NATIONAL NEWS

 Binigyang-diin ng United States Senate Armed Services Committee ang kahalagahan ng Pilipinas bilang matatag na kaalyado ng Estados Unidos.

Sa isang courtesy call kay Pangulong Ferdinand Marcos Jr. sa Malacañang, sinabi ni Senator Deb Fischer na tinitingnan nila ang Pilipinas hindi lamang bilang kaibigan kundi bilang pantay at matibay na partner.

Kasama ng Pangulo sa pagpupulong sina Executive Secretary Lucas Bersamin, Foreign Affairs Secretary Ma. Theresa Lazaro, Defense Secretary Gilberto Teodoro, Ambassador Jose Manuel “Babe” Romualdez, at National Security Adviser Eduardo Año.

Ang U.S. ang tanging defense treaty ally ng Pilipinas habang patuloy na pinalalakas ang defense at security engagement ng magkabilang panig sa ilalim ng Mutual Defense Treaty, Visiting Forces Agreement, at Enhanced Defense Cooperation Agreement.

—Sa panulat ni Jasper Barleta

Welcome sa Malacañang ang ginagawang pag-expose ng netizens sa marangyang pamumuhay ng mga kamag-anak ng mga kontratista ng flood control projects sa iba’t ibang bahagi ng Pilipinas.

Viral ngayon sa social media ang mga post kaugnay sa vlogs ng anak at kamag-anak ng mga contractor, kung saan tampok ang mga mamahaling bag, kaliwa’t kanang biyahe abroad, at magagarang kotse.

Sa press briefing sa Malacañang, sinabi ni Communications Usec. Claire Castro, na dapat lamang maging bahagi ng laban kontra korapsyon ang taumbayan.

Mainam aniya ito, lalo’t ang publiko ang mas nakakaalam ng nangyayari sa kanilang paligid.

Kaugnay nito, muling nanawagan ang opisyal na isumbong o ipagbigay-alam sa Pangulo ang impormasyong hawak laban sa mga maanumayàng proyekto sa kanilang lugar, na ginamitan ng pera ng mga Pilipino.

—Sa panulat ni Jasper Barleta

Handa si Pangulong Ferdinand Marcos Jr. na sumailalim sa lifestyle check kasabay ng lahat ng opisyal at kawani ng executive department.

Ito ang tiniyak ng Malacañang matapos ipanawagan ng ilang kongresista at senador na isama ang Pangulo sa pagsusuri, kasunod ng kanyang direktiba na isailalim sa lifestyle check ang mga opisyal sa gitna ng imbestigasyon sa maanomalyang flood control projects.

Ayon kay Palace Press Officer Usec. Claire Castro, handa ang Pangulo na ipabulatlat ang kanyang Statement of Assets, Liabilities, and Net Worth o SALN bilang bahagi ng proseso ng lifestyle check.

Una nang sinabi ng Palasyo na pwedeng mag-initiate ang Ombudsman sa pagkasa ng lifestyle check.

At bilang isang independent constitutional body may kapangyarihan sila na magsagawa at magtakda ng mekanismo para sa nasabing imbestigasyon.

—Sa panulat ni Jasper Barleta

Iginiit ni Senador Imee Marcos na matagal na dapat isinailalim sa lifestyle check ang mga nanunungkulan sa pamahalaan.

Ito’y matapos ipag-utos ni Pangulong Ferdinand Marcos Jr. ang lifestyle check sa ilang kawani ng pamahalaan, sa gitna ng imbestigasyon sa maanumalyang flood control projects.

Ayon kay Senador Marcos, nakakagulat ang nilalaman ng social media account ng mga kawani ng pamahalaan kung saan pinagmamalaki aniya ng mga ito ang mga mamahaling sasakyan, at iba pang mga ari-arian.

Binigyang-diin ng senador na dapat manguna silang mga mambabatas sa pagpapa-lifestyle check bilang pagpapakita ng pagiging ehemplo.

Dagdag pa ng mambabatas, dapat masundan ng imbestigasyon at makasuhan ang mga opisyal na hindi maipaliwanag ang yaman.

Muling nilinaw ng Department of Social Welfare and Development sa publiko na walang ‘fixer’ na kailangan para makakuha ng tulong mula sa Assistance to Individuals in Crisis Situation (AICS) program.

 Ayon kay DSWD Crisis Intervention Program Director Edwin Morata, handang umalalay ang mga social worker ng ahensya sa kahit sinumang dumudulog at humihingi ng tulong.

Anya, kailangan lamang dalhin ang mga angkop na requirements at maglaan ng tamang impormasyon.

Giit pa ng opisyal, ang fixer ay hindi makatutulong kundi magdudulot lamang ng dagdag na kalituhan sa publiko.

Samantala, kasabay namang ibinabala ng ahensya ang pagkalat ng fake news online, lalo na sa mga pekeng social media accounts na nag-aalok ng tulong-pinansiyal.

Iminungkahi ni Senate Minority Leader Vicente ‘Tito’ Sotto III na mula sa isang taon ay gawing tatlo hanggang limang taon ang pag-blacklist sa mga tiwaling kontratista.

Kinatigan din ito ni Sen. Panfilo ‘Ping’ Lacson, kung saan iminungkahi ng senador na dapat magtakda rin ng limitasyon sa bilang ng mga govt infrastructure projects na maaaring ibigay sa isang kontratista.

Hinimok din ni Sen. Lacson na silipin ang interlocking directorships ng ilang kontratista, matapos makita na ang mga dokumento ng ilang korporasyon ay may magkakatulad na directors.

Iginiit ng senador na dapat may mas mahigpit na koordinasyon ang mga ahensya ng gobyerno upang labanan ang ganitong uri ng sabwatan.

Dapat aniya ay check and balance sa halip na collusion o sabwatan ang mangyari.

 Iginiit ni Senador Panfilo Lacson na hindi na flood control ang hinahanap ng mga Pilipino kundi ‘greed control’.

Ito’y matapos matuklasan ang malawakang katiwalian sa flood control projects, dahilan para maging palpak, substandard, at ang ilan ay guni-guni lamang.

Sinabi ni Sen. Lacson na sumobra na sa pagkaganid ang mga sangkot sa katiwalian, kung saan wala na aniyang pakialam ang mga ito sa mga posibleng nilang makalaban.

Binigyang-diin ng senador na dapat nang kasuhan ang mga sangkot sa katiwalian sa mga infrastructure projects, partikular sa flood control projects.

Samantala, naniniwala ang mambabatas na bigo ang monitoring system ng Department of Public Works and Highways kaya hindi nabantayan nang maayos ang mga proyektong pang-imprastraktura at nakalusot ang mga ito.

Tinululan naman ni Senador Lacson ang pahayag ni DPWH Sec. Manuel Bonoan na isolated lang ang ghost flood control projects sa Bulacan.

Ipinunto ng senador, mismong si Pang. Ferdinand Marcos Jr. ang nakadiskubre at nagsambulat ng ghost projects sa Bulacan at iba pang mga lugar sa bansa.

Tiniyak ni Bureau of Customs Commissioner Ariel Nepomuceno na tuloy-tuloy ang reporma sa ahensya upang wakasan ang matagal nang isyu ng korapsyon o “kotong” sa loob ng tanggapan.

Sa panayam ng DWIZ, sinabi ni Commissioner Nepomuceno na ipatutupad ng BOC ang “no take policy” at nakatuon ito sa automation ng mga proseso upang mabawasan ang personal na pakikipagtransaksyon ng mga importer sa mga kawani ng ahensya.

Bukod dito, plano ring palakasin ang paggamit ng smart CCTVs at palitan ang mga luma nang x-ray machines upang mas epektibong mabantayan ang mga kargamento at maiwasan ang smuggling.

Aminado ang opisyal na hindi agad-agad mawawala ang problema dahil dekada na itong naka-ugat sa BOC, ngunit tiniyak niyang sisimulan ang pagbabago sa pamamagitan ng modernisasyon at mas mahigpit na sistema ng pagbabantay.

 Mariing tinuligsa ng Samahang Industriya ng Agrikultura o SINAG ang matinding pagkaantala sa pamamahagi ng fertilizer subsidy na nakalaan para sa mga magsasaka sa Ilocos Region at Cagayan Valley.

Sa panayam sa DWIZ, iginiit ni SINAG chairman Engr. Rosendo “Ka Sendong” So na hanggang ngayon ay hindi pa natatanggap ng mga benepisyaryo ang mahigit 340-thousand bags ng fertilizer na dapat naipamahagi na noong Hunyo.

Dagdag pa ng tagapangulo ng agri-group, malaking hamon ito para sa mga magsasaka lalo na’t sumadsad sa dose-pesos kada kilo ang presyo ng palay ngayong taon, taliwas sa dating sistema kung saan mabilis na nakukuha ng mga magsasaka ang kanilang abono sa mga accredited dealers sa kani-kanilang bayan.

Samantala, iginiit din ni SINAG chairman So na posibleng magmukhang “ghost project” ang subsidy program kung hindi agad maigugulong ang distribusyon.

Walang nakikitang dahilan ang Malacañang para sabihing ‘messy transition’ ang nangyaring pagsasalin sa bagong pamumuno ng Philippine National Police.

Ito ang binigyang-diin ni Palace Press Officer Atty. Claire Castro kasunod ng pag-upo ng bagong pamunuan ng PNP sa katauhan ni Lt. Gen. Jose Melencio Nartatez.

Anya, nagkausap naman sina Pangulong Ferdinand Marcos Jr. at dating PNP Chief Gen. Nicolas Torre III at nirerespeto aniya ng dating hepe ang naging desisyon ng pangulo.