NATIONAL NEWS

Idineklara ng Malacañang ang Setyembre 13 bilang special non-working holiday sa Cordillera Administrative Region (CAR) para sa paggunita sa ika-36 taon ng matagumpay na peace talks sa pagitan ng pamahalaan at rebeldeng grupo.

Sa Proclamation 49 na nilagdaan ni Executive Secretary Vic Rodriguez, binanggit na dahil sa usapang pangkapayapaan na sinimulan ni dating Pangulong Cory Aquino ay natamo ang Cordillera autonomy.

Matatandaang pinamunuan ng dating pari na si Conrado “Ka Ambo” Balweg ang armadong grupo na nakipagkasundo sa gobyerno.

Dahil naman sa peace agreement, nagkaroon ng katahimikan sa rehiyon hanggang sa nabuo ang CAR na kinabibilangan ng Abra, Apayao, Baguio City, Benguet, Ifugao, Kalinga, at Mountain Province.

Nagbalik-loob sa pamahalaan ang isang umano’y dating collector at logistics officer ng Communist Party of the Philippines-New People’s Army (CPP-NPA) sa Bocaue, Bulacan.

Kinilala ni Bulacan Police Provincial Office officer-in-charge Col. Relly Arnedo ang surrenderer na si alyas “Ka Alfie”, 67 taong gulang.

Kasama ring isinuko ng dating rebelde ang isang .45-caliber pistol at isang .22-caliber revolver na may mga bala.

Nasa custody na ng 1st Provincial Mobile Force Company si Ka Alfie habang isinasailalim sa imbestigasyon at custodial debriefing.

Good news para sa mga motorista.

Asahan na naman ang tapyas-presyo sa produktong petrolyo sa susunod na linggo.

Ayon sa Department of Energy-Oil Industry Management Bureau (DOE-OIMB), posibleng magbawas ng mahigit isang piso kada litro ang mga kumpanya sa diesel at kerosene, habang mababa sa isang piso kada litro sa gasolina.

Ito na ang pangalawang sunod na linggong tapyas-presyo sa produktong petrolyo, matapos ang malakihang rollback noong pagtatapos ng agosto.

Ang isinagawang tapyas presyo ay bunsod sa patuloy na paggalaw ng presyuhan sa mga merkado.

 Isinusulong ng militar ang pagkakaroon ng isang “integrated readiness plan”.

Ito’y matapos magkasundo sina Philippine Marine Corps Commandant MGen. Charlton Sean Gaerlan at United States Marine Corps Commandant General David Berger ukol dito.

Sa pag-uusap ng dalawang opisyal sa Marine Barracks Rudiardo Brown sa Fort Bonifacio, Taguig, binanggit na bahagi ng readiness plan ang regular na pagsasagawa ng ehersisyo military; pagpapalakas ng mutual defense systems; paglalatag ng marine security; at pagtatatag ng “rapid mobility” sa kapuluan.

 Maliban dito, balak ding ilatag ang isang framework para maihanay ang mga aktibidad ng PMC at USMC sa isa’t isa.

Inihayag ng Philippine Army na nakasamsam ang mga sundalo at mga pulis ng ilang armas at pampasabog na pinaniniwalaang pag-aari ng mga rebelde sa Barangay Bulala, Magallanes, Sorsogon.

Pahayag ni 22nd Infantry Battalion Commanding Officer Lieutenant Colonel Nelson Mico, mismong mga residente sa lugar ang nagtimbre sa kanila ukol sa mga nakatagong armas sa isang koprahan.

Kabilang sa mga nadiskubre ang tatlong M16 rifle, isang KG9, tatlong anti-personnel mines, mga bala, at ilang propaganda materials.

Nabatid na aktibo ang pakikipag-ugnayan ng mga mamamayan sa lugar dahil na rin sa galit nila sa karahasan ng armadong grupo.

Sinaluduhan at pinasalamatan ni Department of National Defense Officer-in-Charge Sr. Undersecretary Jose Faustino Jr. Si Dating Philippine Navy Flag Officer- in- Command Vice Admiral Adeluis Bordado sa kanyang mga nagawa sa 15 buwan niyang pamumuno sa Navy.

Ito’y makaraang isalin ni Bordado kay Acting Phil. Navy FOIC Rear Admiral Caesar Bernard Valencia ang kapangyarihan bilang pinuno ng Navy.

Nabatid na kasama sa accomplishments ni Bordado ay ang matagumpay na pag-host ng unang Western Pacific Naval Symposium; pangatlong pakikilahok sa pinakamalaking naval exercise; pag-activate ng Naval Operating Base-Subic, pagbili ng Skyhawk trainer aircraft; pagtanggap ng unang delivery ng surface-to-air missiles para sa Jose Rizal-class frigates, at marami pang iba.

Kasabay nito, hinikayat ni Faustino si Valencia na ipagpatuloy ang pag-transform sa Philippine Navy bilang isang multi-capable force.

Pansamantalang hahawakan ni Acting Navy Flag Officer -in- Command Rear Admiral Caesar Bernard Valencia ang Philippine Navy.

Ito ang inamin ni Valencia matapos magretiro sa serbisyo si Vice Admiral Adeluis Bordado.

Pinangunahan naman ni Department of National Defense Officer in Charge Sr. Undersecretary Jose Faustino Jr. ang change of Command and Retirement Ceremony na ginanap sa Naval Station Jose Andrada.

Nangako si Valencia na wala siyang babaguhin sa mga patakaran at polisiya ng kanyang pinalitan at aalagaan lang ang Navy hanggang sa magtalaga ng permanenteng FOIC si Pangulong Bongbong Marcos.

Posibleng malaman ang tunay na estado sa suplay ng asukal  sa bansa sa buwan ng disyembre.

Ito ang iginiit ni department of agriculture o da undersecretary domingo panganiban kaugnay sa usapin ng kakulangan ng suplay ng asukal.

Sinabi pa nito na posibleng ilabas ngayong linggo ng mga traders ang nabili nilang asukal mula sa mga sugar miller.

Aniya, base kanyang pagtataya ay nasa dalawa hanggang tatlong buwan pa bago malaman ang estado ng asukal.

Sumunod na rin ang Iloilo Province sa hakbang ng Cebu City na gawin na lamang boluntaryo ang pagsusuot ng face mask sa mga outdoor areas.

Naglabas na rin ng Executive Order(EO) si Iloilo Provincial Governor Arthur Defensor Jr. na gawin na lamang na optional ang pagsusuot ng face mask sa outdoor areas.

Nakasaad sa EO, kinakailangan pa ring magsuot ng face mask sa indoor areas at sa mga pampublikong transportasyon.

Ang hakbang ng Iloilo Provincial Government ay kasunod ng rekomendasyon ng Inter-Agency Task Force na alisin na ang mandatory wearing of face mask sa katapusan ng taon.

Lalo pang lumakas ang Bagyong Inday habang bumagal ang pagkilos sa Philippine Sea.

As of 3am kanina, huling namataan ang bagyo sa layong 495 kilometers Silangan ng Basco, Batanes.

Taglay na ng bagyo ang lakas ng hanging aabot sa 110 km/h malapit sa gitna at pagbugsong aabot sa 135 km/h.

Kumikilos ito pahilagang-kanluran hilagang-kanluran sa bilis na 20 km/h.

Dahil sa bagyo, patuloy na makakaranas ng pag-ulan ang western visayas at ilang portion ng southern luzon kabilang ang CALABARZON, MIMAROPA, Bicol Region, Bataan at Zambales.

Uulanin din ang Metro Manila pero dala ng localized thunderstorm.

Posible pang lumakas pa at maging isang typhoon ang bagyo sa susunod na 12  oras bago tumungo sa Silangan ng Taiwan.

Sa Lunes, inaasahang kikilos pahilagang kanluran sa Philippine Sea ang Bagyong Inday at lalabas ng Philippine Area of Responsibility sa susunod na linggo.