NATIONAL NEWS

Umakyat na sa 61 ang bilang ng mga nasawi dahil sa pananalasa ng kalamidad sa ilang bahagi ng Mindanao, ayon sa Office of Civil Defense (OCD).

Sa panayam sa programang DWIZ Todong Lakas, sinabi ni OCD Assistant Secretary Bernardo Rafaelito “Raffy” Alejandro IV na nasa 33 naman ang naitalang nawawala hanggang nitong umaga.

Karamihan sa mga missing persons ay mula sa mga bayan ng Jose Abad Santos sa Davao Occidental at Glan sa Sarangani, na kabilang sa mga lugar na matinding naapektuhan ng landslide.

Patuloy naman ang search, rescue, at retrieval operations ng mga awtoridad sa mga apektadong lugar upang mahanap ang mga nawawala at matulungan ang mga residenteng naapektuhan ng sakuna.

Iginiit ni House Prosecution Member at Bicol Saro Party-list Representative Terry Ridon na walang isyu sa prosecution panel kung sino man ang magiging presiding officer ng Senate Impeachment Court sa paglilitis kay Vice President Sara Duterte.

Ito ay matapos ang biglaang pagpapalit ng liderato sa Senado, kung saan kinikilala na ngayon si Senador Win Gatchalian bilang Acting Senate President.

Ayon kay Congressman Ridon, ang mahalaga ay nauunawaan ng magiging presiding officer ang mga argumentong ihaharap ng magkabilang panig at may kakayahang maglabas ng wastong pagpapasya sa mga ito.

Gayunman, patuloy na tinitiyak ni Congressman Ridon na magpapatuloy ang impeachment proceedings laban kay VP Sara.—sa panulat ni Daniela De Guzman

Nilinaw ni Bicol Saro Party-list Rep. Terry Ridon na hindi kinakailangang abogado ang magsilbing presiding officer sa impeachment court.

Ayon kay Ridon, walang nakasaad sa Konstitusyon o sa Senate rules bilang impeachment court na nagsasabing dapat abogado ang presiding officer.

Dahil dito, sinabi niyang maaaring italaga ang sinumang kwalipikadong opisyal sa naturang posisyon basta’t kaya nitong maintindihan ang mga argumentong ihaharap ng magkabilang panig at makapagbigay ng maayos na pagpapasya sa mga usaping ihaharap sa impeachment proceedings.

Binigyang-diin ni Ridon na ang mahalaga ay ang kakayahan ng presiding officer na pangasiwaan nang patas at maayos ang paglilitis.

Tinawag ni Senador Francis Pangilinan na isang insulto sa Pilipinas at paglala ng umano’y panggigipit ng China sa usapin ng West Philippine Sea ang ipinataw na sanctions laban kay Defense Secretary Gilberto Teodoro Jr..

Ayon kay Pangilinan, dapat tutulan ng pamahalaan ang hakbang ng China dahil hindi lamang si Teodoro ang tinatamaan nito kundi maging ang soberanya at dignidad ng bansa.

Matatandaang ipinagbawal ng China si Teodoro at ang kanyang pamilya na makapasok sa mainland China, gayundin sa Hong Kong at Macau.

“By imposing sanctions on the Philippine Secretary of National Defense, China is striking at the sovereign decisions of the Republic of the Philippines. Punishing him and his family for doing so is a direct affront not only to him, but to the President, the Philippine state, and our constitutional order” — Sen. Pangilinan

Iginiit ni Bicol Saro Party-list Rep. Terry Ridon sa impeachment case laban kay Vice President Sara Duterte na naghahanda sila para makakuha ng 16 na boto mula sa mga senator-judges upang magkaroon ng conviction.

Ito ay sa gitna ng usapin kung maaari bang baguhin ang kinakailangang bilang ng boto dahil hindi lahat ng 24 senador ay makakalahok sa paglilitis.

Ayon kay Ridon, ang Senado ang magpapasya kung ano ang tamang bilang ng boto na dapat sundin. Gayunman, sinabi niyang nakatuon sila sa pagkuha ng 16 na boto, alinsunod sa itinakda ng Konstitusyon na two-thirds vote para sa conviction.

Dagdag pa niya, naniniwala siyang makukumbinsi ng kanilang mga ebidensiya ang maraming senador-judges na paboran ang conviction ng bise presidente.

Iginiit ng ina ng yumaong basketball player na si Rene Baterbonia na hindi sapat ang paghingi ng paumanhin ni Ateneo men’s basketball coach Tab Baldwin kaugnay ng pagkamatay ng kanyang anak.

Sa isang Facebook post, sinabi ni Rovelyn Baterbonia na ang nais niya ay malaman ang buong katotohanan sa nangyari kay Rene.

Ayon kay Rovelyn, hindi umano siya agad naabisuhan tungkol sa insidente at nalaman pa niya sa social media ang pagkamatay ng kanyang anak.

Kwestiyon din niya kung bakit agad na itinuring na aksidente ang nangyari nang hindi umano naipapaliwanag sa kanilang pamilya ang mga detalye ng insidente.

Noong Biyernes, unang nagsalita si Baldwin tungkol sa trahedya at humingi ng paumanhin sa pamilya nina Rene Baterbonia at Divine Adili, na kapwa nasawi sa insidente

Aminado ang mga Pilipinong kasapi ng Kongregasyong Society of Jesus, o mas kilala bilang mga Heswita, na nakukulang sila sa aksyon ng pamunuan ng Ateneo de Manila University.

Sinabi ito ng mga Heswita habang ipinagluluksa nila ang pagkamatay nina Rene Baterbonia at Divine Adili ng Ateneo Blue Eagles.

Ayon sa pahayag ng mga Pilipinong Heswita, na nilagdaan ng Provincial Superior nito na si Fr. Xavier Olin, personal nilang nakasalamuha sina Baterbonia at Adili, na parehong estudyante ng kanilang Ateneo educational system; kaya’t durog din ang kanilang puso sa pagkasawi ng mga naturang student-athlete.

Bukod anila sa panalangin, dadamayan at susuportahan nila ang mga pamilyang Baterbonia at Adili sa abot ng kanilang makakaya.

Dagdag pa ng mga Heswita, naniniwala sila sa kapasidad ng kanilang mga institusyon at kabaro sa pag-responde sa trahedya: tulad ni Ateneo de Manila President, Fr. Roberto Yap, na nagpatawag ng imbestigasyon; at Ateneo de Davao President, Fr. Karel San Juan, na kaagad umanong nakipag-ugnayan sa pamilya Baterbonia.

Gayunman, nagpapasalamat ang kongregasyon sa mga alumni ng Ateneo na nagpapaalala sa pamunuan ng kanilang paaralan ng mga prinsipyo na itinuturo nito, tulad ng “cura personalis,” o ang pangangalaga sa bawat indibidwal; katotohanan; at pananagutan.

Idinagdag din ni Fr. Olin na personal na rin siyang nakipag-ugnayan sa pamunuan ng Ateneo de Manila upang pag-usapan kung paano nila isasabuhay ang kanilang sinumpaang tungkulin bilang mga espiritwal na anak ni San Ignacio de Loyola. — sa panulat ni Anjo Riñon

Nadiskubre umano ng House Prosecution Panel ang mga bagong ebidensiya laban kay Vice President Sara Duterte kaugnay ng reklamong impeachment na may kinalaman sa umano’y hindi maipaliwanag na yaman at hindi pagdedeklara ng ilang ari-arian sa kanyang Statement of Assets, Liabilities and Net Worth (SALN).

Ayon kay Bicol Saro Party-list Representative Terry Ridon, natuklasan nila ang ilang personal na ari-arian ng Bise Presidente na hindi umano nakasaad sa kanyang mga isinumiteng SALN.

Hindi tinukoy ni Ridon ang eksaktong mga ari-arian ngunit sinabi nitong nakatala ang mga ito sa mga rekord ng ilang tanggapan ng pamahalaan.

Aniya, kabilang sa mga batayan ng alegasyon ng unexplained wealth ang umano’y hindi pagdedeklara ng ilang pag-aari ng Bise Presidente at ng kanyang asawa, kabilang na ang ilang bank accounts at iba pang personal na ari-arian.

Dagdag pa ni Ridon, ang halaga ng mga naturang ari-arian ay maaaring umabot sa milyun-milyong piso at higit umanong mahalaga ang usapin ng hindi paglalagay ng mga ito sa SALN.

Iginiit ni dating Ilocos Sur Governor Luis “Chavit” Singson na hindi siya matitinag ng kanyang pagkakaaresto at ng kinakaharap na kasong cyber libel.

Sa kanyang inilabas na pahayag, sinabi ni Singson na walang kaso o anumang uri ng pampulitikang pressure ang pipigil sa kanya sa paghahanap ng katotohanan at pagtukoy sa umano’y nasa likod ng isyung kanyang inilalantad.

Ayon kay Singson, lalo lamang siyang nagiging determinado habang may mga pagtatangkang patahimikin siya.

Kasunod ito ng kanyang mga panawagan para imbestigahan ang umano’y mga iregularidad sa paggamit ng pondo para sa flood control projects sa bansa.

No arrest, no case, and no amount of political pressure will stop me from pursuing the truth and uncovering who the real mastermind is behind this scandal. The more they try to silence me, the more determined I become. — Singson

Iginiit ni Senador Sherwin Gatchalian na dapat magpatuloy ang trabaho ng Senado sa kabila ng umiiral na sigalot sa liderato ng kapulungan.

Sa kanyang mensahe para sa pagdiriwang ng Araw ng Kalayaan, sinabi ni Gatchalian na sa gitna ng ingay ng pulitika at mga hamon sa mga institusyon ng bansa, mahalagang manaig ang paglilingkod sa sambayanan.

Ayon sa senador, hindi ganap na makukuha ng bansa ang tunay na kalayaan hangga’t maraming Pilipino ang nananatiling bihag ng kahirapan. Dahil dito, nangako siyang isusulong ng Senado ang mga panukalang batas na magbibigay ng dekalidad na edukasyon, maayos na serbisyong pangkalusugan, at marangal na hanapbuhay para sa mamamayan.