NATIONAL NEWS

Posibleng magkaroon ng oversupply sa manok.

Ito ang ibinabala ng United Broilers Raisers Association chairman Gregorio San Diego Jr., dahil umano sa malakihang volume ng mga imported na manok na paparating sa bansa.

Aniya, bagsak na rin ang farm gate prices nila sa ngayon.

Dagdag pa ni San Diego, naglalaro sa 150 pesos hanggang 200 pesos ang kada kilo ng dress chicken samantalang ang farm gate nila ay nasa 106 pesos hanggang 110 pesos lamang.

Samantala, nakikipagpulong na ang grupo kay Pangulong Ferdinand Marcos Jr. para talakayin ang isyu ng pag-i-import at smuggling ng naturang produkto.

Inihayag ng Overseas Workers Welfare Administration (OWWA) na wala pa ring bayad ang swab test upang ma-detect ang COVID-19 sa mga returning overseas Filipino workers (OFWS).

Ito ay matapos aprubahan ng Board of Directors of the Philippine Health Insurance Corporation (PhilHealth) ang isang resolusyon sa pagpapatuloy ng coverage ng Sars-Cov-2 (COVID-19 virus) testing para sa umuuwing OFWs, alinsunod sa Interagency Task Force Resolution No.168, series 2002.

Ayon pa sa OWWA, anumang oras ay maglalabas ang Philhealth ng circular order para sa guidelines ng libreng COVID-19 test.

Samantala, sinabi ng Philhealth na kinikilala ng gobyerno ang malaking papel ng mga OFW sa pagbangon ng ekonomiya ng Pilipinas.

Tiwala si Iloilo Governor Arthur Defensor Jr. na mapoprotektahan ng nasasakupan nito ang kanilang mga sarili laban sa COVID-19.

Ito ay matapos maglabas ng Executive Order ang gobernador na nagsasabing opsyonal na lamang ang pagsusuot ng face mask sa nasabing lalawigan.

Paliwanag ni Defensor, alam na ng mga residente sa Iloilo kung ano ang gagawin matapos ang dalawa’t kalahating taong pagharap sa pandemya.

Alam na rin aniya ng gobernador na ang mga immunocompromised at senior citizen ang kailangang dagdagan ng proteksyon kontra COVID-19.

As of September 9, nasa 87.67% na ng populasyon ng Iloilo ang nabakunahan laban sa naturang sakit.

Nananatili rin sa alert level 1 hanggang September 15 ang naturang lugar.

Nangako ang Department of Information and Communications Technology (DICT) na bubuhayin nila ang free Wi-Fi service sa iba’t ibang lugar sa loob ng susunod na tatlong buwan.

Sa ginanap na pagdinig ng House Committee on Appropriations kaugnay ng DICT proposed budget na 7.2 billion pesos para sa 2023, lumalabas na marami sa mga free Wi-Fi for all- free public internet access program ng kagawaran ang hindi na gumagana.

Bukod sa planong revival ng free public Wi-Fi, nais rin bumuo ni Uy ng “streamlined system” para mas maging madali ang renewal ng mga subscription.

Nagbabala ang Department of Health-Food and Drug Administration (DOH-FDA) laban sa bentahan ng hindi rehistradong Ivermectin capsules.

Sa inilabas na Advisory No. 1520-A Series of 2022, pinayuhan ng FDA ang publiko at health care professionals na huwag bilhin o gamitin ang Ivermectin (ivercureme) 15 milligram 10 capsule.

Base sa beripikasyon ng FDA post-marketing surveillance, ang nasabing ivermectin capsule ay hindi naisyuhan ng kinakailangang “authorization” o “certificate of product registration”.

Dahil dito, binigyang-diin ng FDA na hindi matitiyak ang kalidad at kaligtasan ng naturang gamot, na maaaring magdala ng potensyal na panganib sa kalusugan ng publiko.

Nagbabala naman ang DOH-FDA sa mga establisimyento na gumagawa o nagbebenta ng mga produktong hindi awtorisado o walang tamang dokumento.

Pinamo-monitor din ng ahensya sa mga lokal na pamahalaan at awtoridad ang bentahan ng hindi rehistradong produkto sa kani-kanilang nasasakupan.

Magugunitang may ilang grupo at mambabatas ang nagsulong ng ivermectin bilang gamot sa COVID-19, pero nilinaw ng DOH at FDA na hindi nila nirerekomenda ang ivermectin laban sa COVID-19 bagama’t patuloy ang pag-aaral dito.