NATIONAL NEWS

Kinontra ni Senador JV Ejercito ang sinasabing sapawan o overlapping sa trabaho ng Philippine Health Insurance Corporation at Department of Health.

Ayon sa Senador, malinaw ang tungkulin ng dalawang ahensya sa ilalim ng Universal Health Care Law.

Tugon ito ni Senador Ejercito, sa pahayag ni PhilHealth President at CEO Emmanuel Ledesma Jr. na may sapawan sa kanilang tungkulin at sa DOH at may banggaan sila sa mga polisiya kaya naapektuhan ang delivery ng mga serbisyo ng PhilHealth.

Giit ng Mambabatas, kung may inefficiencies o kakulangan ang PhilHealth, nasa management o mga nangagasiwa rito ang problema kaya’t kailangan ng malakas at accountable na liderato ng ahensya.

Kasunod nito, muling iminungkahi ng mambabatas na magkaroon ng oversight committee ang kongreso na rerepaso sa performance ng PhilHealth para makita ang mga kakulangan nito at kung sino ang may pananagutan sa mga naturang pagkukulang. – Sa panulat ni Laica Cuevas

Kumbinsido si Senador Sherwin Gatchalian na walang malaking epekto sa pilipinas ang kautusan ni US President Donald Trump na itigil muna ang pagkakaloob ng financial assistance sa  ibang bansa.

Ito, ayon sa Senador, ay dahil nasa pamahalaan naman ang desisyon kung paano palalakihin at ima-maximize ang mga ongoing na proyekto na may pondo mula sa Amerika.

Inasahan na rin naman aniya ang pagtigil ng foreign assistance mula sa US sa muling pag-upo ni President Trump dahil halos ipahinto na rin ito noong una siyang maupo bilang pangulo ng Amerika noong 2017.

Sinabi pa ni Senador Gatchalian, karamihan kung hindi man lahat ng US aid projects ay ukol sa research o pagsasaliksik at pilot projects na naka-disenyo para paghusayin at pagandahin ang proyekto ng mga bansang tatanggap ng foreign assistance.  –  Sa panulagt ni Laica Cuevas mula sa ulat ni Cely Ortega-Bueno (Patrol 19)

Tiwala ang Department of Agriculture na makakabawi ang agricultural production ng bansa ngayong taon, partikular sa sektor ng bigas.

Ayon kay Agriculture Assistant Secretary at Spokesman Arnel De Mesa, halos isang metriko tonelada ang nawala sa palay production noong nakaraang taon dahil sa epekto ng El  Niño phenomenon, sunod-sunod na bagyo, peste, pagputok ng bulkan, at La Niña.

Iginiit naman ni Asec. De Mesa ang pinahusay na suporta para sa mga magsasaka sa pamamagitan ng dagdag-pondo sa ilalim ng General Appropriations Act at inamyendahang Rice Tariffication Law.

Sa 30 billion pesos na rice competitiveness enhancement fund, 15 billion pesos dito ang ilalaan para sa extension at training programs, financial assistance para sa mga magsasaka, solar-powered irrigation system at high-quality na mga binhi.

Samantala, tiniyak din ng D.A. Official na walang magiging malaking epekto sa presyo ng gulay at kabuuang produksyon nito ang napaulat na frostbite sa ilang agri commodities sa Northern Luzon.

Naniniwala si House Deputy Majority Leader at La Union Rep. Paolo Ortega na ang petisyon na inihain sa Korte Suprema laban sa 2025 General Appropriations Act ay isang hakbang upang maibalik ang bilyong budget ni Vice President Sara Duterte.

Ang petisyon ay inihain nina Davao City Rep. Isidro Ungab at Atty. Vic Rodriguez

Nabatid na sakalaing nabasura ang 2025 gaa, ang gagamitin ng national government ay ang 2024 notional budget.

Sa ilalim ng 2025 GAA ang Office of the Vice President ay mayroong P733 milyong budget, mas mababa sa P2 bilyong pondo nito sa ilalim ng 2024 GAA.

Naniniwala rin ang ang mambabatas na  ang motibo sa paghahain ng petisyon ay kaduda-duda na tungkol budgetary provisions kundi para magkaroon ng “political leverage.”

Nagpahayag din si Ortega ng kumpiyansa sa Korte Suprema na makikita nito na dapat ibasura ang petisyon. –  Sa panulat ni Jeraline Doinog

Nanindigan si Vice Chairperson, House Committee on Appropriations Rep. Zia Alonto Adiong, na dumaan sa tamang proseso ang 2025 national budget.

Ayon kay Adiong, siniyasat ng maigi ng kongreso at mababang kapulongan ang General Appropriations Act.

Giit naman ni Deputy House Majority Leader Rep. Paolo Ortega, halatang namumulitika lamang sina dating Executive Secaretary Vic Rodriguez at Davao City 3rd District Rep. Isidro Ungab para siraan ang administrasyong Marcos.

Gusto lang aniya ng mga ito na ipawalang bisa ang 2025 national budget para maibalik ang mas malaking pondo ng opisina ni Vice President Sara Duterte.

Para naman kay House Speaker Martin Romualdez, pag-aaral niya muna ang nasabing isyu.

Habang si Senate President Francis Escudero, bukas sa inihaing petisyon. –  Sa panulat ni Jeraline Doinog

Binigyan-diin ni Senate President Chiz Escudero na isang magandang pagkakataon ang inihaing petisyon sa Korte Suprema upang malinawan ang taumbayan na hindi illegal ang nakitang blank items sa Committee report ng 2025 budget.

Ayon sa Senate President, na hindi maaring iwanan na blangko ang anumang pahina sa inaprubahang budget.

Gayunman, iginiit ni SP Escudedro na hindi rin naman iligal kung nagkaroon ng blankong linya o item sa committee report.

Maari naman kasi anya itong itama ng House Appropriations at Senate Committee on Finance na syang nagbalangkas ng detalye ng budget.

Naniniwala din ang lider ng Senado na ang mga petisyon para kwestyunin ang legalidad ng budget at iba pang inaprubahang batas ng kongreso ay bahagi lang ng umiiral na demokrasya. –  Sa panulat ni KAt Gonzales

Tumanggi muna ang Malacañang na magkomento kaugnay sa inihaing petisyon sa Korte Suprema na kumu-kwestyon sa 2025 General Appropriations Act.

Ayon kay Executive Secretary Lucas Bersamin, kailangan niya munang mabasa ang nilalaman ng petisyon.

Matapos nito, saka anya maglalabas ng komento ang malacañang, sa pamamagitan ng tanggapan ng Office of the Solicitor General.

Una rito, naghain ng petisyon sa Korte Suprema ang ilang petitioner na humihiling na maisantabi at maipawalang bisa ang 2025 national budget. –  Sa panulat ni Kat Gonzales

Pormal nang isinumite sa Korte Suprema ang pagkwestyon sa constitutionality o ligalidad ng 2025 national budget na nilagdaan ni Pangulong Ferdinand Marcos Jr.

Pinangunahan nina dating Executive Secretary Vic Rodriguez at Davao City 3rd District Representative Isidro Ungab ang paghahain ng Petition for Certiorari and Prohibition laban sa ilang bahagi ng national budget.

Ayon kay dating Executive Secretary Rodriguez, hinihiling ng petisyon na maisantabi at ipawalang bisa ang 2025 gaa dahil anya iligal at unconstitutional  ang pagkakaroon ng blangkong item sa naturaang panukala.

Binigyan-diin pa ng dating opisyal na kasabwat sa sinasabing biggest money heist, ang mga mambabatas na hindi tumutol sa pagpasa ng Bicam report.

Kasama sa tinukoy ng mga petitioner sa kanilang petisyon ang bahagi ng pondo ng Department of Agrarian Reform; National Irrigation Administration at philippine Coconut Authority na may blangkong item sa pondo. – Sa panulat ni Kat Gonzales

Ibinasura ng Quezon City Prosecutor’s Office ang mga reklamong direct assault; grave coercion at disobedience to authority na isinampa laban kay Vice President Sara Duterte.

Sa 13-pahinang resolusyon, inirekomenda ng City Prosecutor, na ibasura ang reklamo laban kay VP Duterte; Vice Presidential Security and Protection Group Head Colonel Raymund Dante Lachica, at iba pa, dahil wala anilang sapat na batayan para isulong pa ang kaso.

Nag-ugat ang pagsasampa ng kaso ni Police Lieutenant Col. Van Jason Villamor sa mga respondent matapos magkaroon ng tensyon sa paglilipat kay OVP Chief of Staff Atty. Zuleika Lopez, mula sa Veterans Memorial Medical Center patungong St. Luke’s Medical Center. –  Sa panulat ni Kat Gonzales