NATIONAL NEWS

Nanawagan si retired police major general German Doria, chairman at pangulo ng Association of General and Flag Officers, Inc., para sa agarang pagtanggal ng iligal na floating platform na inilagay ng China sa loob ng lagoon ng Bajo de Masinloc.

Ayon kay General Doria, ang naturang istruktura ay may seryosong implikasyon sa soberanya, seguridad, at mga karapatan ng Pilipinas sa West Philippine Sea.

Iginiit ng pangulo ng AGFO na hindi dapat pahintulutang maging daan ang anumang pansamantalang istruktura para sa reclamation, island-building, o militarisasyon ng pinag-aagawang teritoryo.

Aniya, bilang mga dating pinuno ng Armed Forces of the Philippines at Philippine National Police, may tungkulin silang magsalita laban sa mga hakbang na maaaring magpalala ng paglabag sa lehitimong karapatan ng bansa sa karagatan.

Ipinunto ni General Doria na ang paglalagay ng floating platform sa loob ng Exclusive Economic Zone ng Pilipinas ay taliwas sa United Nations Convention on the Law of the Sea at sa 2016 South China Sea Arbitration Award.

Samantala, pinuri rin ng AGFO ang pagbabantay ng AFP, Philippine Coast Guard, at Bureau of Fisheries and Aquatic Resources, at nanawagan sa mga Pilipino na magkaisa sa pagtatanggol sa pambansang interes sa West Philippine Sea.—sa panulat ni Jordan Gutierrez

Aabot sa halos 20,000 indibidwal o mahigit 4,000 pamilya ang pa rin ang nananatili sa higit 46 na evacuation centers sa Mindanao, isang linggo matapos ang magnitude 7.8 na lindol.

Batay ito sa pinakahuling tala ng Department of Social Welfare and Development (DSWD), kung saan naitala rin ang nasa 16,000 pamilya na nakikitira muna sa kanilang mga kaanak.

Kaugnay nito, sumampa na rin sa 140-milyon ang halaga ng tulong na naipaabot ng ahensya sa mga apektadong residente.

Samantala, tiniyak ng DSWD na tuloy-tuloy pa rin ang pagpapaabot ng tulong para sa mga naapektuhan ng pagyanig.

Umakyat na sa 61 ang bilang ng mga nasawi dahil sa pananalasa ng kalamidad sa ilang bahagi ng Mindanao, ayon sa Office of Civil Defense (OCD).

Sa panayam sa programang DWIZ Todong Lakas, sinabi ni OCD Assistant Secretary Bernardo Rafaelito “Raffy” Alejandro IV na nasa 33 naman ang naitalang nawawala hanggang nitong umaga.

Karamihan sa mga missing persons ay mula sa mga bayan ng Jose Abad Santos sa Davao Occidental at Glan sa Sarangani, na kabilang sa mga lugar na matinding naapektuhan ng landslide.

Patuloy naman ang search, rescue, at retrieval operations ng mga awtoridad sa mga apektadong lugar upang mahanap ang mga nawawala at matulungan ang mga residenteng naapektuhan ng sakuna.