NATIONAL NEWS

Bahagyang bumaba sa 25,292 ang aktibong kaso ng COVID-19 sa bansa kahapon kumpara sa 25,684 noong linggo.

Sa datos ng DOH kahapon, nakapagtala ng 2,038 additional COVID-19 cases kaya’t sumampa na sa 3,908,295 ang kabuuang kaso.

Kabilang na rito ang 3,820,691 recoveries at 62,342 death toll.

Gayunman, ang mga bagong kaso ay mababa sa average number na daily infections simula noong September 5 hanggang 11 na 2,197.

Samantala, nangunguna pa rin ang Metro Manila sa may pinaka-maraming infections sa nakalipas na dalawang linggo na 9,201; sinundan ng CALABARZON, 3,795 at Central Luzon, 2,361.

Aabot sa isang milyon kada taon o nasa anim na milyong housing units sa loob ng anim na taon ang target na ipatayo ng Department of Human Settlement and Urban Development (DHSUD).

Ito ang inihayag ni Housing secretary Jose Rizalino Acuzar sa budget hearing ng house committee on appropriations matapos tanungin ni Valenzuela City 2^nd District Rep. Eric Martinez sa plano ng gobyerno sa malaki pang backlog sa pabahay.

Ayon kay Acuzar, sa 2023 budget ng DHSUD ay kalahating milyong residential units ang planong ipatayo sa National Capital region habang ang iba ay sa iba’t ibang rehiyon.

Hinimok naman ni Martinez ang kagawaran na silipin ang mga ‘idle’ o hindi nagagamit na lote ng gobyerno bilang posibleng pagtayuan ng Socialized Housing Project.

Iminungkahi rin ng Kongresista na i-prayoridad na maging benepisyaryo ng Government Housing Projects ang mga public school teacher, health care worker o medical frontliner, uniformed personnel at iba pang government workers.

Suportado ng OCTA research group ang kautusan ni Pangulong Bongbong Marcos na luwagan ang face mask mandate sa bansa.

Ayon sa OCTA, naniniwala silang dapat pagbatayan ang siyensya sa anumang pagbabago sa polisiya sa pagtiyak sa kaligtasan ng publiko.

Umaasa anya sila na magtatakda ang Marcos Administration ng “set of triggers” para sa muling pagpapatupad ng facemask sa outdoor spaces sakaling magkaroon na naman ng COVID-19 surge.

Kahapon ay nag-issue inilabas ng malakanyang ang Executive Order no. 3 ng Pangulo na nagpapahintulot sa optional use ng facemask sa open spaces at non-crowded outdoor areas na may maayos na ventilation.

Nakalabas na ng Philippine Area of Responsibility (PAR) ang bagyong Inday habang mabagal na kumikilos palayo ng ating bansa at patungong East China Sea.

Ayon sa PAGASA weather bureau, huling namataan ang bagyong Inday sa layong 550 kilometers hilaga-hilagang-silangan ng Itbayat, Batanes sa labas ng par na may lakas ng hanging aabot sa 140 kilometers per hour at pagbugsong aabot sa 170 kilometers per hour.

Mabagal pa rin ang pagkilos ni bagyong Inday panorth-northeastward sa bilis na 15 kilometers per hour.

Asahan naman na makararanas ng mga pag-ulan, pagkulog at pagkidlat ang ilang bahagi ng bansa partikular na sa extreme Northern Luzon.

Samantala, ang binabantayang Low Pressure Area (LPA) ng PAGASA ay ganap nang tropical depression na namataan sa labas ng Philippine Area of Responsibility (PAR).

Ang sentro ng tropical depression ay nasa layong 1,710 kilometers silangan ng extreme Northern Luzon na may lakas ng hanging aabot sa 45 kilometers per hour at pagbugsong aabot naman sa 65 kilometers per hour.

Ayon sa PAGASA, posibleng pumasok sa PAR sa darating na Huwebes o Biyernes ang tropical depression at posibleng itong pangalanan bilang si bagyong #Josie.

Nagpaalala naman ang pagasa na panatilihing maging alerto at makinig sa mga abiso ng lokal na pamahalaan at ng iba pang ahensya para sa kaligtasan ng bawat isa.

Arestado ang isang babae matapos umanong magtangkang mandukot ng bata sa Barangay Old Balara, Quezon City.

Ayon kay QCPD-6 station commander, Lt. Col. Morgan Aguilar, nagpanggap ang babae na dati umanong kasambahay ng pamilya ng limang taong gulang na biktima.

Gayunman, itinanggi anya ng ina ng bata ang pahayag ng suspek.

Batay sa imbestigasyon, pumasok ang babae sa bahay makaraang maiwang bukas ng amain ng bata ang pinto upang bumili ng kape pasado ala-5 ng madaling araw noong linggo.

Naabutan anya ng amain ng bata ang babae kaya’t  isinumbong sa Barangay.

Bagaman inamin ng suspek na nandudukot sila ng mga bata kapalit ng pera, agad namang binawi ng babae ang naturang pahayag.

Nahaharap na sa patong-patong na kaso ang suspek habang inaalam na kung mayroon itong mga kasabwat.

Epektibo ngayong araw ang pagpapatupad sa panibagong tapyas-singil sa presyo ng produktong petrolyo.

Ayon sa ilang kumpaniya ng langis, nasa 45 centavos ang magiging bawas-singil sa kada litro ng gasolina.

P1. 45 centavos naman ang magiging tapyas sa presyo ng kada litro ng diesel habang P1. 70 centavos naman ang magiging bawas-singil sa kada litro ng kerosene.

Una nang nagpatupad ng Oil price adjustment kaninang madaling araw ang kumpaniyang Caltex at Cleanfuel habang mamayang alas-6 naman ng umaga, ilalarga na ng kumpaniyang Petro Gazz, Seaoil, Shell, Petron, Flying V, JETTI Petroleum, PTT Philippines, Unioil at Phoenix Petroleum ang kaparehong presyo sa produktong petrolyo.

Nabatid na ito na ang ikalawang linggong Oil price rollback ng mga kompanya ng langis matapos ang dalawang magkasunod na oil price hike.

Ang bawas-presyo sa langis ay bunsod umano ng pangamba sa recession sa Europa at Amerika, gayundin ng mga lockdown sa China bunsod ng Covid-19.

Nakawala ang isang Grade 4 student na babae matapos tangkaing dukutin sa isang eskwelahan sa Cabanatuan City, kamakailan.

Ayon kay Barangay Camp Tinio, chairwoman Annie Pascual, nangyari ang insidente sa tapat mismo ng Camp Tinio Elementary School kung saan, isang lalaki ang sumalakay sakay ng isang motorsiklo.

Dito na isinakay ng lalaki sa kaniyang motor ang biktima pero mabilis itong nakawala dahilan para agad na tumakas ang suspek.

Base sa nakuhang CCTV footage ng mga otoridad, nakapasok pa ng silid aralan ang suspek  at nagdahilan na susunduin lamang ang kaniyang anak.

Dahil dito, nanawagan ang mga otoridad, na magkaroon ng police visibility o magbabantay sa palibot ng mga paaralan upang hindi na maulit ang naturang insidente.

Sa ngayon, iniimbestigahan pa ng mga pulis ang pangyayari habang tinutukoy pa ang pagkakakilanlan sa suspek.