NATIONAL NEWS

 “Pulitika” ang pinaniniwalaang dahilan ng isang political analyst sa biglaan at ‘unceremonious dismissal’ kay dating PNP Chief, General Nicolas Torre III.

Aminado si UST Political Science Professor, Dr. Dennis Coronacion, na bawas “pogi points” para kay Pangulong Bongbong Marcos ang pagsibak kay General Torre lalo’t pamilyar na ang publiko sa mga sinakripisyo nito para sa administrasyon.

Sinang-ayunan naman ng propesor ang teyoryang maaaring maging banta sa mga kakandidato sa 2028 elections ang nakukuhang popularidad ng dating PNP Chief, kaya ito pinatalsik sa pwesto.

Samantala, naniniwala si Coronacion na ang nangyari kay Torre ay kapupulutan ng aral at isang patunay na walang sinuman ang nakatitiyak sa kanilang pwesto sa gobyerno, kahit gaano pa kalaki ang kontribusyong naibibigay nila sa publiko.

Hinimok ni Senador Risa Hontiveros si Pangulong Ferdinand Marcos Jr. na isapubliko ang Statement of Assets, Liabilities and Net Worth o SALN nito.

Ito, ayon kay Sen. Hontiveros, ay upang maipakita ng Pangulo ang pagiging ehemplo matapos ipag-utos ang ‘lifestyle check’ sa mga kawani ng pamahalaan, sa gitna ng imbestigasyon sa flood control projects.

Kasabay nito, sinabi ng senador na handa rin siyang sumailalim sa ‘lifestyle check’ at maglabas ng SALN para mapatunayan ang kanyang pagiging middle class.

Bagama’t ehekutibo lang ang saklaw ng direktiba ng Pangulo, iginiit ng mambabatas na hindi naman masamang magboluntaryong magpa-lifestyle check ang mga senador at kongresista.

Naniniwala si Sen. Hontiveros na makakatulong ang lifestyle check para maibsan ang talamak na katiwalian sa mga proyekto ng pamahalaan.

Aarangkada na sa darating na Martes, Setyembre 2, ang imbestigasyon ng House Infrastructure Committee kaugnay sa mga palpak at maanomalyang flood control projects sa bansa.

Kinumpirma ito ni Bicol Saro Partylist Rep. Terry Ridon, isa sa mga chairman ng House Infra-Comm, sa kabila ng mga panawagan na magkaroon ng independent body para sa patas na imbestigasyon, lalo’t sinasabing may mga kongresista na sangkot sa naturang kontrobersiya.

Ayon kay Rep. Ridon, kasama sa mga inaasahang dadalo sa isasagawang pagdinig ang mga opisyal ng Department of Public Works and Highways, at mga kontratistang binanggit ni Pangulong Ferdinand Marcos Jr. na nakakubra ng malalaking kontrata at proyekto ng gobyerno.

Gayundin ang mga kontratista at mga district engineers ng mga sinasabing “ghost projects” sa Bulacan, at iba pang kinauukulang ahensya ng pamahalaan na magbibigay ng konteksto sa proseso ng mga proyekto, partikular na ang Government Procurement Policy Board, at Philippine Contractors’ Accreditation Board.

Naging pugad o playground ng mga sindikatong kriminal ang Department of Public Works and Highways o DPWH.

Ito, ayon kay Senador Panfilo Lacson, makaraang matanggap ang bagong impormasyon sa mala-mafia na galaw ng mga engineering offices ng DPWH sa iba’t ibang parte ng bansa.

May impormasyon anya na sangkot ang mga DPWH officials sa iba pang maanomalyang flood control projects na hindi kasama sa naisumite ng report kay Pangulong Bongbong Marcos Jr.

Ayon kay Senador Lacson, pati ang Philippine Contractors Accreditation Board ay may kalokohan ding ginagawa.

Dagdag pa ng senador, ang mga “funder” o mga mambabatas na nagsusulong ng insertions para sa mga kwestiyonableng proyektong ito sa budget ay patuloy na lumalakas ang loob dahil walang transparency sa budget process, kaya hindi sila natutukoy bilang responsable.

—Sa panulat ni Daniela De Guzman

 Nagsagawa ang pamahalaan ng mga hakbang upang mapanatiling matatag ang presyo ng bigas at masiguro ang sapat na suplay habang naghahanda ang bansa na ipatupad ang 60-day ban sa rice imports simula sa susunod na buwan.

Ayon kay Palace Press Officer at Undersecretary Claire Castro, magpapatupad ang Department of Agriculture ng mahigpit na price monitoring upang protektahan ang mga consumer mula sa biglang pagtaas ng presyo sa panahon ng import ban.

Sinabi ni Usec. Castro na aktibong nag-uugnayan ang DA at ang mga pangunahing stakeholder, kabilang ang mga magsasaka, miller, at trader, upang mapigilan ang pagmamanipula sa presyo sa rice market.

Tiniyak din ni Castro sa publiko na may sapat na suplay ng bigas, sinabing nagsasagawa ang DA ng weekly monitoring ng buffer stock.

Aniya, maglalabas din ang DA ng 1.2 million bags, o hanggang 100,000 metric tons ng local rice sa pamamagitan ng auction ngayong linggo, kung saan ang floor price ay inaasahang maglalaro sa bente singko pesos hanggang bente otso pesos.

—Sa panulat ni Daniela De Guzman

Ibinahagi ni Baguio City Mayor Benjamin Magalong sa kanyang social media post ang kanilang larawan ni Leyte 4th District Representative Richard Gomez na nagpapahiwatig ng kanilang pagkakabati.

Kasama sa larawan ang mensaheng “Despite the noise and accusations, true friendships remain.”

Matatandaang nagkaroon ng patutsada si Gomez kaugnay sa anomalya ng flood control projects na ginagamit umano ng isang “nagmamalinis na alkalde” upang siraan ang mga mambabatas at pagandahin ang sariling imahe.

Bagaman walang pangalan na binanggit ang kongresista, pinaniniwalaan ni Mayor Magalong na siya ang pinatatamaan ng naturang pahayag.

Ayon kay Mayor Magalong, malinaw sa kanyang pahayag na hindi lahat ng kongresista ay dawit sa katiwalian ng flood control projects at may mga gumagawa pa rin ng tama.

—Sa panulat ni Daniela De Guzman

Umabot na sa apatnara’t isang human skeletal remains ang na-recover ng mga otoridad sa Taal Lake mula July 10 hanggang sa kasalukuyan, sa gitna ng nagpapatuloy na search and retrieval operations sa mga nawawalang sabungero sa Taal Lake.

Ayon sa Department of Justice, ang mga labi ay natagpuan sa loob ng mga sako na nakatali sa mga sandbag na ginawang pabigat.

Itinurn-over na ang mga na-recover na buto sa PNP Forensic Group para sa agarang pagsusuri.

Hanggang ngayon ay nagpapatuloy pa rin ang diving operations sa Taal Lake kung saan nauna nang tumestigo ang whistleblower na si Julie ‘alyas Totoy’ Patidongan na sa lawa umano ipinapon ang labi ng mga missing sabungeros.

Aminado ang Bureau of Customs na hindi basta-basta ang isasagawang pag-inspeksyon sa apatnapung luxury cars ng pamilyang Discaya, na isa sa mga top 15 contractors na nakakakuha ng flood control projects sa gobyerno.

Nilinaw ni Customs Commissioner Ariel Nepomuceno na hindi maaaring basta na lamang pasukin ang bahay ng mga Discaya para inspeksyunin ang mga sasakyan kung walang court order.

Gayunman, maaaring masilip ang mga luxury cars kung sa warehouse naman nakaparada ang mga ito.

Ipinaliwanag ni Nepomuceno na isasagawa ang inspeksyon upang matiyak na nagbayad ng tamang buwis ang pamilyang Discaya sa pag-import ng mga luxury vehicles.