NATIONAL NEWS

Aminado ang Volunteers Against Crime and Corruption o VACC na nanghinayang at nabigla sila sa pagkakasibak kay General Nicolas Torre the Third bilang PNP chief.

Ayon kay VACC President Arsenio “Boy” Evangelista, malaking kawalan kay Pangulong Ferdinand Marcos Junior si General Torre dahil sa malakas na ‘political will’ at bukod pa sa taglay nitong tapang sa pagpapatupad ng batas.

Nasubukan na rin anya ang sinibak na hepe ng pambansang pulisya pagdating sa paghawak ng malalaking kaso at paglilinis sa hanay ng PNP kaya’t napakalaking hamon para sa susunod na PNP chief na tapatan o higitan ang iniwang marka ni Torre.

Sa kabila nito, kumpiyansa si Evangelista na mapamumunuan ni PNP officer-in-charge, Lt. Gen. Jose Melencio Nartatez Junior nang maayos ang institusyon.

Aprubado na ng Food and Drug Administration ang kauna-unang bakuna laban sa avian influenza o bird flu sa bansa.

Ayon kay Agriculture Secretary Francisco Tiu Laurel Jr., protektado ng bakuna ang mga manok at iba pang ibon laban sa H5N1 bird flu at velogenic Newcastle disease, dalawang malubhang sakit na mabilis kumalat at nagdudulot ng mataas na pagkamatay sa mga alagang hayop.

Maaaring iturok ang bakuna sa dibdib o ilalim ng balat ng mga sisiw na may sampung araw pataas, at inaabot ng hanggang dalawang linggo bago makuha ang ganap na proteksyon.

Kumbinsido si Senate Minority Leader Vicente ‘Tito’ Sotto the Third na dapat isama sa planong shame campaign ng Department of Transportation, ang sasakyan ng mga opisyal ng pamahalaan kung saan ang mga backup cars ay laging lumalabag sa batas trapiko.

Ayon kay Senate Minority Leader Tito Sotto, laging sangkot sa swerving at paniningit o panggigitgit sa ibang sasakyan ang mga backup cars ng mga opisyal ng pamahalaan kaya dapat silang isama sa planong shame campaign.

Sinabi naman ni Senator JV Ejercito na magandang subukan o gawing eksperimento ang planong shame campaign ng Transportation Department laban sa dumaraming pasaway o mga traffic violators.

Para naman kay Senator Erwin Tulfo, ang mga paulit-ulit lang na traffic violator ang isama sa shame campaign.

Sa harap ng pagtaas ng bilang ng mga lumalabag sa traffic rules, at mga nahahainan ng show cause order, balak ng DOTr na isapubliko kada linggo ang listahan ng mga traffic violator na may kaakibat na panawagan na “huwag silang tularan.”

Dala ang isang cake, personal na dineliver ni Torre ang kaniyang regalo sa kongresista.

Matatandaang ni-relieve kahapon sa puwesto si Torre bilang hepe ng Philippine National Police.

Nagpasalamat naman si De Lima sa pagbisita, greetings, at pagdala ng cake ni Torre.

Matatandaang si De Lima ang kauna-unahang bumisita at nagpaabot ng pagbati kay Torre noong itinalaga ito bilang hepe ng PNP walumput limang araw bago masibak sa kaniyang puwesto.

Walang hinanakit at hindi masama ang loob ni dating PNP Chief Gen. Nicolas Torre the Third makaraang sibakin sa kaniyang puwesto bilang hepe ng Philippine National Police

Sa ambush interview sa Kamara, sinabi ni Torre na kaniyang nirerespeto ang naging desisyon na siya’y alisin sa puwesto maging ang opinyon ni dating PNP chief at ngayo’y Senator Panfilo “Ping” Lacson sa kaniyang ginawang hakbang sa PNP.

Sinabi ni Torre na wala siyang pinagsisisihan dahil sa tagal niya sa kaniyang serbisyo, hindi na umano bago ang ganitong uri ng sitwasyon.

Nang matanong naman kung handa siyang tumanggap ng bagong posisyon sa gobyerno, sinabi ni Torre na ayaw niya munang pangunahan ang desisyon at mas makabubuting hintayin na lang ang opisyal na announcement kung may iaalok mang bagong trabaho para sakanya.

Mananatili aniya ang kanyang suporta kay Pangulong Ferdinand Marcos Jr. maging sa buong administrasyon at handa pa rin aniya siyang maglingkod sa gobyerno.

Kinumpirma naman ng opisyal na nakatakda siyang mag-file ng leave of absence pero hindi pa napag-uusapan ang turn-over lalo’t wala pang abiso at 4-star general pa rin naman aniya siya.

Sa kabila nito, handa umanong magbigay ng payo si Torre sa bagong PNP chief na si Lieutenant General Jose Melencio Nartatez na aniya’y mahusay na police officer.

Nilinaw din ni Torre na “in good terms” umano sila ni DILG Secretary Jonvic Remulla.

 Iniimbestigahan ng Department of Agriculture ang sinasabing pananamantala sa presyo ng bawang sa bansa.

Ayon kay Agriculture Secretary Francisco Tiu Laurel Jr., posibleng may cartel sa naturang sangkap sa pagluluto dahil walang garlic industry ang bansa, ngunit ginagawan na ito ng paraan ng kagawaran upang ibaba ang presyo nito sa isandaang piso kada kilo.

Pabor naman ang Davao Consumer Movements sa naturang hakbang, at inirekomenda na rin nila na palakasin ang local production ng bawang sa pamamagitan ng pagbibigay ng suporta sa mga magsasaka upang mapababa ang importasyon at presyo nito.

Pinag-aaralan na rin ng DA Region 11 kung anong klaseng bawang ang pwedeng itanim sa Davao Region.

Batay sa pinakahuling monitoring ng kagawaran, nasa 140 hanggang 170 pesos ang presyo ng kada kilo ng imported bawang sa Metro Manila, at pumapalo naman sa apatnaraang piso kada kilo ang presyo ng lokal na bawang.

Naniniwala si Senador Panfilo Lacson umabuso sa kapangyarihan si General Nicolas Torre the Third dahilan para masibak ito sa pagiging hepe ng Philippine National Police.

Ayon kay Senador Lacson, mag-isang kumilos si Gen. Torre matapos alisin si Police Lt. General Jose Melencio Nartatez Jr. bilang deputy chief for administration o second in command.

Aniya, karaniwang mayroong clearance mula sa tanggapan ng Pangulo o kaya kahit sa ex-officio chairman ng National Police Commission at kalihim ng Department of Interior and Local Government ang pagtatalaga at pagsibak sa miyembro ng PNP command group tulad ng deputy for administration, deputy for operations, at chief directorial staff.

Binigyang-diin ni Sen. Lacson na sa ngayon, mahalagang matiyak ang maayos na transition at paglilipat ng command at authority sa pagitan ni Gen. Torre at Lt. General Nartatez.

Itinanggi ng Presidential Communications Office o PCO na sila ay nagmementina at nagbabayad sa mga tinatawag na “reactors” pati “vloggers.”

Sa budget deliberation ng House Committee on Appropriations, sinabi ni SAGIP Partylist Rep. Paolo Henry Marcoleta na mayroon umanong nagkwento sa kanya na nasa 100 hanggang 200 ang reactors ng PCO para magbigay ng positibong reaksyon o komento sa mga social media post na tungkol sa Marcos Jr. administration.

Maliban dito, nasa 76 vloggers umano ay mine-maintain ng PCO.

Batay din sa impormasyong nakuha ni Marcoleta, nasa P7,000 pa nga ang bayad sa mga reactor kada buwan.

Bilang tugon sinabi ni PCO Acting Sec. Dave Gomez, na walang ganito o hindi nagbabayad ang PCO.

Binigyang-diin ni Gomez na mayroong “organic” at mga totoong tao na sumusuporta kay Pang. Ferdinand Marcos Jr.

Sinabi ni Gomez, na kahit tingnan pa sa budget ng PCO ay walang makikita ang naturang kongresista.