Aabot sa 43 na dayuhan ang nailigtas ng Philippine National Police-Anti Kidnapping Group (PNP-AKG) sa Angeles City, Pampanga.
Ayon kay Interior Secretary Benhur Abalos, biktima ng human trafficking at kidnapping ang mga nasabing foreigner.
Unang nakatanggap ng impormasyon si Abalos mula sa hindi nagpakilalang informat na humihingi ng tulong dahil dinukot ang kaibigan nitong Chinese sa Clark, Pampanga.
Dito na nagsagawa ng operasyon ang PNP-AKG at nakita ang 42 iba pang foreign national na biktima rin ng human trafficking.
Arestado naman ang suspek na kinilalang si Chen Yi Bien, 33 anyos at human resource manager ng pogo company na Lucky South 99.
Nagsasagawa na ng imbestigasyon ang PNP at inaalam na rin kung may kaugnayan ito sa kaliwa’t kanang report ng insidente ng kidnapping sa bansa.