Hinimok ng isang eksperto ang publiko na magpa-booster shot at huwag maging kampante sa naunang dalawang bakuna.
Sa panayam ng DWIZ, sinabi ni Dr. Nina Gloriani, Vaccine Expert Panel Chair na hindi makakasiguro ang publiko na ligtas ang mga ito sa banta ng COVID-19 o kung sakaling mild man ang makuha nilang sakit.
Posible naman na magkaroon ng pangatlong booster shot ayon kay Gloriani dahil sa mga nag-eemerge na bagong variant ng nakakahawang sakit. - sa panulat ni Hannah Oledan
Nailabas na ang isa punto apat na bilyong budget na pondo para sa pinalawig na libreng sakay sa Edsa busway, ayon sa Department of Budget and Management (DBM).
Matatandaang inanunsyo ni Pangulong Ferdinand Marcos Jr. na palawigin pa ang libreng sakay para sa Edsa Busway System hanggang Disyembre a-31 para masuportahan ang mobility requirements ng mga estudyante at mga manggagawa.
Sinabi naman ng DBM na nailabas na ang Special Allotment Release Order (SARO) noong Agosto a-nuwebe.
Ayon naman kay Budget Secretary Amenah Pangandaman, ang paglalagak ng pondo ay bilang suporta sa hangarin ng pangulo na mapalawig ang Libreng Sakay Program ng Department of Transportation (DOTR) at ng Land Transportation Franchising Regulatory Board (LTFRB).
Dagdag pa ni Pangandaman, malaking ginhawa ang libreng sakay sa mga commuter lalo na sa mga estudyante at manggagawa.
Aabot naman sa 50 milyong riders ang makikinabang sa naturang programa na magsisimula sa Setyembre a-uno hanggang Disyembre a-trenta’y uno. -sa panulat ni Hannah Oledan
Dodoble ang singil ng ilang school services sa bansa sa darating na pasukan.
Ito’y matapos ang sunod-sunod na pagtaas sa presyo ng mga produktong petrolyo sa bansa bunsod ng sigalot sa pagitan ng Ukraine at Russia.
Ayon kay Celso Dela Paz, Pangulo ng National Alliance of School Service Association, nagsagawa na sila ng pagpupulong kasama ang Parent-Teacher Association (PTA) at nagkasundo na gawing tatlong libong piso ang singil mula sa dating dalawang libong piso.
Saad ni Dela Paz, na handa na ang kanilang grupo para sa pagbubukas ng klase sa Agosto a-22. – sa panulat ni Hannah Oledan
Muling pinagana ng Department of Education ang Public Assistance Command Center (PACC) upang tugunan ang mga concerns kaugnay sa pagbubukas ng School Year 2022-2023.
Pormal na nagsimula ang operasyon nito kahapon sa Central Office sa Pasig City, kasabay ng paglulunsad sa 2022 “Oplan Balik Eskwela.”
Ayon kay DepEd undersecretary for Governance and Field Operations Revsee Escobedo, sasagutin ng PACC ang mga concerns, complaints, at requests ng mga education stakeholders na may kinalaman sa enrollment at iba pang school opening preparations.
Maaaring tumawag ang publiko sa PACC contact numbers na; (02) 8636-1663, (02) 8633-1942, (02) 8638-7529, (02) 8638-7530, (02) 8638-7531, (02) 8635-9817, (02) 8634-0222, at (02) 8638-8641.
Pwede rin sa kanilang mobile numbers na 09194560027 at 0995921846; sa email, depedactioncenter@deped.gov.ph, at official facebook page ng DepEd.
Sinabi pa ng DepEd na maglalagay rin ng sariling command center ang kanilang mga Regional at Schools Division Offices.
Aprubadong resignation letter ng dalawang matataas na opisyal ng SRA na dawit sa sugar importation mess, inilabas ng Office of the Executive Secretary
Tinanggap na ni Execurive secretary Victor Rodriguez ang pagbibitiw sa pwesto nina Sugar Regulatory Administration Board Member Millers Representative Atty. Rolando beltran at SRA Administrator Hermenigildo Serafica.
Nilagdaan at inaprubahan kahapon, August 15, 2022, ni Rodriguez ang inihaing resignation letter ng dalawang nagbitiw na SRA officials.
Ayon sa Kalihim, effective immediately ang kautusan para sa tuluyang pag-alis sa pwesto nina Serafica at Beltran, na pawang dawit sa iligal na paglalabas ng resolusyon para sa pag-aangkat sana ng nasa 300,000 metric tons na asukal.
Kinumpirma naman ni Press Sec. Trixie Cruz Angeles ang pag-apruba ng Office of the Executive Secretary sa pagbibitiw sa pwesto ng dalawang opisyal ng SRA.—mula sa ulat ni Jopel Pelenio (Patrol 17)
Iginiit ni Senador Grace Poe ang paggamit ng buong puwersa ng batas para panagutin ang sugar hoarders na nagpapalutang ng artificial shortage ng supply nito para maitaas ang presyo at muling umangkat ng asukal.
Sinabi ni Poe na mayroong artificial shortage dahil tambak ang supply ng asukal sa mga bodega na ayaw ilabas ng mga nagsasamantala.
Tiyak aniyang may permit mula sa Sugar Regulatory Administration (SRA) ang mga may ari ng warehouses na kailangang matukoy at posibleng bahagi ng sindikato kaya’t dapat managot. —sa ulat ni Cely Ortega-Bueno (Patrol 19)
Naghain na ng petisyon sa Supreme Court ang ilang transport group upang pigilan ang pagpapatupad ng kontrobersyal na No-Contact Apprehension Policy (NCAP) sa ilang lungsod sa Metro Manila.
Ang mga Petitioner ay binubuo ng Kilusan sa Pagbabago ng Industriya ng Transportasyon (KAPIT), Pasang-Masda, ALTODAP at ACTO.
Ayon kay Atty. Vigor Mendoza, Lead Counsel at National Chairman ng KAPIT, layunin ng Petition for Certiorari na ideklarang unconstitutional ang NCAP.
Inihirit din ni Mendoza at ng mga nabanggit na grupo na maglabas ng Temporary Restraining Order o Cease and Desist Order.
Sa kanilang petisyon, ipinunto nina Mendoza na walang ligal na batayan ang NCAP dahil hindi naman ito nakasaad sa RA 7924 na nagsisilbing enabling charter ng MMDA at RA 4136 na lumikha sa LTO.
Suportado naman ng transport groups ang panawagan ni LTO chief Teofilo Guadiz na suspendihin ng mga Local Government Unit ang pagpapatupad ng NCAP at resolbahin muna ang ilang issue, partikular ang penalties sa registered owners ng private at public utility vehicles.
Iginiit ni Mendoza na bagaman nagpatupad ng mga ordinansa ang mga LGU bilang suporta sa resolusyon, invalid pa rin ito dahil wala namang batas na ipinasa ang kongreso na nagpapahintulot sa implementasyon ng No-Contact Apprehension.
Tangi anyang nakasaad sa RA 4136 ay pinapayagan ang face-to-face apprehension at ang traffic violations ay pananagutan ng mga nahuhuling driver at hindi ng registered owners.
Samantala, ipinaliwanag ni Mendoza na mas pinili nilang idiretso sa SC ang petisyon sa halip na sa mga Lower Court muna dahil Korte Suprema rin naman ang reresolba ng lahat ng legal issues.
Isinusulong ni Senador Sherwin Gatchalian ang inclusive growth at social protection para mai-angat ang buhay ng mga Pilipino mula sa kahirapan.
Sa gitna na rin ito ng report na dumami ang mga mahihirap na Pinoy na nasa halos 20 milyon noong 2021 muila sa mahigit 17 milyon noong 2018.
Sinabi ni Gatchalian na isa sa pinaka epektibong paraan para masugpo ang kahirapan ay pagtatatag ng ekonomiyang makapagbibigay ng mas maraming trabaho at makapagpapataas ng productivity.
Ang panukala ni Gatchalian na One Town, One Product Philippines Act ay naglalayong tumulong sa mga MSMEs na makabangon mula sa dagok ng pandemya. —sa ulat ni Cely Ortega-Bueno (Patrol 19)
Hahanapan ng Department of Education (DepEd) ng bagong paaralan ang mga estudyante nang magsasarang Colegio De San Lorenzo sa Quezon City.
Ayon ito kay Atty. Michael Poa, Spokesperson ng DepEd bagamat hindi nag abiso sa kanila ang nasabing eskuwelahan sa pagsasara nito.
Sinabi ni Poa na pipilitin nilang makakita ng mga eskuwelahang tatanggap sa mga estudyante ng Colegio De San Lorenzo kahit isang linggo na lamang ay simula na nang pasukan subalit may isang private school nang nag commit na i-a-absorb ang mga grades 11 at 12 na pareho rin ng matrikula ng San Lorenzo.
Nanawagan si Poa sa Colegio De San Lorenzo na kaagad ayusin ang paglilipat ng records ng mga estudyante at i-refund ang matrikula ng mga nakapag enrol na ngayong pasukan.
Tiwala ang Bangko Sentral ng Pilipinas (BSP) na ikakasa rin ng iba pang local government unit ang Paleng-QR PH.
Kasunod na rin ito nang paglulunsad sa Baguio City ng cashless payments sa mga transaksyon hindi lamang sa mga palengke kundi maging sa sidewalk vendors at tricycle drivers.
Sinabi ni BSP Governor Felipe Medalla na malaking tulong amg cashless payments na tinangkilik ng marami lalo na noong COVID-19 lockdown.
Inanunsyo ng Pamunuan ng Colegio de San Lorenzo sa Quezon City na tuluyan na itong magsasara.
Ito anila ang napagdesisyunan ng kanilang Board of Trustees, dahil na rin sa “Financial Instability” at “Lack of Economic Viability” na dulot ng COVID-19 pandemic.
Bukod pa ito sa mababang bilang ng enrollees.
Tiniyak naman ng eskuwelahan na kanilang ibabalik ang mga fees na binayaran ng mga mag-aaral na nag-enroll para sa School Year 2022-2023.
Tutulungan din ng institusyon ang mga estudyante sa pag-transfer sa ibang paaralan sa pamamagitan ng pag-release ng kanilang records at credentials.