NATIONAL NEWS

Nakatakdang magpakawala muli ng tubig ang Magat Dam sa Lalawigan ng Isabela ngayong araw.

Ito, ayon sa National Irrigation Administration-Magat River Integrated Irrigation System (NIA-MARIIS), ay upang mapanatili ang ligtas na lebel ng tubig ng dam.

Magsisimula ang pagpapakawala mamayang alas-2 ng hapon at inaasahang aabot ng 200 cubic meters per second o katumbas ng 1, 000 drums ng tubig ang papakawalan.

Patuloy na tumataas ang lebel ng tubig sa Magat Reservoir dahil sa nararanasang pag-ulan dulot ng Habagat.

Sa datos ng flood forecasting and warning system dam operation hanggang kahapon, nasa 188.85 meters above sea level ang tubig sa naturang reservoir o halos abot na sa spilling level na 190 meters.

Inaasahan na sa susunod na taon ang initial delivery ng BrahMos Missile System sa Pilipinas.

Ito ang kinumpirma ni Indian Ambassador to the Philippines Shambhu Kumaran matapos tanungin ng ilang mamamahayag sa 75th Independence Day Celebration ng India sa Taguig City, noong Lunes.

Ayon kay Kumaran, bagaman walang partikular na petsa kung kailan darating ang mga missile, maayos naman ang proseso sa pag-acquire ng mga nasabing armas.

Enero a – 28 nang lumagda ang Department of National Defense ng kontrata sa pagbili ng Indian-Made Brahmos Medium-Range Ramjet Supersonic Cruise Missiles na nagkakahalaga ng P18.9 billion.

Sa ilalim ng kontrata, makakukuha ang Pilipinas ng tatlong missile batteries, na binubuo ng mobile autonomous launchers at tracking systems.

Maaaring paliparin ang naturang cruise missile mula sa mga warship, fighter jet, submarine at land-based defense equipment.

Pwede ring kargahan ng warheads ang BrahMos at may kakayahang tamaan ang target sa layong 300 kilometers.

Otomatikong excused sa klase ang mga estudyanteng tatamaan ng COVID-19 sa pagsisimula ng face-to-face classes.

Ito ang tugon ni Department of Education spokesman Michael Poa kaugnay sa posibleng pagbibigay ng tulong ng DepEd sa mga estudyante na magkakasakit.

Ayon kay Poa, sa halip na assistance, ang magagawa lamang nila ay i-excuse sa klase ang mga mag-aaral na mayroong sintomas.

Nanawagan naman ang DepEd official sa mga magulang na huwag nang papasukin sa paaralan ang kanilang mga anak na makikitaan ng sintomas ng COVID-19.

Maaari anyang lumipat sa modular learning o online learning ang mga batang magkakasakit depende sa kaso.

Samantala, inatasan din ng kagawaran ang mga eskwelahan na magkaroon ng sariling infection containment plan o strategies upang mapangasiwaan ang mga estudyanteng matatamaan ng COVID-19.

Aabot sa halos 3K motorista ang nasita ng mga Traffic enforcer ng Metropolitan Manila Development Authority (MMDA) sa ikalawang araw na pagpapatupad ng expanded number coding scheme sa National Capital Region (NCR).

Ayon kay MMDA Task Force Special Operations chief Bong Nebrija, mas mataas ito sa bilang na kanilang nasita sa unang araw ng pagpapatupad na umabot sa 1, 588.

Sinabi ni Nebrija na hindi muna nila tiniketan ang mga violators sa halip ay binigyan muna ng warning at pinagsabihan na sundin ang umiiral na Expanded Number Coding Scheme.

Nilinaw naman ni Nebrija na hanggang ngayong araw na lamang ang pagbibigay konsiderasyon ng kanilang ahensya sa mga motorista dahil sisimulan na bukas ang kanilang paghuli sa mga lalabag na pagmumultahin ng P300.

Ang muling pagpapatupad ng Number Coding Scheme ay bilang bahagi ng pagsisimula ng klase sa Agosto a-22.

Nadagdagan pa ang bilang ng mga kalsadang nasira dahil sa walang tigil na pag-ulan sa National Capital Region (NCR).

Ayon sa Department of Public Works and Highways (DPWH), umakyat na sa 80% o 12,000 square meters na katumbas ng siyam at kalahating olympic-sized swimming pool ang naitalang mga lubak sa Metro Manila.

Aminado ang DPWH na kailangan ng mas malaking pondo para sa paggamit ng mas matibay na pundasyon upang maiwasan ang madalas na pagkasira ng mga kalsada.

Sinabi ng ahensya na posibleng magtagal ng 10 hanggang 15 taon ang isasagawang proyekto pero nakadepende parin ito sa panahon at sa pagkakagamit.

Iginiit ng DPWH na kanilang pag-aaralan ang naturang proyekto kung saan, isa sa mga dahilan kung bakit nagkakaroon ng lubak sa mga kalsada ang hindi maayos na pagtitimbang sa mga truck na dumadaan sa mga pangunahing kalsada sa Metro Manila.

Arestado sa buy-bust operation ang isang kawani ng pamahalaang lokal ng Cadiz sa Negros Occidental.

Kinilala ang suspek na si Charlie Bacroya, 43-anyos, na casual employee na nakatalaga sa City Veterinary Office sa Cadiz.

Ayon kay Cadiz City Police Chief Police Lt. Col. Gil John Despi, si Bacroya ay no. 2 priority target ng mga otoridad na matagal nang minomonitor dahil sa operasyon ng ilegal na droga sa nabanggit na lugar.

Narekober sa suspek ang 1.8 grams ng umano’y shabu na nagkakahalaga ng P12, 240 kasama ang ginamit sa operasyon na P500 marked money.

Nahaharap ngayon sa kasong paglabag sa Republic Act 9165 o Comprehensive Dangerous Drugs Act of 2002 si Bacroya.

Inaresto sa ikinasang entrapment operation ng mga tauhan ng Philippine National Police-Integrity Monitoring and Enforcement Group (PNP-IMEG) ang tatlong pulis maynila matapos ireklamo ng pangongotong sa lungsod.

Dinisarmahan ang tatlong miyembro ng Manila Police District (MPD) sa loob mismo ng Paco Police Community Precinct (PCP) matapos umano nilang tangkain na hingan ng P2,000 ang isang traysikel driver sa Sampaloc, Maynila.

Kinilala ang mga tiwaling pulis na sina P/SSG. Erwin Licuasen, 34-anyos; P/CPL. Chimber Importa, 33-anyos; at Pat. Leopoldo Tuason, 39-anyos na pawang nadestino sa MPD-PCP Station 5.

Ayon kay bagong IMEG Director Brig. Gen. Warren de Leon, isang Frederick Alba, 34-anyos, ang nagsumbong sa kanilang tanggapan hinggil sa iligal na gawain ng tatlong pulis.

Sa pahayag ng nagreklamo, hinuli umano ng mga pulis ang kanyang driver na kinilala sa pangalang John-John dahil sa paglabag sa Counter flow at Driving without License noong Agosto a-14 dahilan para ma-impound ang kanyang tricycle.

Sinabi ni Alba na hiningan umano ng mga suspek ang driver ng P2, 000 kapalit ng pagpapalabas umano ng tricycle.

Agad na nagreklamo sa PNP-IMEG si Alba dahilan para magkasa ng operasyon ang mga operatiba.

Nasa kustodiya na ng IMEG sa Camp Crame ang tatlong pulis habang inihahanda na ang kasong Robbery Extortion laban sa mga tiwaling pulis.