NATIONAL NEWS

Pinayuhan ni Kontra-Daya Convenor at Professor Danilo Arao si Leyte 4th District Rep. Richard Gomez na mag-public apology matapos nitong akusahan ang ilang media outlets na nasa likod ng media spin laban sa kanya at kaladkarin sa isyu ng flood control projects.

Ayon kay Professor Arao, dapat malaman ni Rep. Gomez ang trabaho ng mga mamamahayag at dapat itong sumailalim sa media literacy training.

Sumasalamin aniya ang ginawa ng mambabatas sa kagustuhan ng ilang makapangyarihan na kontrolin at manipulahin ang kalayaan sa pamamahayag.

Kaugnay nito, nilinaw ni Prof. Arao na normal lamang sa mga news media organizations ang pagsasagawa ng news gathering at pagkakaroon ng pare-parehong paksa, taliwas sa akusasyon ng kongresista na nagsasabwatan ang mga ito para siraan siya.

Hugas-kamay si dating DPWH District Engineer Henry Alcantara sa mga sinasabing ghost flood control projects sa lalawigan ng Bulacan na nagkakahalaga ng 7.2 bilyong piso.

Ayon kay Engr. Alcantara, paulit-ulit niyang pinasuri sa kanyang mga tauhan ang mga proyekto sa kanilang nasasakupan at bandang huli ay nagsumbong umano siya kay dating DPWH Secretary Manny Bonoan na posibleng may kalokohan sa mga proyekto.

Sinita naman ni Senador Rodante Marcoleta ang dalawang proyekto sa Baliwag at Bulakan, Bulacan na lumilitaw na guni-guni o ghost projects.

Sinabi ni Senador Marcoleta na sa kanilang pagsusuri, aabot sa limampu ang ghost projects na imposible umanong hindi alam ng district engineer.

Nabatid na naging usap-usapan kamakailan sa social media ang ugnayan nina Senador Joel Villanueva at ang kontrobersyal na district engineer na si Henry Alcantara dahil sa paglutang ng ilang larawan na magkasama sila.

Tinawag ni Vice President Sara Duterte na “too little, too late” ang imbestigasyon ng Senado sa flood control projects.

Ito ang binigyang-diin ng Bise Presidente dahil matagal nang alam ng pamahalaan ang problema sa katiwalian sa flood control projects.

Ayon kay Vice President Duterte, hindi lamang sa kasalukuyang administrasyon umiiral ang isyu kundi sa mga nagdaang pamahalaan pa.

Pinagdudahan din ng ikalawang pangulo ang biglaang malawakang imbestigasyon na aniya’y maaaring may ibang motibong nakatago.

Muling isinulong ni Senador Win Gatchalian sa Senado ang pagbabawal sa paggamit ng mga smartphone sa silid-aralan para sa mga pampubliko at pribadong paaralan sa bansa.

Unang inihain ni Gatchalian ang Electronic Gadget-Free Schools Act noong nakaraang 19th Congress.

Muli niyang inihain ang panukalang batas ngayong 20th Congress. Sa ilalim ng naturang panukala, saklaw ng isinusulong na ban ang mga guro at mag-aaral mula kindergarten hanggang senior high school.

Ngunit may mga exceptions na nakasaad sa panukalang batas: kapag kailangang gamitin ito sa classroom presentations, kung may kinalaman sa kalusugan kagaya ng mga kondisyong nangangailangan ng electronic gadgets, at kung kinakailangang tiyakin ang kaligtasan ng mga mag-aaral o mga emergency situation.

—Sa panulat ni Jem Arguel

Ipatatawag ng House Committee on Human Rights ang gambling tycoon na si Atong Ang at ang aktres na si Gretchen Barretto para dumalo sa imbestigasyon kaugnay ng kaso ng mga nawawalang sabungero.

Ayon kay Manila 6th District Rep. Bienvenido “Benny” Abante Jr., ipatatawag din pati ang magkapatid na Patidongan na sina Julie at Elakim kasama ang labing walong pulis na sinasabing sangkot sa kaso.

Gayunman, kinumpirma ni Justice Secretary Crispin Remulla na may nakabinbin nang immigration lookout bulletin order laban kina Ang, Barretto, at iba pang akusado sa kaso ng mga nawawalang sabungero.

—Sa panulat ni Jem Arguel

Bukas si Pangulong Ferdinand Marcos Jr. na tumanggap ng mga suhestyon mula sa pamilya Duterte kaugnay sa pagtugon sa isyu ng pagbaha sa bansa.

Ito, ayon kay Presidential Communications Undersecretary Claire Castro, ay matapos patutsadahan ni Acting Davao City Mayor Baste Duterte si Pangulong Marcos hinggil sa maanomalyang flood control projects.

Ayon kay Usec. Castro, patuloy si Pangulong Marcos sa pagresolba sa nasabing isyu at iginiit na hindi makatulong ang mga pasaring na wala namang kaakibat na suhestyon.

Dagdag pa ng Palace official, mas makatulong ang mga Duterte kung ipaliliwanag ng mga ito ang mahigit labingtatlong libong flood control projects noong administrasyon ni dating Pangulong Rodrigo Duterte para malaman ng publiko kung nag-ooperate ba ang mga ito.

Nabatid na ipinag-utos ni Pangulong Ferdinand Marcos Jr. sa kanyang ika-apat na State of the Nation Address ang masusing imbestigasyon kaugnay sa mga flood control project sa bansa.

Naniniwala si Bukluran ng Manggagawang Pilipino president, Atty. Luke Espiritu, na kailangan aralin ng Korte Suprema ang inihain ng Kamara na motion for reconsideration kaugnay sa impeachment case ni Vice President Sara Duterte.

Ito’y matapos magkaroon ng mga sinasabing butas sa pinagbasehang ebidensya ng Supreme Court para sa desisyon nito sa naturang kaso bilang “unconstitutional.”

Kaugnay nito, umaasa si Atty. Espiritu na posible pang baguhin ng Korte Suprema ang kanilang pasya kahit pa inabot ito ng 13-0 vote.

Binigyang-diin ng abogado na ang Kataas-taasang Hukuman ay may kakayahang magsagawa ng self-correction, at may mga pagkakataon na binabago nila ang kanilang mga ruling batay sa mas tamang paghihimay sa mga ebidensya.