NATIONAL NEWS

Kuntento ang mayorya ng mga Pilipino sa pamamahala ng administrasyon ni Pangulong Ferdinand Marcos Jr.

Sa resulta ng Social Weather Stations survey sa huling bahagi ng 2024, 59% ng mga Pilipino ang nagsabing satisfied sila sa kasalukuyang liderato.

Gayunman, mas mababa ito ng 1% sa 60% noong September survey, mas mababa rin ng 1% ang dissatisfaction rate habang umakyat naman sa 17% ang mga Pilipinong undecided mula sa dating 15%.

Naitala sa Visayas ang pinakamataas na satisfaction rating na may 65% habang pinakamataas na dissatisfaction rating naman sa Mindanao na may 31%. –  Sa panulat ni Laica Cuevas

Umapela ang ilang mga grupo ng Overseas Filipino Workers sa Marcos administration na tugunan ang pagtaas ng presyo ng mga pangunahing bilihin at ang patuloy na pagdami ng mga pilipinong nangingibang bansa upang makakuha ng sapat na “family living wage”.

Ayon sa OFW Rights’ group na Migrante International, suportado nito ang apela ng mga OFW na itaas sa 1,200 pesos ang daily minimum wage ng mga nagtatrabaho sa pribadong sektor at 33,000 pesos na monthly salary para sa mga public employees.

Binigyang-diin ni Migrante International Chairperson Joanna Concepcion na kulang sa konkreto at pangmatagalang plano ang kasalukuyang administrasyon kaugnay sa pagtugon sa kahirapan, unemployment, at absence of security of tenure.

Dahil dito, naglabas aniya ng “manifesto of unity” ang Migrante International na suportado ng mahigit isandaan at 50 OFWs at Overseas Filipinos organizations. –  Sa panulat ni Jonh riz Calata

Kinumpirma ni Presidential Communications Office Secretary Cesar Chavez na sinertipikahan na ni Pangulong Ferdinand Marcos Jr. bilang ‘urgent bill’ ang panukalang batas na naglalayong ipagpaliban ang halalan sa Bangsamoro Autonomous Region in Muslim Mindanao ngayong taon.

Layunin anya ng hakbang na bigyan ng mas mahabang panahon ang pamahalaan at ang bangsamoro transition authority upang higit na maipatupad ang mga reporma at proyekto sa rehiyon.

Sinasabing ang postponement ng eleksyon ay makatutulong sa pagpapatatag ng pamamahala at sa pagtugon sa mga pangunahing pangangailangan ng mga mamamayan ng BARMM.

Una rito, nagkaroon ng konsultasyon sa pagitan ng pamahalaan, mga lider ng barmm, at iba pang stakeholders bago isinulong ang naturang panukala.

Samantala, umaasa ang malakanyang na agad na aaksyunan ng kongreso ang nasabing bill upang maisabatas ito sa lalong madaling panahon.  - Sa panulat ni Kat Gonzales

Inirekomenda ng Rizal Provincial Police Office sa land Transportation Office na tanggalan ng lisensya ang mga pasaway o “Kamote rider” Sa Marilaque kasunod ng pagkasawi ng isang rider matapos itong mabunggo habang ginagawa ang isang motorcycle stunt.

Sa panayam ng DWIZ, sinabi ni Police Colonel Felipe Maraggun, Provincial Director ng Rizal Provincial Police Office, na pinag-aaralan na rin ng pamahalaang panlalawigan ang isang ordinansa, na naglalayong maibsan ang aksidente sa nasabing lugar.

Humihirit din ang Rizal PPO sa Department of Public Works and Highways na maglagay ng ramble strip, warning signages, CCTV at street lights upang bagalan ng mga motorista ang kanilang takbo sa kahabaan ng marilaque.

Aminado na naman ang Colonel Maraggun, na hindi pa rin sapat ang pagde-deploy lang ng mga pulis, para mabantayan ang marilaque highway, lalo na’t aabot ito ng 100 kilometers mula Marikina hanggang sa probinsya ng Quezon.

Nais ng Manila Electric Company o MERALCO na ibalik sa kanilang customers ang 19 billion pesos  na over collection o sobrang nasingil.

Sa ngayon, pinoproseso na ng electric distributor ang kanilang refund petition para isumite sa Energy Regulatory Commission.

Ayon sa Meralco, sakaling aprubahan ng ERC, aabot sa tatlong taon ang pagbabalik ng over collection  at kada consumer ay tatanggap ng 19 centavos per kilowatthour na refund.

Naganap ang over collection noong July 2022 hanggang December 2024.

Sa tala ng Meralco hanggang noong 2023, nasa 7.8 million ang consumers ng energy distributor.

Nababagalan ang mga miyembro ng House Quinta “Murang bigas” Committee sa hakbang ng Department of Agriculture, Department of Trade and Industry at National Food Authority para mapababa ang presyo ng bigas.

Sa ikalimang pagdinig ng Mega Panel hinggil sa mataas na presyo ng bigas at iba pang pagkain,  pinuna ng mga mambabatas ang kabiguan ng mga nasabing ahensya na maglabas ng draft para sa deklarasyon ng food security emergency mahigit isang linggo matapos ipahayag ni Pangulong Ferdinand Marcos Jr. na pabor siya sa naturang hakbang.

Sinabi ni DA Undersecretary Christopher Morales sa Komite na pinamumunuan ni Albay Rep. Joey Sarte Salceda na iniikot pa ang papel para sa pagdedeklara ng food security emergency sa bansa.

Ikinadismaya ni Oriental Mindoro Rep. Arnan Panaligan ang tila kawalan ng urgency ng mga opisyal na makapagpatupad ng mga hakbang upang mapababa ang presyo ng bigas.

Hinimok ni Rep Panaligan ang DA na maging “dynamic and aggressive” sa kampanya upang mapababa ang presyo ng pagkain, partikular na ang bigas.

Sa pagdinig ng murang bigas committee, sinabi mismo ni NFA Administrator Larry Lacson na ipinagbabawal ng batas sa kanilang ahensya na magbenta ng bigas nang walang deklarasyon ng food security emergency.

Plano ng ilang grupo na magkasa ng kilos-protesta sa Biyernes, Enero 31, para ipanawagan ang impeachment laban kay Vice President Sara Duterte.

Ayon kay Clergy for Good Governance Convenor, Fr. Robert Reyes, gagawin ang rally sa Edsa Shrine sa bahagi ng Ortigas Avenue, Quezon City.

Layon aniya ng kilos-protesta na ipanawagan sa Kongreso na gawin nito ang mandato ng konstitusyon na patalsikin ang mga opisyal ng gobyernong sangkot sa kurapsyon.

Kasabay nito, nilinaw ni World Evangelical Alliance Bishop Efrain Tendero na hindi naka-sentro ang protesta sa pagpapatalsik kay VP Sara kundi sa iba pang isyung kinakaharap ng pamahalan.

Giit ni Bishop Tendero, non-partisan sila at walang sinusuportahang panig.

Inaasahan namang makikiisa ang nasa limang libo hanggang sampung libo katao mula sa iba’t ibang religious groups, organisasyon at sectoral groups sa nasabing pagtitipon. –  Sa panulat ni Laica Cuevas

Nanindigan si House Quad Committee Co-Chairman at Laguna Representative Dan Fernandez na walang nilabag ang komite sa imbestigasyon nito sa iligal na operasyon ng Philippine Offshore Gaming Operator o POGO.

Sa panayam ng DWIZ, sinabi ng Kongresista, na pinepersonal lamang siya ng legal counsel ni Cassandra Li Ong na si Attorney Ferdinand Topacio, lalo na’t siya lamang ang inireklamo.

Handa namang harapin ni Co-Chairman Fernandez ang inihaing ethics complaint.

Sinagot naman ng mambabatas ang paratang ni Atty. Topacio na gumagamit lamang siya ng google tuwing may isinasagawang pagdinig.