Arestado sa mga otoridad ang isang suspek matapos makuhanan ng aabot sa P6.2 million na halaga ng marijuana sa ikinasang buy-bust operation sa Caloocan City.
Kinilala ang suspek na si Jenny Roy Dayrit, 24-anyos na hinuli sa tulong ng mga operatiba ng Station Drug Enforcement Unit (SDEU) sa pangunguna ni PLT Gilmer Marinas, kasama ang 6th MFC RMFB-NCRPO.
Nabatid na inaresto ang suspek makaraang bumili ng P9,000 halaga ng marijuana ang isang undercover police.
Nakuha sa suspek ang isang brick ng marijuana na nabili ng mga operatiba, isang bag na naglalaman pa ng 51 pirasong bricks transparent plastic wrapped na naglalaman ng hinihinalang pinatuyong dahon ng marijuana.
Kasong paglabag sa Sec. 5 o Selling of Dangerous Drugs at Sec. 11 o Possesion of Dangerous Drugs, Art. II of RA 9165 o Comprehensive Dangerous Drugs Act of 2002 ang isinampa ng mga Pulis sa Caloocan City Prosecutor’s Office laban sa suspek.