NATIONAL NEWS

Naniniwala si Manila Rep. Joel Chua, na panahon na para magkaroon ng master plan na tutugon sa mga nararanasang pagbaha sa Metro Manila at iba pang rehiyon sa bansa.

Para kay Cong. Chua, mas maganda na simulan na ang pag-aaral sa masterplan, at kung mayroon na’y dapat na itong ipatupad upang agad na masolusyunan ang problema sa pagbaha.

Ipinunto rin ng kongresista na hindi pwedeng sa flood control projects lamang isisi ang nararanasang pagbaha sa buong Kamaynilaan lalo’t batay sa isang pag-aaral, pitumpung porsyento ng sanhi ng pagbaha ay bunsod ng mga basura at ang paninirahan ng ilang Pilipino sa danger zone.

Aminado naman ang Manila solon na masyado nang luma ang mga drainage system sa bawat lungsod at hindi lahat ng inilalaang pondo ng gobyerno ay nakatutok sa proyekto ng flood control.

Iginiit ng mambabatas, na maiiwasan ang kinakaharap na suliranin kung magkaroon ng iba pang solusyon; magiging responsible; at magkakaroon ng disiplina sa pagtatapon ng basura.

Tiniyak ng Armed Forces of the Philippines na sapat ang pwersang idineploy sa Bangsamoro Autonomous Region in Muslim Mindanao para bantayan ang seguridad sa kauna-unahang parliamentary election sa Oktubre a-trese.

Ayon kay AFP spokesperson Colonel Francel Margareth Padilla, sakto lamang ang bilang ng mga tauhang itinambay sa rehiyon upang maiwasang magmukhang masyadong “militarized” ang makasaysayang halalan.

Maliban dito, tiniyak din ng tagapagsalita na mayroong mobile quick reaction teams ang militar na pwedeng i-deploy sa mga lugar na magkakaroon ng mga biglaang tensyon sa mismong araw ng eleksyon.

Pinayuhan ni Senador Panfilo Lacson si Batangas 1st District Rep. Leandro Legarda Leviste na mag-ingat matapos ipaaresto si Batangas 1st District Engineer Abelardo Calalo.

Ayon kay Senador Lacson, hindi maitatangging makapangyarihan ang mga kinakalaban at nasasagasaan ni Rep. Leviste, sa gitna ng paglaban nito sa katiwalian.

Dagdag pa ni Sen. Lacson, hindi dapat maliitin at balewalain ni Congressman Leviste ang kayang gawin ng mga masasama o tiwaling tao laban sa kanya.

Kasabay nito, pinuri ni Sen. Lacson ang kongresista at sinabing hindi pangkaraniwan at kahanga-hanga ang ginawa nito.

Suportado ni Public Works and Highways Secretary Manuel Bonoan ang pag-aresto kay Batangas 1st District Engineer Abelardo Calalo.

Ito ay matapos ang sinasabing pag-aalok ni Calalo ng 360 million pesos na suhol kay Batangas 1st District Rep. Leandro Legarda Leviste upang hindi na ipagpatuloy ang imbestigasyon sa mga flood control projects.

Binigyang-diin ni Sec. Bonoan na dapat makulong si Calalo dahil sa inasal nito.

Dagdag pa ng kalihim, hindi niya kinukunsinte ang ganitong klase ng gawain sa mga kawani ng DPWH.

Nabatid na nitong nakaraang araw ay naaresto si Calalo sa isinagawang entrapment operation.

Suportado ng ilang senador ang direktiba ni Pangulong Bongbong Marcos Jr. na ibalik ang dating sistema kung saan humihingi muna ng approval sa local government unit ang mga ahensya ng pamahalaan, partikular ang Department of Public Works and Highways bago ipatupad ang mga proyektong pinondohan ng gobyerno.

Ayon kay Senador JV Ejercito, sang-ayon siya na magkaroon ng papel o partisipasyon ang LGU sa implementasyon ng mga proyekto ng gobyerno para maiwasan anya ang pagkakaroon ng ma-anomalya at ghost flood control projects.

Naniniwala si Senador Ejercito na mas mainam na dumaan sa pag-apruba ang isang proyekto na popondohan ng gobyerno, sa halip na mga district office lang ng DPWH ang nakakaalam.

Iginiit naman ni Senador Erwin Tulfo na tama lang na dumaan sa mga LGU ang ipapatupad na government projects dahil ang mga ito aniya at mga residente ang makikinabang ng mga proyekto.

Kaugnay nito, binigyang-diin ni Sen. Tulfo na dapat pumasa sa quality standard ang mga ipatatayong proyekto.

Naniniwala ang isang constitutional law expert na malabong mabaligtad pa ang desisyon ng Korte Suprema na nagdedeklarang ‘unconstitutional’ sa impeachment case ni Vice President Sara Duterte.

Gayunman, sa panayam ng DWIZ, sinabi ni Atty. Cecilio Duka na kailangan pa ring hintayin ang desisyon ng Supreme Court kaugnay sa mga inihain motion for reconsideration sa nasabing kaso.

Samantala, nilinaw ni Atty. Duka na wala sa mandato ng bise presidente na alamin ang kalagayan ng mga Pilipino sa ibayong dagat.

Malamig naman ang constitutional law expert hinggil sa mga patutsada ni V.P. Sara laban sa kasalukuyang administrasyon.

Ipinanawagan ng isang mambabatas na tigilan na ang pamumulitika, sa gitna ng umiinit na isyu kaugnay sa mga maaanomalyang flood control projects sa bansa.

Sinabi ito ni Ako Bicol party-list representative at dating Legazpi City mayor Alfredo Garbin Jr. sa DWIZ, matapos ibunyag ni Albay governor Noel Rosal, sa panayam din ng himpilan, na mayroong mga isyu sa mga flood control sa kanilang lalawigan, partikular na ang tatlong pumping stations na hindi aniya nag-o-operate sa Legazpi City.

Nilinaw ni Rep. Garbin, natapos ang konstruksyon ng mga naturang pumping station at gumagana ang mga ito, ngunit hindi maayos na na-maintain.

Gayunman, ayon kay Rep. Garbin, na-i-turnover na muli sa Department of Public Works and Highways ang tatlong pumping stations upang pangasiwaan ang pagme-maintain sa mga ito.

 Inanunsyo ng Department of Agriculture na matatapos na sa Disyembre ang mega cold storage facility sa Camarines Sur na nagkakahalaga ng limandaang milyong piso.

Sa oras na matapos ang pasilidad, mapapahusay nito ang food security, makakalikha ng maraming trabaho, at makakadagdag sa kita ng mga magsasaka sa Bicol Region at mga kalapit na lalawigan.

Ayon kay Agriculture Secretary Francisco Tiu Laurel Jr., naaayon sa pananaw ni Pangulong Ferdinand Marcos Jr. ang proyekto na gawing agri-preneur ang mga magsasaka sa bansa.

Magkakaroon ng anim na refrigerated warehouse ang cold storage complex na bawat isa’y kayang mag-imbak ng dalawandaang at dalawampu’t apat na tonelada ng agricultural products.

Kaugnay nito, inaasahan na rin ang pagbubukas ng iba pang cold storage sites sa Taguig City, Cabanatuan City, at sa lalawigan ng Occidental Mindoro at Isabela sa susunod na taon.

—sa panulat ni Mark Terrence Molave