NATIONAL NEWS

Binalaan ng Philippine Space Agency (PHILSA) ang publiko kaugnay sa mga debris mula sa Chinese rocket na maaaring bumagsak malapit sa Burgos, Ilocos Norte at Sta. Ana, Cagayan.

Ito ayon sa PHILSA ay bagamat posibleng hindi naman din bumagsak sa kalupaan ang debris mula sa CZ-7A o long march 7A na may banta sa mga sasakyang pandagat at pang himpapawid.

Ipinabatid ng PHILSA na ang CZ-7A rocket ay inilunsad mula sa Wenchang Space Launch Center sa Hainan Island, pasado alas-9:00 kagabi.

Katuwang ang CAAP, na verify ng PHILSA ang tinatayang drop zones ng rocket debris mula sa Notice to Airmen na inisyu ng Civil Aviation Administration ng China.

Kabilang anito sa drop zones ang 71 kilometers mula Burgos sa Ilocos Norte at 52 kilometers mula sa Sta. Ana, Cagayan.

Nanawagan si Assistant Minority Leader at Gabriela Women’s Party Rep. Arlene Brosas sa pamahalaan na magpatupad ng price freeze sa mga pangunahing produkto at serbisyo sa buong bansa.

Kasunod ito ng desisyon ng administrasyong marcos na palawigin hanggang katapusan ng taon ang state of calamity dahil sa COVID-19.

Giit ni Brosas, dapat na magdeklara ng price freeze ang pamahalaan upang maibsan ang pasanin ng mga pamilyang Pilipinong lubhang naapektuhan ng umiiral na krisis.

Maliban dito, hinimok din ni Brosas ang gobyerno na ipagpatuloy ang pagbibigay ng tulong pinansyal sa mga mahihirap na pamilyang Pilipino.

Dapat aniyang maglaan ang gobyerno ng budget para sa pagbibigay ng ayuda at ayusin ang proseso nito upang mas madaling makakuha ng tulong ang mga nangangailangan. —sa ulat ni Tina Nolasco (Patrol 11)

Tumaas ang mga naitalang kaso ng dengue at leptospirosis sa Quezon City ngayong taon.

Ayon sa QC Epidemiology and Disease Surveillance Unit (CESU), nakapagtala ang lungsod ng 2,328 dengue cases mula Enero a-1 hanggang Setyembre a-8.

Mas mataas ito kumpara sa naitalang 748 na kaso ng dengue sa kaparehong panahon nang nalipas na taon.

Batay pa sa datos ng CESU, pinakamaraming naitalang kaso ng dengue sa District 4 na may 413 cases, habang ang District 3 naman ang mayroong pinakamababang bilang ng kaso na may 314.

Nakapagtala rin ang Quezon City ng 15 nasawi dahil sa dengue sa nasabing panahon.

Samantala, sumirit din ang kaso ng leptospirosis sa lungsod matapos maitala ang 78 kaso mula January 1 hanggang nitong September 1.

Mayorya ng mga kaso ay nagmula sa District 2 na may 24 na kaso, habang may pinakamababang bikang naman ang District 3 na may apat na kaso.

Iniulat din ng QC CESU na 11 ang namatay dahil sa nasabing sakit.

Kaugnay nito, pinayuhan ng lokal na pamahalaan ang mga residente na panatilihing malinis ang kanilang mga kapaligiran at kaagad na magtungo sa pinakamalapit na o Ospital o Health Center sakaling makaranas ng mga sintomas ng sakit.

Umaaray na ang grupo ng mga magsasaka sa Nueva Ecija dahil sa mababang kita sa mga bagong aning palay.

Ayon sa Amihan – National Federation of Peasant Women at Bantay Bigas Spokesperson Cathy Estavillo, mababa sa ngayon ang presyo ng kada kilo ng mga bagong aning bigas na umaabot lamang sa P16.20.

Sinabi ni Estavillo na ang nasabing presyo ay napakababa kung ikukumpara sa mataas na presyo na kanilang ginagamit na produkto sa pagtatanim partikular na ang pataba.

Samantala, sa naging pahayag naman ng Samahang Industriya ng Agrikultura (SINAG), mahal na umano ang hinihinging P20 na presyo sa kada kilo ng mga bagong aning palay.

Iginiit naman ni Estavillo, na isa sa malaking tulong para maibsan ang problema ng mga magsasaka ay ang limang libong pisong subsidiya mula sa gobyerno.

Sa ngayon, pinag-aaralan na ng Department of Agriculture (DA) ang sitwasyon ng bigas sa bansa na mabibigay linaw sa nasabing isyu.

Mariing tinutulan ng grupo ng mga doktor ang pagluluwag ng facemask policy sa outdoor settings o open spaces.

Ayon Private Hospitals Association of the Philippines (PHAPI) President Dr. Jose De Grano, kahit nasa low risk na ang mga ospital sa bansa, mataas parin ang kaso ng COVID-19 na umaabot ng 2,000 hanggang 3,000.

Sinabi ni De Grano na hindi pa dito kasama ang mga nagse-self-test kit sa kanilang mga bahay at hindi na nagpapa-RT-PCR Test.

Iginiit din ni De Grano na ang pagluluwag ng facemask ay may malaking tiyansa na magdulot ng mataas na kaso ng COVID-19 lalo na’t mababa parin ang vaccination rate ng bansa.

Mataas din ang tiyansa na maipasa ng mga carrier ang infection sa mga nakakasama nito sa loob ng kanilang bahay.

Dahil dito, mas mahihirapan ang bansa na maitaas ang healthcare system dahil sa mababang vaccination rate.

Samantala, inihiling naman ng OCTA Research Group sa pamahalaan na maglagay ng mga mekanismo na magiging hudyat upang ibalik ang mandatoryong pagsusuot ng face mask sa pampublikong lugar.

Nagpaalala sa mga pasahero ang Department of Transformation (DOTr) na kailangan paring magsuot ng facemask sa mga pampublikong transportasyon.

Kasunod ito ng ibinabang executive order ng Malacañang na ginagawa nang opsiyonal ang pagsusuot ng face mask sa outdoor settings o open spaces.

Ayon kay Bautista, dapat paring manatiling vigilante ang publiko at maging maingat sa lahat ng oras dahil nananatili parin ang banta ng COVID-19.