NATIONAL NEWS

Improving weather condition o maaliwalas na panahon ang inaasahan ng PAGASA sa bahagi ng Luzon lalo na sa umaga hanggang tanghali.

Ayon kay PAGASA weather specialist Ana Clauren, posibleng magkaroon ng pag-ulan sa Luzon partikular na sa Metro Manila pagsapit ng hapon hanggang sa gabi bunsod parin ng localized thunderstorm.

Magiging maaliwalas naman ang panahon sa Kalayaan Island kayat asahan ang mainit na temperatura na mararanasan na posibleng umabot sa 33°C.

Wala namang nakikitang weather system o bagyo ang PAGASA na posibleng makaapekto sa Visayas at Mindanao kayat asahan ang maghapong maaliwalas na panahon pero magiging mainit sa tanghali at posible namang ulanin pagsapit ng hapon hanggang sa gabi.

Agwat ng temperatura sa Metro Manila ay maglalaro sa 24°C hanggang 32°C habang sisikat naman ang haring araw mamayang 5:42 ng umaga at lulubog naman ito mamayang 6:18 ng hapon.

Pinaalalahanan ng Department of Health (DOH) ang publiko kaugnay sa sakit na maaaring makakuha tuwing tag-ulan, partikular ang leptospirosis.

Ayon kay DOH Officer-in-Charge Maria Rosario Vergeire, ang leptospirosis ay isang bacterial infection na nakukuha mula sa mga hayop.

Ang bacteria aniya ay madaling kumalat sa tubig baha at makahawa sa mga sugat o mga sugat sa balat.

Kaugnay nito, sinabi ni vergeire na mahalagang paanatilihing malinis ang kapaligiran at iwasan ang paglusong maglaro, o lumangoy sa tubig-baha, lalo na kung may sugat.

Sakali namang makaranas ng sintomas ng leptospirosis, gaya ng lagnat, pananakit ng ulo at kalamnan, paninilaw ng balat at mata, pinayuhan ng opisyal ang publiko na agad na humingi ng tulong medikal.

Posibleng maging available na sa Oktubre ang mga bagong henerasyon ng COVID-19 vaccines na nilikha upang labanan ang mga bagong sub-variants ng COVID-19.

Ayon kay Vaccine Expert Panel Chair Dr. Nina Gloriani, na sa ngayon ay ang mRNA vaccines, gaya ng Pfizer at Moderna ang madaling mapalitan ang komposisyon o ma-synthesize.

Nangangahulugan ito na posibleng sabay na maging available ang mga bakunang ito mula sa Estados Unidos sa Oktubre.

Ngunit ayon kay Gloriani, matatagalan pa bago makakuha ng new generation vaccine ang Pilipinas dahil kinanakailangan ng Emergency Use Authorization (EUA) application. – sa ulat ni Jopel Pelenio

Susunod ang Commission on Election (COMELEC) sa mandato ng kongreso na ipagpaliban ang barangay and Sangguniang Kabataan Elections (BSKE).

 Ayon kay COMELEC Chairman George Erwin Garcia, kinikilala ng poll body ang kapangyarihan ng kongreso na ipagpaliban ang halalan at palawigin ang termino ng mga opisyal ng Barangay at Sangguniang Kabataan.

 Nabatid na ang pahayag ay ipinarating sa pulong ng organisasyon ng House of Representatives Committee on Suffrage and Electoral Reforms (CSER) sa pamumuno ni Mountain Province Lone District Representative Maximo Dalog, Jr.

 Samantala, hiniling ni Garcia sa mga miyembro ng CSER na kumilos nang mabilis sa paggawa ng batas kung ipagpapaliban ang BSKE o hindi.

Inaprubahan kanina ng House Committee on Suffrage and Electoral Reforms ang panukalang ipagpaliban ang December 5, 2022 Barangay at Sangguniang Kabataan (SK) elections.

Nakakuha ng 12 boto ang naturang panukala kung saan dalawa naman ang tutol mula sa 29 na miyembro ng komite.

Bunsod nito ay inaprubahan ng komite na isagawa sa unang Lunes ng December 2023 ang nasabing eleksyon. – sa ulat ni Tina Nolasco (Patrol 11)

Inanunsiyo ng OCTA Research na bumaba sa 16.1% ang COVID-19 positivity rate sa Metro Manila.

Matatandaan na noong nakaraang linggo, ang rate na naitala ay 17.3%, kung saan mapapansin na pababa ang trend, subalit nangangamba si OCTA Fellow Dr. Guido David na ang risk sa rehiyon ay moderate pa rin, at iginiit na “the wave is not yet over.”

Bukod sa positivity rate, sinabi rin ni David na ang one-week growth rate ng mga kaso sa Metro Manila ay bumaba sa -7%.

Samantala, bumaba rin ang reproduction number sa 1.13 hanggang nitong Agosto a-12, mula sa 1.19 noong Agosto a-5.

Inihayag ng Department of Health (DOH) na nasa Department of Education (DEPED) na ang pagpapasya kung papayagang pumasok sa face-to-face classes ang mga titser na hindi pa bakunado laban sa COVID-19.

Ayon kay Health Officer-in-Charge Maria Rosario Vergeire, walang protocol ang nagsasabi na hindi pupuwedeng papasukin ang mga unvaccinated school personnel.

Sa kabila nito, hinikayat niya ang mga tauhan ng eskuwelahan na makikipagsalamuha sa mga kabataan na magpabakuna.

Mababatid na magsisimula na ang pasukan para sa school year 2022-2023 sa August 22 at inaasahang magtatapos naman sa July 7, 2023.

Pinaalala sa publiko ng Department of Education (DEPED) na hanggang Agosto a-22 na lamang ang enrollment para sa mga mag-aaral sa mga pampublikong paaralan.

 Ayon kay DEPED Spokesperson Michael Poa, sa ngayon ay wala pang nakikitang pangangailangan upang magpatupad ng extension ang kanilang departamento.

 Mababatid na magsisimula sa nasabing petsa ang unang araw ng pasukan para sa school year 2022-2023.

 Batay sa datos ng ahensya, umabot na sa 21,272,820 mag-aaral na ang nakapag-enroll para sa darating na pasukan mula sa target ng DEPED na 28.6 million.

 Samantala, sa naturang bilang, 18.7 million ang nag-enroll sa mga pampublikong paaralan habang 2.4 million naman ang nag-enroll sa mga pribadong eskwelahan.

Inihinirit ng Philippine Baking Industry Group (PHILBAKING) ang apat na pisong dagdag presyo sa Pinoy tasty at Pinoy pandesal.

Binigyang-diin ng grupo na Hunyo pa sila humirit ng taas-presyo, subalit nakiusap anila ang Department of Trade and Indstry (DTI) na pansamantala itong ipagpaliban upang maibsan ang pagtaas ng inflation rate.

Mababatid na sa ngayon ay nagkakahalaga ng 38 pesos 50 centavos ang Pinoy tasty, habang 23 pesos 50 centavos naman ang Pinoy pandesal.

Hindi na kailangang magbayad ng compulsory insurance premiums ang mga Overseas Filipino Worker (OFW) bago umalis ng bansa.

 Ito ang inanunsiyo ni Department of Migrant Workers (DMW) Secretary Susan Ople, aniya ito ay magbibigay-daan sa mga rehired at direct hired na OFWs na makaipon ng hindi bababa sa 1,700 pesos.

 Nabatid na sa ilalim ng Department order, ang mga employer o ang mga manggagawa mismo ang magbabayad para sa insurance coverage na sasailalim sa refund sa unang araw ng pagdating sa bansang destinasyon.

 Inihayag naman ni Philippine Overseas Employment Administration (POEA) Chief Bernard Olalia na sinuspinde ang compulsory insurance policy bilang pagsasaalang-alang sa pagpapabuti ng kalagayan ng global health.