NATIONAL NEWS

Humina na ang Bagyong Inday habang kumikilos patungong hilagang bahagi ng bansa at palabas ng Philippine Area of Responsibility (PAR).

Huling namataan ang bagyo, alas-10 kagabi sa layong 515 kilometers hilaga-hilagang-silangan ng Itbayat, Batanes.

Ayon sa PAGASA weather bureau, ang bagyong Inday ay may lakas ng hanging aabot sa 140 kilometers per hour at pagbugsong aabot sa 170 kilometers per hour habang mabagal ang pagkilos nito sa bilis na 15 kilometers per hour.

Asahan naman na makakaranas ng pag-ulan ang ilang bahagi ng bansa partikular na sa Visayas dahil sa epekto ng bagyong Inday.

Sa ngayon, patuloy pang minomonitor ng PAGASA ang bagyong Inday na inaasahang lalabas na ng bansa ngayong araw.

Inihayag ni Philippine National Police (PNP) Chief General Rodolfo Azurin Jr. na hindi kailangan ng oranisasyon na takutin ang mga kriminal.

 Ayon kay Azurin, pinahahalagahan ng ahensya ang buhay at malinaw naman aniya sa patnubay ni Pangulong Ferdinand Marcos Jr. na dapat tiyakin ang seguridad ng publiko.

 Sakaling namang mangyari ang krimen, sinabi ni Azurin na ang PNP ay magsasagawa ng imbestigasyon, magsasampa ng kaso at magpapakulong sa mga suspek.

 Una nang sinabi ni former PNP Chief at kasalukuyang Head ng Senate Committee on Public Order and Dangerous Drugs Senator Ronald Dela Rosa na hindi na kinakatakutan ng mga kriminal ang mga pulis, na naging mas matapang sa paggawa ng krimen.

 Tinitingnan ng Department of Health (DOH) na bumili ng 2ND generation ng COVID-19 vaccines na target ang dating variants ng Omicron sa unang kwarter ng 2023.

 Ito ang inanunsyo ni DOH Officer-in-Charge Maria Rosario Vergeire sa presentasyon ng kagawaran sa panukala nitong 301 billion pesos budget para sa susunod na taon.

 Aniya, nakikipag-usap na sila sa mga manufacturer ng bagong generation ng COVID-19 vaccines na target ang nasabing variant at original strain ng COVID-19.

 Binigyang-diin naman ni Vergeire ang kahalagahan ng pagkuha ng naturang bakuna, dahil aniya, humihina na ang immunity na ibinibigay ng primary doses ng COVID-19.

Inaprubahan na ni Pangulong Ferdinand Bongbong Marcos Jr. ang rekomendasyon ng Inter Agency Task Force (IATF) kaugnay sa isinusulong na boluntaryong pagsusuot ng face mask sa outdoor areas.

Ito ang kinumpirma ni Press Secretary Atty. Trixie Cruz Angeles kasunod na rin ng isinapubliko nitong Executive Order number 3.

Pero ayon kay Secretary Angeles ang lahat ng non-fully vaccinated na mga senior citizens at immuno compromised ay hindi sakop ng EO number 3 dahil kinakailangan pa rin nila magsuot ng facemask saan man sila magpunta.

Gayundin sa lahat ng pampublikong sasakyan at indoor areas ay kinakailangan pa rin ang pagsusuot ng face mask.

Samantala, pinalawig din ng Palasyo ang state of calamity ng bansa ng tatlong buwan. —sa ulat ni Jopel Pelenio (Patrol 17)

Tatlong libong sundalo mula sa United States Army Pacific 25 Infantry Division at Philippine Army ang lalahok sa Salaknib military exercise sa susunod na taon.

Ito ang inihayag ni Philippine Army spokesperson Col. Xerxes Trinidad sa pagtatapos ng isang linggong Salaknib 2023 planning conference.

Isasagawa ang pagsasanay sa dalawang yugto sa Central at Northern Luzon at maging sa Mindanao.

Sinabi ni Philippine Army Deputy Assistant chief of staff for Education and Training Col. Emmanuel Cabasan na inaasahan niya ang mga benepisyo ng pagsasanay mula sa iba’t ibang aktibidad at pagpapalitan ng kaalaman ay magagamit ng parehong hukbo.

Ipinabatid naman ni Philippine Army chief LT. Gen Romeo Brawner Jr., na ang taunang pagsasanay ay pagpapahayag lamang ng long standing bilateral relations ng Pilipinas at Amerika na makatutulong sa pagkamit ng nagkakaisang layunin na panatilihin malaya at bukas ang Indo Pacific Region.

Nagpasalamat si Pangulong Ferdinand Bongbong Marcos Jr., sa patuloy na suporta ng mga Pilipino sa kanyang ama na si dating Pangulong Ferdinand Marcos Sr.

Ginawa ng Pangulo ang pahayag kasabay ng pagdiriwang ng kaarawan ng kanyang ama kahapon.

Base sa post ng Pangulo, taon-taon aniya nay nakakasama nila ang maraming Pilipino para sariwain ang ala-ala nito at mga nagawa sa bansa.

Kahapon ay dumalo ang Pangulo sa misa sa libingan ng mga bayani sa Taguig City.

Kasama niya si dating First Lady Imelda Romualdez Marcos, ilan pang mga miyembro ng pamilya, kaibigan at supporters.

ani ng Punong Ehekutibo ang misusukli niya sa Pilipino ay gagandahan nito ang kanyang performance sa mga susunod na taon.

Isinusulong ng Teacher’s Dignity Coalition ang pagpapatupad ng anim na oras kada araw na trabaho para sa mga guro.

Ayon kay Benjo Basas, Pangulo ng TDC, dapat ipatupad ng maayos ang oras ng trabaho sa mga guro.

Nakatatanggap aniya sila ng mga impormasyon na sobra-sobra sa anim na oras ang pagtuturo at lagpas walong oras naman ang nagiging duty ng mga teacher.

Dahil dito, nalalabag na umano ang kasalukuyang polisiya ng Department of Education (DepEd) at nananawagan sa kagawaran na kumilos para sa kapakanan ng mga guro kabilang dito ang Magna Carta for Public Teachers, CSC Resolution at DepEd issuances.

Ani Basas, nasa ikaapat na linggo palang ang pagbubukas ng klase ngunit pagod na pagod na ang mga guro sa kanilang trabaho.

Naglabas ng alert warning ang National Grid Corporation of the Philippines (NGCP) sa Luzon Grid ngayong araw bunsod ng manipis na suplay ng kuryente.

Inilagay ng NGCP sa yellow alert status ang Luzon Grid  simula kaninang alas-9:00 ng umaga hanggang ala-1:00 ng hapon.

Dakong ala-1:00 naman ng hapon hanggang alas-4:00 ng hapon ay isinailalim ito sa red alert.

Muli namang iiral ang yellow alert ngayong alas-4:00 ng hapon hanggang mamayang alas-9:00 ng gabi.

Ayon sa NGCP, nawalan ng 3,627 megawatts ang grid dahil pitong planta ang naka-forced outage habang tatlong iba pa ang nasa mababang kapasidad.

Sinabi ng NGCP na ang available capacity ay tinatayang nasa 10,727 megawatts, habang ang peak demand ay 10,585 megawatts.