng Yuangin noong 2013 at nabigyan ng residence matapos makapag-asawa ng isang 36-anyos na Pinay sa Pilipinas.

Sinisimulan na anya ang proseso ng deportation pero hindi pa ito ipatutupad habang inaasahang pang magkakaroon ng mga kaso laban sa naturang dayuhan.

Tiniyak naman ng B.I. na ginagawa na ang lahat ng hakbang para protektahan ang pambansang seguridad alinsunod sa kautusan ni Pangulong Ferdinand Marcos Jr.

Nanindigan ang Pilipinas na hindi pa rin makikipagtulungan ang pamahalaan sa International Criminal Court.

Taliwas ito sa pahayag ni Justice Sec. Boying Remulla na makikipag-usap at magkakaroon sila ng kooperasyon sa ICC sa harap ng imbestigasyon sa sinasabing madugong war on drugs ni dating Pangulong Rodrigo Duterte.

Ayon kay Executive Sec. Lucas Bersamin, hindi nagbabago ang pananaw ni Pangulong Ferdinand Marcos Jr. na wala nang hurisdiksyon ang ICC sa bansa, dahil epektibo na ang pagkalas nito sa Rome Statute.

Gayunman, nilinaw ni Executive Lucas Bersamin na hindi nila pipigilan kung sakaling humingi ng tulong ang ICC sa interpol upang arestuhin o isailalim sa kanilang kustodiya ang isang indibidwal.

Binigyan-diin ng opisyal na kailangan nilang tumugon sa interpol sa ngalan ng pagkakaibigan at respeto, dahil nakikinabang din dito ang Pilipinas pagdating sa ibang kaso.

Nilinaw din Executive Sec. Bersamin na ang Interpol ang kanilang pagbibigyan at hindi ang ICC. –  Sa panulat ni Kat Gonzales

Hinikayat ng Malakanyang ang mga public servants, maging ang mga opisyal ng pamahalaan, na manatiling nakafokus sa kani-kanilang mga trabaho at huwag pansinin ang mga ingay lalo na ang mga isyu sa pulitika.

Ito ang mensahe ni Executive Secretary Lucas Bersamin sa isinagawang Budget forum sa PICC sa lungsod ng Pasay.

Binigyang-diin ni Executive Secretary Bersamin na dapat nakatutok ang mga kawani at opisyal ng pamahalaan sa pagpapabuti at pag-angat sa buhay ng mga Filipino.

Malinaw anya ang mandato para sa mga public servants na pagsilbihan ang sambayanang Filipino nang may integridad; dedikasyon at tunay na pagmamalasakit.

Pinangunahan naman ng mga cabinet secretaries, kasama ang mga economic managers, ang 2025 budget execution forum kahapon. –  Sa panualt ni Kat Gonzales

Nagpahiwatig ng pangangamba ang Chinese Embassy sa Pilipinas matapos ang hinihinalang espionage operation ng isang chinese spy.

Giit ng embahada, walang basehan ang espekulasyon at mga akusasyon laban sa sinasabing Chinese citizen na si Deng Yuangin.

Dagdag pa nito, inilapit ng pamilya ni Deng sa kanila ang nangyari at nagpahiwatig ng pangangamba kaugnay sa kaligtasan at fair treatment ng mga otoridad dito.

Una nang sinabi ng Bureau of Immigration na mayroong permanent resident visa ang nasabing Chinese citizen nang ikasal ito sa isang Pinay nuong 2014 at kasalukuyang naninirahan sa Metro Manila. –  Sa panulat ni Alyssa Quevedo

Nangako ang NEDA o National Economic and Development Authority na gagawin pa nitong mas inklusibo ang paglago ng ekonomiya.

Ayon kay NEDA Secretary Arsenio Balisacan, hindi dapat maging kampante ang gobyerno sa kabila ng mga nakamit nito para sa ekonomiya noong 2024.

Patuloy aniyang isusulong ng NEDA ang social economic transformation habang makikipagtulungan din ito sa Kongreso para sa mga prayoridad nito.

Tiniyak din ng kalihim ang suporta sa fiscal programs at pag-institutionalize sa regular monitoring, evaluation, integration sa budgeting, planning, at investment programming. - sa panulat ni Kat Gonzales

Tinatayang 13.2 million o halos 50% ng pamilyang Pilipino ang ikinokonsidera ang kanilang sarili na mahirap nuong huling bahagi ng 2024.

Ayon sa Tugon ng Masa survey ng OCTA Research, ang nasabing bilang ay mas mataas kumpara sa naitalang 43% o 11.3 milyong pamilya noong third quarter nang nakaraang taon.

Kaugnay nito, tumaas naman sa 16% o 4.2 million na pamilyang Pinoy ang nakaranas ng involuntary hunger o kagutuman.

Lumabas din sa survey na nasa 49% o 12.9 million ng mga pamilya sa bansa ang itinuturing ang kanilang sarili bilang food-poor noong fourth quarter ng 2024.

Mas nataas ito kumpara sa 42% o mahigit 11 milyong pamilya na naitalang noong third quarter ng nasabing taon.

Isinagawa ang naturang survey sa 1,200 respondents na may edad 18 pataas nuong buwan ng Nobyembre ng nakaraang taon. - sa panulat ni Kat Gonzales

Target ng Commission on Elections na makapag-imprenta ng 1.5 million na balota kada araw, simula sa Lunes, Enero 27.

Ayon kay COMELEC Chairman George Erwin Garcia, susubukan nilang habulin ang mga nawalang araw ng pag-imprenta dahil sa restraining order na inilalabas ng Korte Suprema.

Gagamitin na anya nila ang lahat ng National Printing Office printers at dalawang bagong Miru machines para matugunan ang mahigit isang milyong production capacity.

Una nang sinabi ng poll body chief na iniurong sa lunes ang pagpapatuloy ng pag-imprenta dahil kailangang ayusin muli ang database ng mga kandidato at bubuo ng mga bagong ballot faces. - sa panulat ni Kat Gonzales