NATIONAL NEWS

Muling inilunsad ng lokal na pamahalaan ng Marikina ang ‘rat to cash’ program.

Ito ay para mapigilan ang pagkalat ng sakit na leptospirosis, na nakukuha sa ihi ng dagat lalo kapag baha.

Ayon kay Marikina City Mayor Marcy Teodoro, magbibigay sila ng P200 kapalit ng kada mahuhuling mga daga, buhay man o patay.

Depende ang makukuhang pera sa timbang ng daga, kung saan P50 ang pinakamababa habang P200 ang pinakamataas.

Ang mga nahuling daga ay dadalhin sa City Envonmental Management Office at pagkatapos ay ilalagay sa yellow trash bins para mauri bilang infectious waste.

Para naman maiwasan ang posilibilidad na magkaroon ng sakit, mamimigay ang lgu ng gamot na Doxycycline, isang preventive medicine laban sa leptospirosis.

Hanggang bukas, Setyembre disi-sais tatagal ang programa na ekslusibo para sa mga residente ng Marikina.

Mariing ipinag-utos ng National Telecommunications Commission (NTC) sa mga mobile phone manufacturers, distributors at dealers na ituro sa mga mobile phone users ang pag-iwas sa text scams.

Batay sa ipinalabas na memorandum order ng NTC, bukod sa pagtuturo sa kung paano gamitin ang bagong biling mobile phones, ang mga distributors at dealers ay inatasang ituro din sa mga cellphone buyers kung paano sila makaiiwas sa mga scam na ipinadadala sa pamamagitan ng text.

Sa direktiba na nilagdaan ni NTC Commissioner Gamaliel Cordoba, binanggit na dapat ipatupad ng mga mobile phone manufacturers, distributors at dealers ang sumusunod na mga hakbang:

1. Pagtuturo sa mga mobile phone users kung paanong i-block ang mga text na galing sa mobile numbers na wala sa kanilang contact lists at kung paanong lumikha ng spam folder sa kanilang inbox. Maaring ipalaganap ang nasabing impormasyon sa pamamagitan ng websites ng mga mobile phone manufacturer maging sa kanilang social media accounts.

2. Ang mga mobile phone manufacturers, distributors at dealers ay dapat maglagay ng posters sa kanilang physical stores na nagsasaad ng impormasyon sa paggamit o pag-activate ng text blocking, spam folder at iba pang kahalintulad na features sa kanilang cellphones.

3. Ang mga mobile phone manufacturers, distributors at dealers ay inaatasang maglagay ng leaflets sa package ng mga bagong mobile phones na naglalaman ng impormasyon hinggil sa paggamit ng text blocking, spam folder at iba pang kahalintulad na features.

Maliban dito, iniutos din ng NTC ang agarang pagpapatupad ng memorandum order sa loob ng 15 araw.

Kasabay ng industry-wide meeting ng NTC kamakailan, sinabi ng mga kinatawan mula sa mobile phone manufacturers, distributors at dealers na ang kanilang mga ibinebentang cellphones ay mayroong features na kayang magbigay proteksyon laban sa text scams, gaya na lamang ng pag-block sa mga unknown numbers at pag-divert ng mensahe sa spam folders.

Inaasahan na papasok sa Huwebes ng gabi o Biyernes ng madaling araw sa Pilipinas ang ika-sampung bagyo ngayong taon.

Ayon sa Philippine Atmospheric, Geophysical and Astronomical Services Administration (PAGASA), huling namataan ang bagyo malapit sa dulong bahagi ng Northern Luzon.

Nabatid na posibleng paigtingin ng bagyo na may international name na ‘Nanmadol’, ang Southwest monsoon o Habagat ngayong linggo.

Samantala, tatawagin itong bagyong ‘Josie’ oras na makapasok ito sa Philippine Area of Responsibility (PAR).

Siniguro ng National Grid Corporation of the Philippines (NGCP) na walang inaasahang brownout na mararanasan sa mga susunod na araw.

 Ayon kay NGCP President at CEO Anthony Almeda, hindi mararanasan at ang nangyari ang ‘red alert’ status na itinaas noong Lunes, Setyembre 12 ay ‘normal disturbances’ lamang.

 Matatandaan na noong Lunes ay isinailalim sa red alert status mula ala-una ng hapon hanggang alas-otso ng gabi ang Luzon power grid dahil sa isyu sa power plant nito.

Tiniyak ni Vice President at Education Secretary Sara Duterte na ligtas ang pagbabalik sa full to face classes ng mga estudyante sa Nobyembre.

 Ayon kay Duterte, patuloy ang kanilang koordinasyon sa Department of Health (DOH) upang mapabilis ang pagbabakuna sa mga school personnel at estudyante, bagama’t nilinaw nito na walang diskriminasyon anuman ang vaccination status.

 Anang bise presidente, full face to face na ang direksyon ng Department of Education (DEPED) maliban na lamang sa blended learning modality para sa ilang lugar na may ibang sitwasyon pa sa COVID.

 Samantala, tiwala ang kalihim na sa kanilang basic education development plan 2030 na magiging gabay ng deped sa pagpapatupad ng polisiya upang mapabuti ang edukasyon ng bansa.

Sinimulan na ng Senate Committee on Finance ang diskusyon sa panukalang 5.368 trillion pesos national budget para sa 2023.

 Sa gitna ng pagdinig ng the Development Budget Coordination Committee (DBCC) inihayag ni Finance Secretary Benjamin Diokno, na nakatuon ang Marcos Jr. administration sa pagsulong ng “Robust Economy, Inclusive and Resilient Society”.

 Nabatid na naglatag ng overview ng medium-term fiscal plan ng bansa at ng legislative priorities ng pamahalaan ang kalihim, gayundin ang kasalukuyang estado ng ekonomiya at update sa fiscal performance at borrowings.

 Samantala, ikinatuwa naman ni Committee Chair Senator Sonny Angara ang dagdag na pondo para sa edukasyon, kasulusugan at agrikultura.

Inanunsiyo ng Department of Education (DEPED) na natapos na nila ang pagrepaso sa K to 12 curriculum at pinaplantsa na umano ang mga pagbabago rito na maaaring maipatupad sa loob ng tatlong taon.

 Ayon kay Vice President at Education Secretary Sara Duterte, ang resulta ng review ay ipinakita sa management committee at executive committee bago ipakita sa national government at sa pribadong sektor.

 Ayon kay Duterte, ang pagrepaso sa kurikulum ng grade 11 at 12 ay isinasagawa na at daraan sa kaparehong proseso.

 Aniya, titipunin ng ahensya ang mga suhestyon at komento na gagamitin sa mga gagawing pagbabago sa kurikulum.

 Samantala, sinabi naman ni Education Undersecretary Ernesto Gaviola na maaaring matapos ang bagong kurikulum para sa senior high school sa susunod na taon.