NATIONAL NEWS

Naka-display na sa National Library of the Philippines (NLP) ang orihinal na manuscript ng Noli Me Tangere at El Filibusterismo ng pambansang bayaning si Dr. Jose rizal.

Bilang parte ito ng ika-135 anibersaryo ng NLP.

Bukod sa dalawang makasaysayang nobela ni Rizal, marami pang historical documents at mga libro ang naka-display sa espesyal na exhibit sa NLP.

Kabilang dito ang De Molucis Insulis, unang libro na isinulat tungkol sa Pilipinas pagkatapos dumating ni Ferdinand Magellan;

Acta De La Proclamacion De Independencia Del Pueblo Filipino o Act of the Declaration of Philippine Independence;

Libreng makikita ang mga makaysayang aklat at dokumento hanggang katapusan ng Agosto.

Sinuspinde muna ng Procurement Service ng Department of Budget and Management (PS-DBM) ang pagbili ng hindi mahahalagang suplay at equipment para sa mga tanggapan ng gobyerno.

Ipinag-utos ito ni PS-DBM executive director Dennis Santiago matapos ang mga nasilip umanong iregularidad ng Commission on Audit (COA) sa mga biniling kagamitan ng PS-DBM para sa mga guro.

Ayon kay Santiago, effective immediately ang kautusan na layong itigil ang procurement processes.

Dahil dito, tututok muna ang PS-DBM sa pagbili ng mga essential supplies.

Halimbawa rito ang bond papers, ballpen, staplers, at iba pang office supplies.

Dapat na mayroong dalawang nagtatrabaho o dalawang sources of income ang isang pamilya na mayroong limang miyembro.

Ito’y ayon kay POPCOM Executive Director Juan Antonio Perez III, kung hindi maaabot ang P12,030 kada buwan na kailangan ng isang pamilya upang matugunan ang kanilang mga pangunahing pangangailangan.

Partikular na tinukoy nito ang mga nagtatrabaho sa labas ng NCR o kumikita ng mas mababa sa minimum wage na mahigit sa P500.

Sinabi pa ni Perez na hindi na sasapat kung isa lang ang may trabaho sa isang pamilya dahil na rin sa economic situation ng bansa.

Batay sa inilabas na datos ng Philippine Statistics Authority, pumalo sa 19.99 milyong indibidwal o 3.5 milyong mga pamilya ang mahirap noong 2021.

Ibinunyag ni Senate President Juan Miguel Zubiri ang nadiskubre niyang halos 127K metriko toneladang asukal na nakatengga lang sa mga bodega sa bansa.

Ayon kay Zubiri, nakaimbak ang mga asukal sa mga 40 footer container vans sa Metro Manila at ilan pang traders.

Iniipit anya ang mga ito at tila nais pang magkaroon muna ng artificial shortage ang bansa bago ilabas.

Samantala, ibinunyag din ng Senador na batay sa kaniyang nakalap na impormasyon ay umaabot sa P50 hanggang P100 ang kickback o patong na nakukuha ng mga tiwaling opisyal ng DA sa kada sako ng asukal na ipinapasok sa bansa.

Sa ngayon, pursigido pa rin si Zubiri na imbestigahan ang paglalabas ng Sugar Regulatory Administration ng resolusyon para makapag-angkat ng 300, 000 metric tons ng asukal.

Bahagya muling bumaba ang aktibong kaso ng COVID-19 sa Pilipinas.

Sa datos ng Department of Health, sa ikalawang sunod na araw ay sumadsad sa 2, 633 ang daily cases kaya’t bahayang bumaba sa 36, 190 ang aktibong kaso kahapon.

Kumpara ito 38, 982 na naitala ng DOH noong Lunes.

Samantala, karagdagang 5, 383 ang gumaling dahilan upang umakyat sa 3, 740, 745 ang recoveries.

Gayunman, 49 ang nadagdag sa COVID-19 death toll kaya’t sumipa na sa 61, 127 ang bilang ng namatay.

Ang nationwide COVID-19 tally sa bansa ay 3, 838, 062.

Nagtaas na rin ng singil ang ilang Medium, Small and Micro-Enterprises dahil sa umaalagwang presyo ng asukal at ilan pang sangkap.

Sa ilang tindahan ng Milktea sa Caloocan, nagtaas na ng hanggang P6.00 ang kada cup ng kanilang produkto maging ang ilang pastries shop sa Cubao, Quezon City.

Inihayag ng Philippine Chamber of Commerce and Industry (PCCI) na maraming kompanya na maliit o malaki ang apektado ng pagtaas ng presyo ng asukal.

Ayon kay PCCI president George Barcelon, bahagyang bumagal ang produksyon ng mga beverage manufacturer habang pansamantalang tumigil ang operasyon ng ilang maliit na negosyo.

Inihirit naman ni Restaurant owners of the Philippines (RESTO PH) president Eric Teng sa gobyerno na mag-angkat muna ng asukal upang mapahupa ang presyo nito sa merkado.

Dapat din anyang tulungan ng pamahalaan ang Sugar Farmers para maparami ang local supply, lalo’t mahalaga ang asukal sa “dietery life” at halos lahat ng pagkain ay mayroon nito, tulad ng instant coffee at cake.

Sa halip na makatipid, mas magiging magastos para sa gobyerno kung tuluyang ipagpapaliban ang nakatakdang Barangay at Sangguniang Kabataan (SK) Elections sa Disyembre a – 5.

Ito ang inamin ni Comelec chairman George Garcia makaraang aprubahan ng House Committee on Suffrage and Electoral Reforms sa botong 10-2 ang mga panukalang ipagpaliban ang nasabing halalan.

Ayon kay Garcia, sa katunayan ay kailangang maglabas ng karagdagang P5-B ang pamahalaan dahil kailangang mag-resume ang voter registration kung tuluyang i-po-postpone ang eleksyon.

Sa kanyang pagharap sa Hearing sa Kamara, ipinaliwanag ng Poll body chief na magreresulta rin sa mas maraming botante at kailangan ng mas maraming election paraphernalia at workers kung i-re-reschedule ang Barangay at SK polls sa December 4, 2023.

Samantala, sumang-ayon naman ang ilang Kongresista sa pahayag ni Garcia gaya nina Quezon City Representatives Franz Pumaren at Marivic Co-Pilar na kapwa aminadong “maling akala” ang paniniwalang makatitipid sa pondo ang gobyerno kung ipagpapaliban ang halalan.