NATIONAL NEWS

Inihayag ng isang senador na dapat higpitan ang pagpapapasok ng mga dayuhan sa bansa kasabay ng sunod-sunod na kaso ng kidnapping.

Sa panayam ng DWIZ, sinabi ni Senador Ronald Dela Rosa na dapat magkaroon ng salain nang maigi ng Bureau of Immigration (BI) ang mga dayuhan bago papasukin sa Pilipinas.

Samantala, inamin din ng senador na nakukulangan pa ito sa angas na ipinapakita ng PNP.

Sinabi rin ng dating PNP Chief na dapat maging mas agresibo pa ang mga pulis upang magkaroon ng takot para sa mga kriminal. —sa panulat ni Hannah Oledan

Sumuko na sa militar ang siyam na lider ng Communist Party of Philippines-New People’s Army (CPP-NPA) na naka-base sa Valencia City, Bukidnon.

Kinilala ng 4th Infantry Division ang mga rebeldeng sina Raquel Dahoyla; Joen Morales; Daniel Layanan; Mary Jean Cololot; Nelbert Binungkasan; Warren Balanse; Walisa Tinampakan; Marlon Ampoan at Rey Unabia.

Isinuko rin ng mga rebelde ang tatlong m16 armalite rifles, dalawang ak-47 rifle at isang m1 carbine rifle.

Samantala, ipinangako naman ni Major General Wilbur Mamawag na tutulungan nilang makapagbagong-buhay ang siyam na rebelde sa pamamagitan ng Enhanced Comprehensive Local Integration Program ng pamahalaan. —sa panulat ni Hannah Oledan

Isinusulong ng isang Persons With Disability (PWD) group ang pagkakaroon ng mas marami pang disability-friendly commuter facility.

Ito ay matapos kumalat ang video ng isang PWD na umaakyat ng hagdan nang nakasaklay sa LRT-1 sa Balintawak Station, Quezon City.

Ayon kay PWD advocate at dating Makati PWD Federation Vice President Lalaine Guanzon, hindi madali ang pagko-commute sa bansa para sa mga PWD kagaya niya.

Kaugnay nito, inihayag din ng Pambansang Kapisanan ng may mga Kapansanan sa Pilipinas Inc. (PKKPI) na karamihan ng public utilities sa bansa ay nananatiling inaccessible para sa may mga kapansanan.

Ikinalungkot din ni PKKPI President Fe Corpuz ang hindi pagpapatupad ng RA 344 nalubhang nagpahirap sa kanilang sektor upang mas mapadali ang kanilang paglalakbay.

Layunin ng RA 344 na mas mapadali ang pagbiyahe ng mga disabled sa pamamagitan ng pag-install ng sidewalks, ramps, railings. —sa panulat ni Hannah Oledan

Arestado ng mga tauhan ng Philippine National Police-Anti Cybercrime Group o PNP-ACG ang 31 indibidwal na sangkot sa investment scam sa Pasig City.

Ayon sa mga otoridad, kanilang sinalakay ang isang call center firm sa nabanggit na lungsod matapos mapag-alaman na nambiktima ang mga suspek ng mga British at Australian National.

Sa naging pahayag ni PNP Chief P/Gen. Rodolfo Azurin Jr., ikinasa ang raid matapos magreklamo ang mga dayuhan na biktima ng pekeng transaksiyon.

Kabilang sa mga naarestong suspek, ang may-ari ng call center firm na nag-ooperate at nanghihikayat ng mga dayuhan para mag-invest sa kanilang pension plan kung saan, sakaling magtransfer ng pera ang mga biktima, tsaka ito ililipat ng may-ari sa ibat-ibang accounts.

Kasalukuyan na ngayong iniimbestigahan ang mga suspek sa tanggapan ng PNP-ACG sa Camp Crame at nahaharap sa kasong paglabag sa Section 4 o Computer Related Fraud; Section 5 o Aiding or Abetting in the Commission of Cybercrime sa ilalim ng  Republic Act (RA) 10175 o Cybercrime Prevention Act of 2012.

Isinusulong ni Senator Win Gatchalian na dagdagan ng benepisyo ang mga guro sa mga pampublikong paaralan.

Ayon sa Senador, dapat na mabigyang prayoridad ng pamahalaan na mataasan ang sahod at ganap na maipatupad ang Magna Carta para sa public teachers.

Sinabi ni Gatchalian na napag-iiwanan na ang mga guro sa bansa kung ikukumpara sa mga guro sa ASEAN Region.

Dagdag pa ng Senador na ang mga guro sa ibang bansa partikular na sa Singapore ay may average na buwanang entry level na P51,820 para sa kanilang sahod habang ang mga guro naman sa malaysia ay sumasahod ng average na buwanang entry level na P44,607.

Nabatid na ipinagdiriwang ngayon ang National Teachers Month na nagsimula noong Setyembre a-5 at tatagal naman hanggang Oktubre a-5.

Muling nagdeploy ng karagdagang mga pulis ang Philippine National Police (PNP) sa Metro Manila upang mapalakas ang police visibility ng bansa ngayong bermonths.

Ang karagdagang mga tauhan ay may layuning tumulong sa Southern Police District (SPD) para pangalagaan ang seguridad kaugnay sa inaasahang pagtaas ng kriminalidad ngayong nalalapit na ang kapaskuhan.

Ayon kay PNP Chief P/Gen. Rodolfo Azurin Jr., aabot sa 240 na pulis ay hinati sa mga Lungsod ng Makati, Taguig, pasay, Parañaque at Las Piñas upang suportahan ang mga operatiba ng National Capital Region Police Office (NCRPO) sa pa­ngangalaga ng seguridad sa Metro Manila.

Inaasahan kasing dadagsa ang mga dayuhang turista pero walang dapat ipangamba ang publiko dahil may sapat na mga tauhan at resour­ces ang PNP upang tiyakin ang kanilang kaligtasan.

Dahil dito, nangako ang kapulisan na patuloy nilang gagampanan ang kanilang mga tungkulin para matiyak ang seguridad ng taumbayan.

Ikakasa ngayong araw ng Manila Public Employment Service Office (PESO) ang Job fair para sa mga naghahanap at nais magkaroon ng trabaho.

Ayon sa Manila PESO, daan-daang trabaho ang kanilang iaalok sa mga residente kabilang na dito ang: Personal assistant; Accounting at Office staff; HR staff, Officer, Head, Manager o Supervisor; Sales, Promodiser o Customer Service Representative, Warehouseman, ATM, Computer o CCTV technician; Company driver; Graphic artist; Delivery/Warehouse helper at Stockman; Billing officer; Service crew; Housekeeping; Executive Secretary; Production Operator at iba pa.

Sisimulan ang Job fair alas-9:00 ng umaga hanggang alas-4:00 ng hapon sa Park n’ Ride Building sa Lawton, Ermita, Maynila.

Nagpaalala naman ang Manila PESO sa mga interesadong mag-apply na magsuot ng casual na damit, magdala ng maraming updated resume, itim na ballpen, at magrehistro sa ibinigay na google form.

Maari ring bumisita ang mga nais mag apply sa kanilang facebook page para sa karagdagang detalye hinggil sa naturang aktibidad.

Good news para sa mga motorista!

Kasado na bukas, ang muling tapyas-singil sa presyo ng produktong petrolyo.

Sa pahayag ng ilang kumpaniya ng langis, maglalaro sa P1.20 hanggang P1.50 ang magiging bawas sa presyo ng kada litro ng diesel; aabot naman sa 40 centavos hanggang 50 centavos ang magiging tapyas-singil sa kada litro ng gasolina.

Ayon kay Department of Energy (DOE) Oil Industry Management Bureau Dir. Rino Abad, nasa P1.93 naman ang magiging bawas-singil sa kada litro ng kerosene.

Nabatid na ibinase ang projection sa presyo ng langis sa Mean of Platts Singapore (MOPS) trading noong Setyembre a-5 hanggang a-9 kung saan, ito umano ang ginagamit ng mga kumpaniya ng langis sa lahat ng kalakalan sa pagitan ng mga nagbebenta at bumibili ng produktong petrolyo.

Dahil dito, ang year-to-date price adjustments sa pinakahuling rollback ng presyo ng kada litro ng gasolina ay umabot na sa P16.95; P36.25 sa kada litro ng diesel; at P31.60 naman sa kada litro ng kerosene.