NATIONAL NEWS

Makakaranas ng water service interruption ang ilang bahagi ng Antipolo City ngayong araw, September 12 hanggang 13.

Batay sa abiso ng Manila Water, mawawalan ng suplay ng tubig ang ilang lugar sa Barangay San Roque mamayang alas-10 ng gabi hanggang alas-4 ng madaling araw.

Ito ay para bigyang daan ang gagawing line meter at strainer declogging.

Samantala, hinikayat ng Manila Water ang mga apektadong residente na mag-imbak ng tubig bago ang i-schedule ng  water service interruption.

Ipinag-utos ni Department of Transportation (DOTr) Secretary Jaime Bautista ang agarang pagsusuri sa posibleng privatization ng Edsa Busway (Edsa Carousel).

Ayon kay DOTr Undersecretary Mark Steven Pastor, maipapakita kasi sa pag-aaral ang benepisyo ng pagbibigay ng Busway System Operation sa private sector.

Paliwanag niya, kailangan ang pagsusuri dahil maraming components ang kasama rito tulad ng bus units at infrastructures, na nasa ilalim ng hurisdiksyon ng ibang ahensya.

Samantala, sinabi ni Pastor na ikokonsidera rin ng kagawaran ang pag-aaral sa pamasahe sa naturang busway.

Inihayag ni Private Advisory for Council Lead for Jobs Joey Concepcion na ang sektor ng mga OFWs na kumikita ng dolyar ang masasabing panalo sa ginawang pagtataas ng US ng kanilang interest rate upang sugpuin ang mataas na inflation.

Ayon kay Concepcion, pabor ito sa mga OFW gayong mas maraming piso ang makukuha nila kapag ito ay kanilang ipinapalit.

Pero, giit ni Concepcion na tatamaan naman ng interest rate ng Amerika ang patuloy na pagkawala ng value ng iba’t ibang currencies at may epekto ito sa MSMEs.

Aniya, mahihirapan sa hakbang na ito ang mga maliliit na negosyo dahil tataas din ang interes na babayaran nila sa kanilang pinagkaka-utangan partikular sa mga micro-financing institutions.

Samantala, sinabi ni Concepcion na ang tanging magagawa ngayon ay maghintay na maghinay-hinay ang Estados Unidos sa kanilang ginagawang pagtataas ng interest rates.

Inihayag ng isang pediatrician ang kahalagan ng pagbabakuna sa mga sanggol.

Sa panayam ng DWIZ, sinabi ni Pediatrician Dr. Bettina Santos na kabilang sa mga bakunang ito ay para maiwasan ang Hepa B, Polio, Pulmonya, Measles at iba pa na libreng makukuha sa mga local health center.

Ayon pa kay Dr. Santos, importante ang pagpapabakuna dahil sa mga life threatening na sakit.

Samantala, nagbigay ng paalala ang isang ina at vaccine advocate na si Ms. Marissa Santos sa mga magulang dahil sa naging sitwasyon ng kaniyang anak matapos na hindi mabakunahan noong ito ay sanggol pa.

Mas bumaba ang kaso ng kidnapping ngayon taon kumpara noong 2021.

Sa panayam ng DWIZ, sinabi ni Philippine National Police Anti-Kidnapping Group Public Information Officer, Police Major Angelica Carla Macasero na 11 mula sa 29 na kaso ang kanilang naresolba mula Enero hanggang Setyembre ngayong taon.

Sa nasabing bilang, apat ang naresolba sa kidnapping for ransom, pito naman sa Philippine Offshore Gaming Operator (POGO) habang isa ang hindi kaugnay sa naturang kaso.

Nilinaw naman ni Macasero na naaresto na ang mga suspek sa nasabing kaso.

Samantala, bukas ang PNP sa resolusyong ipinapanukala ng senado ukol sa imbestigasyon ng insidente ng kidnapping.

Nasa 88% na ang pagkakagawa ng Pampanga Delta Bridge na magkokonekta sa dalawang bayan ng Bulacan.

Ayon kay Department of Public Works and Highways (DPWH) Senior Undersecretary Emil K. Sadain, mahalaga ang 270 meter na tulay sa pagpapaganda ng imprastraktura para sa pagpapalago ng ekonomiya sa Masantol at Macabebe sa Pampanga at Calumpit, Hagonoy at Malolos sa Bulacan.

Naglaan naman ang DPWH ng 566.6 million pesos para sa pagtatayo ng naturangbridge na makapagpapalago sa munisipalidad ng Masantol at Macabebe na kilalang sentro ng pagpapaunlad ng aquaculture ng Pampanga. —sa panulat ni Hannah Oledan

Maaaring tumagal hanggang sa susunod na taon ang paghina ng piso kontra dolyar.

Bagamat bahagyang tumaas ang palitan ng piso sa 56.82 nitong Biyernes mula sa 57.18 noong Huwebes, sinabi ni Banko Sentral ng Pilipinas Governor Felipe Medalla, posible pang tumaas ang US interest rate na lalong ikahihina ng piso.

Kaugnay nito, itinuturong dahilan din ng mga ekonomista ang inflation na nangyayari sa Amerika na maaaring maka ambag sa mababang palitan ng piso hanggang unang bahagi ng susunod na taon. —sa panulat ni Hannah Oledan