NATIONAL NEWS

 Nilinaw ni bagong Philippine National Police officer in charge Chief Lieutenant General Jose Melencio Nartatez Jr., na hindi hidwaan ang ugat ng pagkakasibak sa pwesto kay dating PNP chief Gen. Nicolas Torre the Third.

Ayon kay LtGen. Nartatez, bahagi ang pagpapalit ng liderato ng pambansang pulisya sa general order na ibinaba ng Malacañang na kinakailangang anyang sundin.

Sinabi ng bagong PNP OIC chief na itinalaga sila sa pwesto sa ilalim ng trust and confidence ng higher authority at maaari silang sibakin anumang oras.

Hindi naman aniya pipilitin si Gen. Torre na magretiro na nang mas maaga o umalis sa serbisyo dahil karapatan niya ito bilang police officer na hindi pa umabot sa kanyang retirement age.

Maaari namang manatili muna, ani PNP OIC Chief Nartatez, sa tanggapan ng PNP chief si Torre ngunit wala na itong kapangyarihang pamunuan ang buong hanay ng pambansang pulisya.

Pinaghahanap ng Metropolitan Manila Development Authority ang magkasintahang nakuhanan ng video habang naglalakad sa gitna ng EDSA malapit sa Buendia station.

Ayon kay MMDA Chair Don Artes, maaaring managot ang dalawa sa kasong jaywalking. Kung menor de edad, ipapasa sila sa pambansang pulisya o sa Department of Social Welfare and Development.

Dagdag ni Chair Artes, walang kapangyarihan ang MMDA na manghuli ng jaywalkers ngunit maaari silang pagmultahin ng 200 hanggang 500 pesos o pagserbisyuhin ng community service sa ilalim ng Anti-Jaywalking Ordinance.

Kasunod nito, nagbabala ang ahensya sa publiko na tumawid lamang sa tamang tawiran upang maiwasan ang aksidente. Plano rin nilang maglagay ng karagdagang harang malapit sa mga istasyon ng pampublikong transportasyon.

Pormal nang inihain sa Kamara nina Cagayan de Oro City Rep. Rufus Rodriguez at Abamin Party-list Rep. Maximo Rodriguez Jr., ang panukalang batas na magpapataw ng mas mabigat na parusa at mas malaking multa sa mga nagpapakalat ng fake news.

Sa ilalim ng House Bill 3799, parurusahan ng anim hanggang labindalawang-taong pagkakakulong ang mga mapapatunayang nagpakalat ng fake news o mga maling impormasyon na may multang aabot sa 500-thousand-pesos hanggang 2-million-pesos.

Papatawan din ng pinakamataas na parusa ang mga gumagamit ng automated o coordinated digital system kabilang ang mga automated computer program, troll, o sock puppet network.

Ikinabahala ng dalawang mambabatas, ang pagkalat ng fake news at disinformation na malaking banta anila sa pambansang seguridad, diplomatic relations ng Pilipinas sa ibang bansa, at tiwala ng publiko.

Para naman maiwasan ang pag-abuso sa panukala ay mayroon ding exception para sa mga satire, parody, at editorial contents kung saan, nasa Regional Trial Courts na ang hurisdiksyon sa mga naturang kaso.

Sakaling maisabatas, bubuo rin ng isang Joint Congressional Oversight Committee ang Kamara na tututok sa pagpapatupad nito.

 Magsasagawa ng tax fraud audit ang Bureau of Internal Revenue laban sa mga kontratistang sangkot sa sinasabing mga maanomalya flood control project na iniimbestigahan ni Pangulong Ferdinand Marcos Junior.

Kasunod ito ng direktiba ni BIR Commissioner Romeo Lumagui Jr. kung saan magsasagawa ang kanilang ahensya ng parallel investigation upang suriin ang tax returns at bayarin ng mga naturang kontratista.

Hindi bibigyan anya ng updated tax clearance ang mga lalabag at awtomatikong madidiskwalipika sila sa susunod na government projects, at sususpindihin din ang final settlement ng kanilang kasalukuyang kontrata.

Batay sa Revenue Regulation No. 17-2024, obligadong magprisinta ng updated tax clearance ang lahat ng contractor bago matapos ang anumang government contract.

Kapag nabigong makakuha nito, isususpinde ang pagbabayad at lalagyan ng tax lien ang halaga ng kontrata.

Kasabay nito, tiniyak ng BIR na papatawan ng deficiency tax assessment ang mga “ghost projects” na mabibigyan ng sertipikasyon mula sa kaukulang ahensiya bilang hindi tunay na naisagawa.

Umalma ang ilang mambabatas sa Kamara matapos ang pagsibak kay PNP Chief Nicolas Torre the Third na anila’y sumasalamin sa internal conflicts sa Marcos administration.

Ayon kay ACT Teachers Partylist Rep. Antonio Tinio, 85-days lang nanatili si Torre bilang hepe ng pambansang pulisya at hindi man lang ikinunsidera ang maganda nitong performance sa Philippine National Police.

Sinabi ni Rep. Tinio, na ang patuloy na rigodon at gulo sa PNP ay nagpapatunay sa lumalalang hidwaan sa Marcos administration.

Anya, maraming mga grupo ang nag-aagawan ng kapangyarihan sa gitna ng malalang korapsyon sa gobyerno, kapos na serbisyong panlipunan, at lumalalang kahirapan ng mamamayan.

Sa panig naman ni Mamamayang Liberal Party-list Rep. Leila de Lima, dapat may katanggap-tanggap na dahilan ang DILG kung bakit inalis si Gen. Torre o kung hindi, malinaw na na-politika lamang ang opisyal.

Kataka-taka naman para kay Akbayan Partylist Rep. Perci Cendaña, kung bakit inalis sa pwesto si Torre gayong ang mga sangkot sa katiwalian ng flood control projects ang dapat na masibak sa kanilang posisyon.

Masusing iimbestigahan ng Bureau of Customs ang nasa apatnapung luxury vehicles ng pamilya ni dating Pasig City mayoral candidate Sarah Discaya.

Ito ang tiniyak ni Customs Commissioner Ariel Nepomuceno sa gitna ng pagkakadawit ng pangalan ng mga Discaya sa maaanomalyang flood control projects.

Giit ni Commissioner Nepomuceno, sisiyasatin ng BOC ang mga consignee sa pag-i-import ng mga nasabing sasakyan upang malaman kung sumunod ito sa panuntunan ng ahensya.

Matatandaang nabunyag ang mga naturang mamahaling sasakyan nang ibinida ng mag-asawang Discaya ang mga ito sa ilang interviews sa kanila bago pa man pumutok ang isyu sa flood control projects.

—Sa panulat ni Anjo Riñon

Mauubos na ang supply ng pulang sibuyas sa Nobyembre a-otso.

Ito’y ayon sa datos ng Bureau of Plant Industry noong Agosto a-kinse, kung saan wala na sa 50-thousand metric tons ang supply ng red onion.

Kinumpirma naman ni Agriculture Secretary Francisco Tiu Laurel Junior na mag-aangkat ang Pilipinas ng pulang sibuyas sa Oktubre upang maiwasan ang pagkaubos ng supply nito, lalo na’t mataas ang demand nito habang papalapit ang Pasko; ngunit hindi niya tinukoy kung gaano karaming metriko-tonelada ang iaangkat.

Samantala, sa taya ng kagawaran, nasa isanlibong metriko-tonelada na lang ang supply ng dilaw na sibuyas, kung kaya’t inaprubahan na rin ni Sec. Laurel ang pag-aangkat ng 25-thousand metric tons ng yellow onion upang hindi maubos ang supply nito.—Sa panulat ni Anjo Riñon

Mariing tinutulan ni Mamamayang Liberal party-list Rep. Leila De Lima ang suhestyon ni Senator Panfilo “Ping” Lacson na i-adopt na lang ang 2026 National Expenditure Program upang maiwasan ang mga sinasabing “insertions” sa pambansang budget.

Ayon kay Rep. De Lima, nauunawaan niya kung saan nanggagaling si Sen. Lacson lalo’t malubha ang korapsyon sa national budget pero hindi maaaring idaan sa eksperimento ang pera ng taumbayan.

Paliwanag ng kongresista, nasa Kamara ang power of the purse at kapag hindi nila sinuri ang panukalang budget ay malinaw na tinalikuran na rin ng mga mambabatas ang mandato ng Konstitusyon.

Naniniwala ang mambabatas, na hindi ito ang tutugon sa problema at maaaring magtakda ng mapanganib na “precedent” kung saan posibleng magamit na dahilan ang hakbang kung may tiwaling pangulo at magiging sunud-sunuran ang dalawang kapulungan.

Para sa lady solon, ang kailangang gawin ay busisiin mabuti ang pambansang pondo; panagutin ang mga sangkot sa maaanomalyang proyekto; at tiyaking mapoprotektahan ang kaban hanggang sa bicameral conference committee level at implementasyon ng government agencies.

—sa panulat ni Jasper Barleta