NATIONAL NEWS

Mahigit 20 pilipino na sinasabing sangkot sa mga iligal na aktibidad sa Estados Unidos ang napauwi na ng Pilipinas bilang bahagi ng mass deportation ng administrasyon ni U.S. President Donald Trump.

Ayon kay Philippine Ambassador to the U.S. Jose Manuel Romualdez,  dawit ang 24 na Pinoy na napa-deport sa ilang minor criminal activities.

May maliit anyang pag-asa ang ilang naninirahan na mga Pinoy sa amerika na may trabaho at nagbabayad ng tax na magkaroon ng legal status lalo na kung iis-sponsor ang mga ito ng kanilang employer.

Dagdag pa ni Ambassador Romualdez, pai-igtingin pa nila ang pakikipag-ugnayan sa U.S. Officials upang matiyak ang karapatan at kaligtasan ng mga pilipino sa nasabing bansa sa kabila ng pagbabago ng immigration policy nito sa ilalim ng Trump administration.

Pinapayuhan naman ng opisyal ang mga Pilipino sa US na “walang legal status” na boluntaryo na lamang bumalik ng Pilipinas o trabahuhin ang kanilang mga dokumento, at huwag nang maghintay pa ng mass deportation.  – Sa panulat ni Alyssa Quevedo

Iginiit ng Department of Health na kailangan lamang repasuhin ang republic act #10354 o ang Responsible Parenthood and Reproductive Health Law of 2012 upang maturuan ang mga Pilipino at maiwasan ang unplanned pregnancy.

Ito’y sa kabila ng patuloy na pagtaas ng bilang ng mga batang nabubuntis na edad 15 pababa.

Ayon kay Health Secretary Ted Herbosa, hindi kailangang gumawa ng bagong batas upang talakayin ang nasabing isyu.

Hindi rin anya nakatulong ang kontrobersiyal na 1979 senate bill o ang Adolescent Pregnancy Prevention Bill dahil marami ang hindi sang-ayon dito.

Una nang ibinunyag ng Philippine Statistics Authority na mahigit 2,000 sanggol ang ipinanganak ng mga inang nasa edad 15 pababa nuong 2020, na mas mataas kumpara nuong 2021.

Gayundin nuong 2023, kung saan sumirit pa ang bilang ng mga isinilang na sanggol na ang mga ina ay edad 15 pababa sa 3,135. –  Sa panulat ni Alyssa Quevedo

Target ng Department of Tourism na pagaanin ang visa policy para sa Indian Nationals.

Ayon kay Tourism Secretary Christina Frasco, bahag ito ng kanilang pagsisikap upang madagdagan ang mga turista mula sa India.

Inamin naman ng Kalihim na nahirapan ang Pilipinas na makakuha nang mas maraming Indian tourists kumpara sa Thailand noong 2024, na nakatanggap ng dalawang milyong bisita mula sa India.

Sa kabila nito, kumpyansa si Sec. Frasco na malaki ang potensyal ng Pilipinas na lumago pagdating sa turismo dahil sa mga diving destination at wedding tourism. –  Sa panulat ni John Riz Calata

Tinitingnan na rin ng Department of Agriculture ang posibleng pagpataw ng maximum suggested retail price sa baboy.

Kasunod ito ng pagpapatupad ng MSRP sa bigas at pagtaas ng presyo ng baboy sa ilang pamilihan.

Sa kasalukuyan, pumapalo sa 420 pesos hanggang 480 pesos ang kada kilo nito.

Gayunman, ayon kay Agriculture Sec. Francisco Tiu Laurel Jr., ang farmgate price ng baboy ay nasa 240 pesos kada-kilo lamang, kaya’t walang dahilan upang sumirit ang presyo ng nasabing produkto.

Kaugnay nito, sinabi ng Kalihim na kanilang aalamin ang dahilan ng pagtaase ng presyo ng karne ng baboy at tutukuyin kung may nangyayaring profiteering. –  Sa panulat ni John Riz Calata

Pinabulaanan ni Au Quilala, Convenor ng Child Rights Network, ang paniniwala sa Senate Bill 1979 na nagtuturo sa mga bata tungkol sa masturbation.

Ayon kay Quilala, suportado nila ang SB 1979 o ang adolescent pregnancy prevention bill buhat pa nang una itong inihain noong 2017.

Hindi rin aniya totoo na pahihinain ng panukala ang parental authority sa mga bata.

Matatandaang pitong senador ang nag-withdraw ng kanilang pirma para sa nasabing panukala kasunod ng negatibong reaksiyon mula sa mga religious group at ilan pang grupo.

Sa gitna ng mga alalahanin na ito, sinabi ni Senator Risa Hontiveros, ang principal author ng panukalang batas, na walang ganoong mga probisyon sa iminungkahing panukala.

Ang panukalang batas aniya ay hindi nagmula sa “Standards of Sexuality Education in Europe” ngunit isinangguni mula sa responsible parenthood and reproductive health law.

Kasunod nito, naghain si Hontiveros ng substitute bill para sa SB 1979, kung saan nililimitahan ang mandatoryong Comprehensive Sexuality Education sa mga adolescent na may edad 10 taong gulang pataas. –  Sa panulat ni Jeraline Doinog

Hindi hinuhusgahan ng Malacañang ang panukalang inihain ni Senator Risa Hontiveros na Senate Bill 1979 o ang Adolescent Pregrancy Prevention Act.

Ayon kay Executive Secretary Lucas Bersamin, dapat tingnan ni Senator  Hontiveros ang komento ni Pangulong Ferdinand Marcos Jr. tungkol sa kontrobersyal na Senate Bill no. 1979 bilang opinyon ng isang magulang.

Karaniwan lang aniya ang pagiging broad ng mga salita kaya kahit itinatanggi ng senador na walang kinalaman sa pagtuturo ng masturbation ang kanyang orihinal na panukala, posibleng ganito ang connotation ng nabasa ng Pangulo.

Gayunman, mas mainam na bigyan muna si Pangulong Marcos ng pagkakataon na mabasa ang bagong bersyon ng senate bill bago muling hingan ng komento sa isyu. – Sa panulat ni Jeraline Doinog

Pinabulaanan ni Executive Secretary Lucas Bersamin ang pahayag ng mga mambabatas mula sa Makabayan Bloc sa mababang kapulungan ng kongreso sa umano’y pakikialam ni Pangulong Marcos Jr., kaya naaantala ang impeachment proceedings laban kay Vice President Sara Duterte.

Hindi aniya hinahadlangan ni Pangulong Marcos ang proseso ng impeachment complaints laban kay VP Sara.

Ipinahahayag lamang aniya ni Pangulong Marcos ang pananaw nito sa impeachment move subalit hindi dinidiktahan ang kongreso na ipagpaliban ang proseso ng reklamo.

Sinabi pa aniya ng Pangulo na may karapatan ang kongreso na mag-endorso ng impeachment complaints laban sa Bise Presidente.

Una nang sinabi ni PBBM  na hindi ito pabor sa anumang balakin na i-impeach o patalsikin sa puwesto si VP Sara dahil maaapektuhan  ang trabaho ng mga kongresista at senador. –  Sa panulat ni Jeraline Doinog

Naniniwala si dating Senador Franklin Drilon na dumaan sa tamang proseso ang 2025 national budget.

Sa panayam ng DWIZ, iginiit ni Drilon na hindi blangko ang nilagdaang 2025 general appropriations act ni Pangulong Ferdinand Marcos Jr.

Binigyang-diin pa ng dating senador na mali ang mga paratang ni dating Pangulong Rodrigo Duterte.

Iginiit pa ni Drilon na likas na ang pamumulitika tuwing panahon ng pagsasabatas ng national budget. –  Sa panulat ni John Riz Calata