NATIONAL NEWS

Ibinabala ng National Grid Corporation of the Philippines (NGCP) ang posibleng kakulangan ng supply ng kuryente sa bansa dahil sa madalas na brownout.

Kasunod na rin ito ayon kay NGCP spokesperson Atty. Cynthia Alabanza nang inisyung red alert status sa Luzon grid kahapon.

Sinabi ni Alabanza na mayruong indikasyon nang numinipis na supply ng kuryente tuwing may brownout dulot naman ng problema sa mga power plants.

Binigyang diin ni Alabanza na ang mga nasabing shutdown ay hindi normal o ordinaryong bahagi ng maintenance and operations at hindi nagiging dahilan ng kakulangan ng power supply.

May indikasyon aniya ng malawak na problemang kailangang tugunan ang dumadalas o taunan nang nagiging problema o mga ganitong sitwasyon.

Sinuspinde ng Korte Suprema ang lahat ng sesyon nito mula November 5 hanggang November 22.

Ito ayon sa anunsyo ng High Tribunal ay para bigyang daan ang pagdaraos ng bar examinations ngayong taon.

Kaugnay nito, ipinabatid ng Korte Suprema na sarado naman mula November 9 hanggang 16 ang lahat ng collegiate courts at first and second level courts sa Metro Manila at lahat ng mga lungsod kung saan mayruong local testing centers.

Una nang inihayag ng kataas taasang hukuman na gagawin ang bar exam sa 14 na Local Testing Centers (LTCs) sa buong bansa kung saan lima ay nasa NCR at tig tatlo sa Luzon, Visayas at Mindanao. —sa ulat ni Bert Mozo (Patrol 3)

Bumagsak sa 13-month low ang foreign direct investments (FDI) dahil sa kaunting investments sa debt instrument noong Hunyo.

Ayon sa BSP, bumaba ito sa 51.5% kumpara sa 971 million dollar na investment na pinuhunan ng mga dayuhan sa bansa noong Hunyo ng nakaraang taon.

Umabot sa 471 million dollars o 26.7 billion pesos ang pumasok na foreign investments sa bansa nitong Hunyo.

Batay sa datos ng BSP, karamihan sa naturang mga investment ay pautang na nagkakahalagang 3.34 billion dollars.

Habang nasa 738.89 million dollars lamang ang bagong puhunan sa mga kumpanya at nasa 559.3 million dollars naman ang kinita nila sa ibang bansa na pinuhunan muli sa mga kumpanya sa Pinas. —sa panulat ni Hannah Oledan

Himalang nakaligtas ang isang lalaki matapos magtangka umanong magpakamatay sa Quezon City.

Tumalon mula sa ikatlong palapag ng SM Fairview sa Quirino Highway ang hindi pinangalanang lalaki at bumagsak sa mga kutson na naka-display sa ground floor.

Ayon sa National Capital Region Police Office, isa sa mga rumorondang security guard ang naka-saksi sa nasabing insidente.

Napansin ng ilang guwardya na tila wala sa sarili ang lalaki bago ito tumalon.

Walang kahit anong galos ang lalaki at nasa maayos nang kondisyon makaraang bumagsak sa apat na patong ng kutson.

Agad namang itinurn-over ang lalaki sa pamilya nito at posibleng isailalim sa psycho-social intervention.

Kinilala ng  National Press Club (NPC) ang Technical Education and Skills Development Authority (TESDA) dahil sa suporta nito sa press freedom at kapakanan ng mga Pilipinong mamamahayag at ng kanilang pamilya.

Iginiit ni TESDA Director Danilo Cruz na mahalaga ang media sa pagbibigay katarungan at demokrasya sa bansa.

Ginawaran naman ng NPC ng Certificate of Recognition ang TESDA na tinanggap ng isang kinatawan sa ngalan ni Director General Cruz.

Ipinakita rin ang busto ng bayaning si Marcelo H. Del Pilar na siyang ama ng Philippine Journalism.

Matatandaang nilagdaan ni dating Pangulong Rodrigo Duterte ang RA 11699 na nagdedeklara sa Agosto 30 bilang National Press Freedom Day. —sa panulat ni Hannah Oledan

Sinabihan ni Senator JV Ejercito si Pangulong Ferdinand “Bongbong” Marcos Jr. na iprayoridad ang ‘peace and order’ sa bansa.

Kaugnay ito sa ikakasang imbestigasyon ng senado kaugnay sa sunod-sunod na kaso ng kidnapping sa kabataan partikular sa mga kababaihan.

Ayon kay Ejercito, dapat ipakita ni Pangulong Marcos na kontrolado nito ang sitwasyon at prayoridad nito ang kapayapaan at kaayusan sa bansa.

Binigyang-diin din ng senador na mahalaga ang peace and order para maisakatuparan ang layunin ng punong ehekutibo na ibangon ang ekonomiya ng bansa matapos maapektuhan ng pandemya.

Samantala, tingin ng mambabatas ay sinusubukan lamang ang katatagan ng administrasyong Marcos at pamunuan ng PNP ng sunod-sunod na kaso ng pangingidnap. —sa panulat ni Hannah Oledan

Pabor ang Department of Health na luwagan na ang face mask mandate para sa mga non-vulnerable sector at low-risk settings.

Inihayag ni DOH Officer-In-Charge Maria Rosario Vergeire sa Budget Briefing ng ahensya sa House Appropriations Committee, na nagpasya sila base sa anunsyo ng World Health Organization na maaari nang tumutok ang face mask mandate sa vulnerable sector.

Nilinaw ni Vergeire na hindi saklaw ng “Optional” na pagsusuot ng face mask ang mga senior citizen, mga may commorbidity, bata, sa mga sumasakay sa mga pampublikong transportasyon at mga crowded area.

Iginiit ng DOH official na walang anumang magiging kompromiso sa pagsusuot ng face masks pero hindi naman idinetalye kung kailan magiging epektibo ang nasabing polisiya.

Samantala, binigyang-diin ni Vergeire na ang pagluluwag sa face mask policy ay hindi nangangahulugang tapos na ang Covid-19 pandemic.

Nakikipag-ugnayan na ang Department of Health sa dalawang monkeypox vaccine manufacturers.

Ayon kay DOH Officer-In-Charge, Undersecretary Maria Rosario Vergeire, isa sa mga bakuna ay hindi maaaring iturok sa mga may comorbidity.

Ang isa namang bakuna ay mas mahal o nagkakahalaga ng 210 dollars ang kada dose nito pero sa unang quarter pa ng susunod na taon maaaring simulang i-deliver sa bansa.

Sa kanyang pagharap sa deliberation para sa 2023 budget ng DOH sa House Committee on Appropriations, inamin ni Vergeire na tinitimbang nila kung may pangangailangan bang bumili ng mga bakuna.

Sa ngayon anya ay hindi pa rin matukoy kung pawang mga local case ba ang apat na tinamaan ng nasabing virus dahil hindi pa rin malinaw ang case history ng monkeypox sa bansa.

Inasahan na ang unti-unting pagtaas ng Covid-19 cases sa Metro Manila.

Ito ang nilinaw ni OCTA research fellow, Dr. Guido David makaraang tumaas ang reproduction number at positivity rate.

Ayon kay David, natural lamang na tumaas ang kaso ng Covid-19, lalo’t dumami ang mga taong lumalabas ng bahay.

Sa datos ng OCTA, sumampa sa 13.3% ang Covid positivity rate noong September 9 kumpara sa 12.1% noong September 2 sa National Capital Region.

Ang positivity rate ang bilang ng isinagawang tests kung saan positibo sa Covid-19 ang resulta.

Batay sa benchmark positivity rate ng World Health Organization, ang below 5% na napanatili sa loob ng dalawang linggo ay indikasyon na kontrolado ang virus transmission.

Tumaas din sa 1.11 ang reproduction number sa NCR noong September 7 kumpara sa 0.93 noong August 31, nangangahulugang dumami ang infections sa rehiyon.

Sa kabila nito, ikinukunsidera namang mababa ang Average Daily Attack Rate ng NCR  kahit bahagya itong umakyat sa 5.58 per 100,000 population.