NATIONAL NEWS

Maraming red flags na nakita ang Senate Committee on Finance sa National Expenditure Program para sa national budget sa taong 2026.

Ito, ayon kay Senador Sherwin Gatchalian, ay matapos ang kanilang naging inisyal na pagsusuri sa N-E-P.

Anya, malabo ang inirekomenda ni Senador Lacson na i-adopt o ipasa ang buong National Expenditure Program dahil maaaring magtuloy-tuloy lang ang korapsyon na nagaganap partikular sa flood control projects ng DPWH.

Binigyang-diin ni Senador Gatchalian na hindi niya papayagang maulit ang garapalang katiwalian na nangyari sa 2025 budget at tiniyak na tuloy-tuloy ang kanilang imbestigasyon ukol dito.

Mahirap ngunit tama ang naging desisyon at pagpili ni Pangulong Ferdinand Marcos Junior kay Transportation Secretary Vince Dizon bilang bagong kalihim ng Department of Public Works and Highways.

Ito ang inihayag ni Senador Panfilo Lacson makarang igiit na matagal na niyang nasusubaybayan ang walang kapagurang pagtatrabaho ni Sec. Dizon, lalo na sa pagtugon sa mga suliraning kinakaharap ng sektor ng transportasyon.

Hangad ni Sen. Lacson ang mabuting kalusugan ng bagong D-P-W-H secretary upang mahusay niyang magampanan ang mabigat na responsibilidad sa naturang kagawaran.

Samantala, tiwala naman si Senador Sherwin Gatchalian na maisasakatuparan ni Sec. Dizon ang kanyang tungkulin nang walang bahid ng katiwalian.

Ayon kay Sen. Gatchalian, isang mahusay na desisyon ang pagpili sa naturang kalihim na kilala bilang isang “action man” at may integridad sa pamumuno.

Binigyang-diin din ni Sen. Gatchalian na pangunahing dapat tutukan ni Sec. Dizon ang pagpapanagot sa mga tiwaling opisyal at kontratista.

Ang pagpapanagot aniya sa mga sangkot sa korapsyon ang magbabalik ng tiwala ng publiko sa DPWH.

Target ng Department of Energy na makapagtayo ng humigit-kumulang pitong libong charging stations para sa mga electric vehicle sa buong bansa, kasabay ng patuloy na pagdami ng gumagamit ng naturang uri ng sasakyan.

Ayon sa DOE, umabot na sa 1,100 ang naitatayong charging stations sa ngayon. Bahagi ito ng hakbang ng pamahalaan na hikayatin ang paggamit ng e-vehicles na mas matipid at mas makabubuti sa kalikasan.

Sa ilalim ng Charging Infrastructure Development Plan, bumuo ang Energy Department ng komprehensibong road map para sa EV industry.

Nakapaloob dito ang opsyon para sa mga charging station providers na magtayo ng renewable energy facilities upang magsilbing pinagkukunan ng kuryente.

Layon ng DOE na pagsapit ng 2032, 25 percent ng charging stations ay gumagamit na ng renewable energy, at maging 100 percent naman pagdating ng 2040.

—Sa panulat ni Jasper Barleta

Iginiit ni dating Commission on Audit Commissioner Heidi Mendoza na hindi naging epektibo ang mga naunang isinagawang lifestyle check ng nakaraang administrasyon dahil karamihan sa mga kasong inihain laban sa mga opisyal ay nauuwi lamang sa pagkaka-dismiss.

Paliwanag ni Mendoza, bagaman nakakapagpaghain ng kaso batay sa hindi maipaliwanag na paglobo ng yaman kumpara sa kanilang Statements of Assets, Liabilities, and Net Worth o SALN, kadalasan ay nababasura ang mga ito dahil sa probisyon na nagpapahintulot sa mga opisyal na itama o baguhin ang kanilang SALN nang isang beses.

Kaugnay nito, inirekomenda ng dating COA Commissioner na bago ipatupad ang panibagong malawakang lifestyle checking, dapat munang bumuo ng malinaw na istruktura kung paano ito isasagawa, sino ang mangangasiwa, at ano ang magiging kapangyarihan ng bubuo ng lupon.

Dagdag pa rito, dapat aniyang maging bukas at masusing mapag-aralan ang mga dokumentong isusumite upang matiyak na mapapanagot ang mga opisyal ng gobyerno na mapapatunayang lumagpas sa kanilang tamang kinikita mula sa serbisyo publiko.

—Sa panulat ni Jasper Barleta

Tiniyak ni Senador Sherwin Gatchalian na may mananagot at makukulong kaugnay ng mga ghost projects matapos ipatupad ang lifestyle check sa mga government contractors at opisyal na konektado sa flood control projects ng bansa.

Kasabay nito, binigyang-diin ng senador ang posibilidad na kumuha ng independent technical experts para magsagawa ng masusing imbestigasyon sa 270-bilyong-pisong halaga ng flood control projects.

Isinusulong din ng senador ang panukalang pagbawal sa mga kumpanyang dating pag-aari ng mga politiko na humawak ng mga proyektong imprastraktura ng gobyerno.

Kadalasan aniya, nagdi-divest ang mga politiko sa kanilang negosyo ngunit nananatiling pinapatakbo ng kanilang mga anak o kaanak, dahilan upang magpatuloy pa rin ang impluwensya sa pagkuha ng mga proyekto.

—Sa panulat ni Jasper Barleta

Kinuwestiyon ni Senador Francis “Kiko” Pangilinan ang pananatili sa pwesto ni Public Works and Highways Secretary Manuel Bonoan sa gitna ng kontrobersiya kaugnay ng umano’y trilyong pisong halaga ng flood control ghost projects.

Ayon kay Sen. Pangilinan, hindi maikakaila ang bigat ng alegasyon laban sa ahensya ngunit nananatili pa rin sa pwesto ang kalihim; hindi rin aniya maaaring isantabi ang posibilidad na may kinalaman si Bonoan sa sinasabing katiwalian.

Dahil dito, nanawagan ang senador sa pagbuo ng isang independent commission na magsisiyasat sa maanomalyang flood control projects.

Iminungkahi niyang pamunuan ito ng mga personalidad na may mataas na kredibilidad gaya nina dating Ombudsman Conchita Carpio-Morales, dating DPWH Secretary Rogelio Singson, at Baguio City Mayor Benjamin Magalong.

Kasabay nito, binigyang-diin din ng senador ang kahalagahan ng transparency at tamang paggamit ng pondo ng bayan upang matiyak na napoprotektahan ang mga komunidad laban sa pagbaha.

—Sa panulat ni Jasper Barleta

Tiniyak ni Senador Sherwin Gatchalian na may mananagot at makukulong kaugnay ng mga ghost projects matapos ipatupad ang lifestyle check sa mga government contractors at opisyal na konektado sa flood control projects ng bansa.

Kasabay nito, binigyang-diin ng senador ang posibilidad na kumuha ng independent technical experts para magsagawa ng masusing imbestigasyon sa 270-bilyong-pisong halaga ng flood control projects.

Isinusulong din ng senador ang panukalang pagbawal sa mga kumpanyang dating pag-aari ng mga politiko na humawak ng mga proyektong imprastraktura ng gobyerno.

Kadalasan aniya, nagdi-divest ang mga politiko sa kanilang negosyo ngunit nananatiling pinapatakbo ng kanilang mga anak o kaanak, dahilan upang magpatuloy pa rin ang impluwensya sa pagkuha ng mga proyekto.

—Sa panulat ni Jasper Barleta

Binigyang-diin ng United States Senate Armed Services Committee ang kahalagahan ng Pilipinas bilang matatag na kaalyado ng Estados Unidos.

Sa isang courtesy call kay Pangulong Ferdinand Marcos Jr. sa Malacañang, sinabi ni Senator Deb Fischer na tinitingnan nila ang Pilipinas hindi lamang bilang kaibigan kundi bilang pantay at matibay na partner.

Kasama ng Pangulo sa pagpupulong sina Executive Secretary Lucas Bersamin, Foreign Affairs Secretary Ma. Theresa Lazaro, Defense Secretary Gilberto Teodoro, Ambassador Jose Manuel “Babe” Romualdez, at National Security Adviser Eduardo Año.

Ang U.S. ang tanging defense treaty ally ng Pilipinas habang patuloy na pinalalakas ang defense at security engagement ng magkabilang panig sa ilalim ng Mutual Defense Treaty, Visiting Forces Agreement, at Enhanced Defense Cooperation Agreement.

—Sa panulat ni Jasper Barleta