NATIONAL NEWS

Nais ng Department of Health (DOH) na patawan ng excise tax ang mga junk food at sweetened drinks.

 Ayon kay DOH Officer-in-Charge Maria Rosario Vergeire, ang mga nabanggit na produkto ay kadalasang nagiging sanhi ng obesity na humahantong sa mga malubhang sakit.

 Dagdag pa ng opisyal, idadagdag ang mga junk food at sweetened drinks sa ilalim ng sin tax law.

 Samantala, gusto aniya nila na makita sa mga susunod na taon, kung saan ang mga buwis sa kasalanan ay maaaring pondohan ang iba’t-ibang mga interbensyon na ginagawa ng kanilang departamento upang magbigay ng universal health care para sa lahat.

Ipinag-utos ni Pangulong Bongbong Marcos Jr. ang isang taong moratorium sa taunang amortisasyon at pagbabayad ng interes ng mga Agrarian Reform Beneficiaries (ARB).

Ayon sa Department of Agrarian Reform (DAR), ang moratorium sa land amortization at pagbabayad ng interes ay naglalayong tulungan sa pasanin ang mga ARB mula sa kanilang mga utang, na magbibigay-daan na gamitin ang pera upang mapaunlad ang kanilang mga sakahan.

Inihayag ni DAR Secretary Conrado Estrella III na ang nilagdaang utos ay bilang paghahanda para sa kongreso na magpasa ng isang batas upang ilibre na ang mga hindi nabayarang amortisasyon at interes sa pautang sa mga benepisyaryo.

Samantala, saklaw ng executive order ang pagbabayad ng amortization fees at loan interests para sa mga lupang agrikultural na ipinamahagi ng gobyerno sa ilalim ng Comprehensive Agrarian Reform Program.

Ibababa na ng Department of Social Welfare and Development (DSWD) ang pamamahagi ng educational assistance sa district level.

 Nabatid na may dalawa pang natitirang payout kung saan nakatakda ito sa September 17 at September 24.

 Ayon kay DSWD Secretary Erwin Tulfo, magbibigay-daan sa mga kulang sa gadyet o hindi makapagparehistro online na magkaroon ng access sa ipinamimigay na cash aid.

 Sinabi pa ng kalihim na may natitira pang 500 million pesos mula sa 1.5 billion pesos na pondo para sa naturang programa.

 Samantala, nilinaw naman ni Tulfo na hindi lahat ng mga estudyante na nag-aaral sa pampublikong paaralan ay makatatanggap ng nasabing ayuda.

Bahagyang lumakas at posibleng ma-develop bilang tropical storm sa susunod na 24 oras ang sama ng panahon na nasa labas pa ng Philippine Area of Responsibility (PAR).

Ayon sa PAGASA, ang nasabing bagyo ay hindi direktang makakaapekto sa panahon sa bansa bagamat palalakasin nito ang Southwest Monsoon na magdadala ng mga pag-ulan sa western section sa Southern Luzon at Visayas simula bukas o sa Huwebes.

Kapag pumasok na ang bagyo sa PAR, Huwebes ng hapon o gabi, papangalanan itong Josie.

Ang sentro ng nasabing bagyo ay pinakahuling namataan sa layong 1, 740 kilometro silangan ng dulong Hilagang Luzon.
Ito ay unti unting kumikilos pa hilaga taglay ang pinakamalakas na hanging umaabot sa 55 kilometers kada oras malapit sa gitna at may pagbugso na umaabot sa 70 kilometers kada oras.

Inutusan ng National Telecommunications Commission (NTC) ang 3 pangunahing telco sa bansa na i-deactivate ang mga naki-click na URL o mga link sa mga malicious site na nilalaman ng mga text message sa gitna ng pagtaas ng mga SMS-based na scam.

Kabilang dito ang Globe Telecoms, Inc., Smart Communications, Inc. at Dito Telecommunity Corporation.

Ayon sa NTC, dapat i-block ng mga telco ang domain, URLs, links o QR codes mula sa mga fraudulent sites batay sa umiiral na database na nakolekta mula sa mga ahensya ng gobyerno tulad ng NTC, national Privacy Commission, Department of Trade and Industry, PNP at mga report na mula sa machine learning o artificial intelligence.

Nabatid na ikinabahala ng publiko ang mga kumakalat na personalized text messages na naglalaman ng kanilang pangalan.

Inihayag ng isang eksperto na makabubuti para sa “democratic competition” ang paghahati sa Maguindanao, bago ang plebisito na magdedesisyonb kung hahatiin o hindi sa dalawa ang lalawigan.

Ayon kay Institute for Autonomy and Governance, Attorney Benny Bacani na lilikha ng mas maraming elective post kung mahahati sa Maguindanao Del Norte at Maguindanao Del Sur ang nasabing probinsya.

Sakali namang tuluyang mahati ang lalawigan, pangungunahan ni Incumbent Governor Mariam Mangudadatu ang Maguindanao Del Sur habang si Vice Governor Ainee Sinsuat ay magiging governor ng Maguindanao Del Norte.

Una nang sinabi ni Provincial Administrator Attorney Cyrus Torreña na ang paghahati sa naturang lalawigan ay makatutulong na magkaroon ng mas maraming investment.