NATIONAL NEWS

Ipinatitigil ng ilang mambabatas ang pagtuturo ng Comprehensive Sexuality Education sa mga paaralan sa bansa.

Sa pagdinig ng House Committee on Basic Education and Culture, napag-alamang sa ilalim ng department order no.31 ng DEPED sakop nito ang pagtuturo ng CSE ang mga kindergarten.

Giit ng kinatawan ng DEPED na dumalo sa pagdinig, nakabase sa reproductive health law ang pagpapatupad ng nasabing kautusan at ang kahulugan aniya nito ay nakabatay mismo sa United Nation Educational Scientific and Cultural Organization.

Bagay naman na kinuwestiyon ni Congressman Benny Abante, aniya bakit  kinakailangan sundin ang western ideology na kaniyang iginiit na unconstitutional o  hindi aniya ito naaayon sa saligang batas. –  Sa panulat ni Jeraline Doinog

Nakatitiyak ang Philippine National Police na nasa bansa pa rin ang pugante at dating Hepe ng Bureau of Corrections na si Gerald Bantag.

Ito’y matapos ang ibunyag ni Interior Secretary Jonvic Remulla na malapit na nilang malaman ang kinaroroonan ni Bantag.

Ayon kay PNP Spokesperson at PRO-3 director Brigadier General Jean Fajardo, may mga indikasyon na nandito lamang ito sa bansa.

Wala rin aniya silang natatanggap na ulat na pumuslit na ito palabas ng bansa.

Dagdag pa ni BGen. Fajardo, kasalukuyan nilang vi-ne-verify ang ulat na natanggap ng kanilang ahensya tungkol sa nasabing pugante.

Nahaharap sa kasong murder si Bantag kaugnay sa pagpatay sa Radio Broadcaster na si Percival Mabasa. –  Sa panulat ni Alyssa Quevedo

Iginiit ni Senador Ronald Dela Rosa na hindi hustisya ang hangad ng International Criminal Court kundi pagkontrol sa member-states nito.

Ginawa ni Sen. Dela Rosa ang pahayag matapos i-anunsyo ni Justice Secretary Jesus Crispin Remulla na bukas ang bansa na makipagdayalogo sa ICC sa imbestigasyon sa war on drugs ng administrasyong Duterte.

Para kay Sen. Dela Rosa, halatang nagpupumilit ang ICC na magsagawa ng imbestigasyon sa kabila ng pagkalas ng Pilipinas sa international tribunal.

Gayunman, nanindigan ang Senador na hindi siya tutugon sa anumang tawag mula sa ICC dahil ito ay katumbas ng pagkilala sa kanilang hurisdiksyon sa Pilipinas. –  Sa panulat ni Jeraline Doinog

Welcome sa International Criminal Court ang pagiging bukas ng Pilipinas sa imbestigasyon sa sinasabing extra judicial killings sa war on drugs ng Duterte administration.

Ayon sa ICC, ikinagagalak nila ang pakikipag-ugnayan ng estado sa kanila.

Umaasa anya sila sa mas higit pangpakikipagtulungan at kooperasyon ng bansa sa nasabing imbestigasyon.

Una rito, sinabi ni Justice Secretary Jesus Crispin Remulla na maaaring makipagtulungan ang gobyerno ng Pilipinas sa imbestigasyon ng ICC sa mga partikular na lugar.

Gayunman, nanindigan ang malakanyang na nakadepende pa sa magiging aksyon ng International Criminal Police Organization ang pakikipagtulungan ng pamahalaan sa ICC. – Sa panulat ni Kat Gonzales

Nagsalita na si House Appropriations Committee acting Chairperson Stella Quimbo, kaugnay sa sinasabing blangko sa Bicam report ng 2025 national budget.

Ayon kay Congresswoman Quimbo, nagkaroon lamang ng typographical errors sa isinumiteng report pero kumpleto at walang blangko sa alokasyon ng mahigit 200,000 line items nito.

Nilinaw ng Kongresista, na matagal na ring ginagawa ang Omnibus provisions na nagpapahintulot sa mga technical staff na isagawa ang angkop na pagtatama bago ito isapinal o ipatupad.

Iginiit ng Mambabatas, na “Politically motivated” ang mga kritiko o mga tumutuligsa sa pambansang pondo dahil pilit itong hinahaluan ng isyu o mga maling impormasyon.

Binigyang diin naman ni Congresswoman Quimbo, na ang 2025 General Appropriations bill ay wasto at naaayon sa batas. –  Sa panulat ni Kat Gonzales

Sinampahan ng kasong ethics complaint ni Cassandra Li Ong si House Quad Committee Co-Chairman at Laguna Rep. Dan Fernandez.

Ayon kay Atty. Ferdinand Topacio, abogado ni Ong, lumabag si Cong. Fernandez sa code of conduct sa gitna ng imbestigasyon sa operasyon ng iligal na POGO.

Aniya nilabag ng mambabatas ang karapatan ng Ong na kumonsulta sa kaniyang abogado maging ang karapatan nitong manahimik sa mga pagdinig.

Dagdag pa ni Atty. Topacio, hinarang at pinagbantaan siya ni Cong. Fernandez at ipaco-contempt kung hindi ito titigil sa pakikipag-usap sa kanyang kliyente.

Para naman kay Cong. Fernandez, handa niyang harapin ang ethics complaint na inihain ng kampo ni Ong kung saan hahayaan niya ang House Committee on Ethics na dinggin at magdesisyon kaugnay dito. –  Sa panulat ni Jeraline Doinog

Dinepensahan ng Malacañang ang iginawad na executive clemency kay dating Iloilo City Mayor Jed Patrick Mabilog.

Ayon kay Executive Secretary Lucas Bersamin, pinagbigyan ni Pangulong Ferdinand Marcos Jr., ang hirit ni dating Mayor Mabilog para sa executive clemency dahil sa katwiran ng dating alkalde na hindi narinig ang kanyang panig noong panahong gawaran siya ng guilty verdict ng korte mula sa inihaing kaso ng Ombudsman.

Binigyan-diin ni ES Bersamin na ngayong bago na ang nakaupong administrasyon, nagkaroon ng lakas ng loob si Mabilog na bumalik sa pilipinas para harapin ang kaniyang mga kaso, gayundin sa gitna ng imbestigasyon ng Quad Committee ng Kamara hinggil sa mga kaso ng extra judicial killings o EJKs na bunga ng war on drugs campaign ng nagdaang administrasyon.

Giit pa ng Palace Official, pinagbigyan ng palasyo ang hiling na clemency ni Mabilog dahil naipaliwanag nito kung bakit hindi siya nakapagsumite dati ng paliwanag sa discrepancy sa kaniyang SALN. –  Sa panulat ni Kat Gonzales

Umabot sa 1,600 katao sa Metro Manila ang naparusahan dahil sa non-stop na pag-videoke.

Ayon kay National Capital Region Police Office Director Brigadier General Anthony Aberin, Maliban sa pagvi-videoke nang lampas sa itinakdang oras, lumabag din ang ilan pang nahuli dahil sa pag-inom ng alak at paninigarilyo sa pampublikong lugar; paglalakad sa kalsada nang walang damit pang-itaas; at ilegal na pagtatapon ng basura.

Nabatid na labag sa ordinansa ang paggamit ng magdamagang videoke kung saan maaaring makulong at patawan ng multa.

Umarangkada na ang proseso para sa gagawing promotion ng mga public school teacher na awtomatikong magpapataas din sa kanilang sweldo.

Sa Bagong Pilipinas Ngayon, sinabi ni Education Secretary Sonny Angara na libo-libong mga pampublikong guro ang makikinabang sa promotion, sa ilalim ng expanded career progression.

Sa pamamagitan ng nasabing programa, lilikha ng item o posisyon na Teacher 4 hanggang Teacher 5, kaya’t mas magiging mabilis ang pag-angat ng mga Public School Teachers at hindi matetengga sa pagiging Teacher 1, 2 o 3.

Ang nasabing hakbang ay alinsunod aniya sa sinabi ni Pangulong Ferdinand Marcos Jr. na ayaw niyang may magre-retirong guro na ang posisyon ay Teacher 1, na binanggit mismo nito sa kanyang State of the Nation Address o SONA. –  Mula sa ulat ni Gilbert Perdez (Patrol 13)

Sasailalim sa budget review ngayong linggo ang nasa 50% ng mga ahensya ng pamahalaan na tinapyasan ng pondo sa ilalim ng 2025 national budget.

Ayon kay Budget Secretary Amenah Pangandaman, itutuloy nila ang pagrerepaso sa pondo ng iba pang mga ahensya ngayong linggo.

Nasa 30 bilyong piso aniya ang kailangang mapunan sa mga kagawaran na nagkaroon ng budget cut.

Gayunman, hindi pa aniya tapos ang ginagawang pagre-review sa pondo.

Matatandaang ilan sa mga government agency na sumailalim na sa budget review  ang Department of the Interior and Local Government, Department of Labor and Employment, Department of Tourism, Department of Education, at Department of Public Works and Highways. - Mula sa ulat ni Gilbert Perdez (Patrol 13)