NATIONAL NEWS

Kinuwestyun ni Senator Grace Poe ang tila news blackout sa serye ng kidnapping sa bansa.

Ayon kay Poe, nakababahala na mistulang mga otoridad ang nagpapatupad ng news blackout.

Iginiit ng senador na sa gitna ng takot at pangamba ng publiko sa mga report ng umano’y pagdukot, tila walang naririnig na opisyal at beripikadong impormasyon mula sa PNP.

Dapat anyang beripikahin ng pambansang pulisya maging ng NBI ang mga napapabalitang kaso ng kidnapping.

Aalamin ni Poe sa PNP sa pagdinig ng Senado ngayong araw kung bakit nagkaroon ng news blackout.

Ipinunto ng mambabatas na hindi dapat baliwalain ng PNP ang mga report mula sa mga concerned citizen at mga organisasyon dahil maaaring ang mga dinudukot ay gagamitin sa mas matinding krimen, tulad ng prostitution at human trafficking.

Nakatakdang imbestigahan ng Committee on Public Order and Dangerous Drugs na pinamumunuan ni Senator Ronald Dela Rosa ang umano’y serye ng kidnapping sa bansa. — Sa ulat ni Cely Ortega-Bueno (Patrol 19)

Binuksan na ng DSWD ang online registration at licensing ng Social Welfare and Development Agencies (SWDA) at accreditation ng Social Welfare Development Programs at Services.

Bunsod ito ng muling paglulunsad ng pinaigting at pinahusay na DSWD regulatory e-services.

Kailangang magsumite ng kanilang aplikasyon ang mga SWDA kabilang na ang documentary requirements at makatanggap ng real-time updates sa aplikasyon.

Kabilang din ang data validations upang matiyak na mas kaunti lamang ang human error at tanging mga accurate information ang nakaimbak.

Personal namang sinaksihan ni DSWD Secretary Erwin Tulfo ang aktuwal na online process ng registration ng SWDA account upang makita kung paano gumana ang platform.

Ang swdas at iba pang service providers ay maaaring magrehistro sa pamamagitan ng regulatory.dswd.gov.ph.

Nakapagtala ang Department of Health (DOH) ng karagdagang 1,709 covid-19 cases, kahapon.

Ayon sa DOH, pangalawang araw nang mababa sa 2,000 ang daily new cases, matapos makapagtala ng 1,574 noong Martes.

Bumaba rin sa 24,139 ang active cases kumpara sa 24,502 noong Miyerkules, para sa kabuuang 3,911,487 nationwide tally.

Sumampa naman sa 3 million 824,932 ang nakarekober sa sakit habang 62,416 ang mga namatay.

Ang NCR pa rin ang nangunguna sa may pinaka-maraming kaso sa loob ng dalawang linggo na may higit 9,000 new cases, sinundan ng Calabarzon; higit 3,000 at Central Luzon, higit 2,000 new cases.

Tumaas ng 36% ang naitalang bagong kaso ng leptospirosis sa Pilipinas.

Batay sa datos ng national leptospirosis data ng Department of Health, nasa 1,770 na ang leptospirosis cases simula Enero a-uno hanggang Agosto bente-siyete, kumpara sa 1,299 noong 2021.

Karamihan sa bagong kaso ay nagmula sa National Capital Region na may 378; sinundan ng Region 6 na may 210 at Region 2 na may 195.

Mayroon ding naitala ang DOH na 244 deaths dahil kaya’t umabot na sa 13.8% ang fatality rate.