NATIONAL NEWS

Dinepensahan ni Vice President at Education Secretary Sara Duterte-Carpio ang mahigit 650 million pesos na halaga para sa 2023 Proposed Confidential Funds na gagamitin laban sa mga krimen o iligal na aktibidad na target ang mga estudyante.

Kasunod ito ng ginawang pagpuna ni Gabriela Rep. Arlene Brosas, tungkol sa mahigit kalahating bilyong pisong halaga ng pondo na inilaan ng OVP maging ang 150 milyong pisong halaga ng pondo, para naman sa Department of Education (DepEd) kung saan, “unfunded” umano ang pagpapatayo ng mga classroom.

Iginiit ni VP Sara na maraming problema ang mga estudyante gaya ng sexual grooming at sexual abuse, maliban pa sa recruitment ng mga kabataan sa ilalim ng kriminalidad, pang-aabuso at iba pa.

Ayon kay VP Duterte, layunin ng ahensya na matugunan ang kakulangan sa mga silid aralan, upuan, at mga text book learnings.

Matatandaang inaprubahan kahapon sa ilalim ng House Appropriations Panel ang 2.37 billion pesos na budget na hinihiling ng OVP na siyang tutulong sa problemang kinakaharap ng ahensya.

Inihayag ni Department of Health (DOH) Officer-In-Charge Undersecretary Maria Rosario Vergeire, na tumaas ang kaso ng human immunodeficiency virus (HIV) sa Pilipinas.

Nabatid na nitong nakaraang Hulyo, pumalo sa 1,346 ang naitalang nahawaan ng naturang sakit kung ikukumpara sa mga naitalang kaso kada buwan noong mga nakaraang taon.

Matatandaang noong 2017, nakapagtala din ng mataas na bilang ng kaso ng HIV ang DOH na pumalo naman sa 72,000.

Samantala sa naging datos ng HIV/AIDS & Art Registry of the Philippines (HARP), umabot na sa 4,574 ang bilang ng mga nasawi sa sakit mula taong 1984 hanggang 2020.

Sinabi ni Vergeire na sa ngayon, mas lalo pang tumaas sa halos 150,000 ang bilang ng mga tinamaan ng HIV.

Dahil dito, nanawagan si Vergeire sa publiko na samantalahin ang libreng HIV testing ng ahensya, bukod pa sa mga treatment at support programs na kanilang inilunsad na bahagi ng 5 bilyong pisong pondo kada taon para labanan ang HIV at iba pang priority diseases.

Inihayag ng Department of Budget and Management (DBM) na hindi na maglalaan ng pondo ang kanilang ahensya para sa Libreng Sakay Program ng pamahalaan sa susunod na taon.

Ayon kay DBM Assistant Dir. Maria Cecilia Abogado, tatagal na lamang hanggang sa buwan ng Disyembre ang Libreng Sakay na matatamasa ng mga komyuter sa National Capital Region (NCR) makaraang maghigpit ng sinturon ang kanilang ahensya bunsod ng limitadong pondo.

Sinabi ni Abogado, na nakatutok ngayon ang kanilang ahensya sa ilang programa na prayoridad umano ng gobyerno.

Matatandaang nagkaroon ng Libreng Sakay ang Edsa Bus Carousel, LRT at MRT sa kasagsagan ng COVID-19 outbreak sa bansa.

Sa ngayon, patuloy paring tinatalakay sa kongreso ang hiling na dagdagan ang pondo ng DOTr para sa mga napahintong programa na may layuning mapagaan ang pasanin ng publiko sa tumataas na presyo ng mga pangunahing bilihin, serbisyo at produkto ng langis sa bansa.

Tatagal “habambuhay” ang Philippine Health Insurance Corporation (PhilHealth).

Ito ang tiniyak ni PhilHealth Spokesperson at Vice President for Corporate Affairs Shirley Domingo, sa kabila ng naunang pahayag ng kanilang officer-in-charge na si Eli Dino Santos.

Una nang inihayag ni Santos sa House Appropriations Committee na maaaring palawigin nang lampas sa taong 2027 ang actuarial life ng nasabing state health insurer sa pamamagitan ng subsidies, maliban sa pondo mula sa PAGCOR at PCSO.

Ayon kay Domingo, mayroong reserve funds na P177 billion ang PhilHealth hanggang nitong December 31, 2021 o dalawampu’t limang porsyentong mataas kumpara noong 2020.

Ipinunto ng opisyal na ang tinatayang actuarial life ng PhilHealth na hanggang taong 2027 ay “assumptions at projections” lamang batay sa iba’t ibang scenario.

Hindi naman anya maba-bangkarote ang PhilHealth dahil mayroong national government subsidy para sa premium ng indirect contributors.

Ang subsidiya sa PhilHealth ay para sa pagbabayad sa indirect members o mga walang kakayahang magbayad ng premium, tulad ng indigent population, senior citizens at persons with disabilities.

Natimbog ng PNP-Anti Cybercrime Group (ACG) ang isang lalaking online seller ng sim cards na may verified e-wallets sa Quezon City.

Mag-de-deliver na sana ang trenta’y kwatro anyos na suspek, na residente ng Caloocan City, sa isang poseur buyer nang masakote ng mga pulis sa barangay Socorro, sa Cubao.

Ayon kay PNP-ACG Public Information Officer, Lt. Col. Jay Guillermo, nasabat mula sa lalaki ang limandaan limampu’t anim na Globe sim cards na may registered at verified e-wallet accounts.

Ibinebenta anya ng P300 ang kada sim card na kinukuha ng mga nag-o-online gaming, dahil ang transakyon dito ay kailangang ilipat sa e-wallet ang pera at maraming sim card lalo’t P50,000 lamang ang maximum na padala sa isang sim.

Iniimbestigahan na ang mga pagkakakilanlan na ginamit sa e-wallet registration.

Nagbalala naman si Guillermo na maaaring kasuhan o madamay ang sinumang subscriber o sim card user na ginamit ang pagkakakilanlan sa scam.

Samantala, nahaharap ang suspek sa mga kasong paglabag sa RA 10175 o misuse of devices.

Plano ng National Grid Corporation of the Philippines (NGCP) na i-konekta ang supply ng kuryente mula sa Mindoro patungo sa mga lalawigan ng Batangas, Palawan at Panay Island.

Inihayag ni NGCP Spokesperson Atty. Cynthia Alabanza na malaki ang maitutulong ng hakbang na ito upang mapaganda at mapagtibay ang power generation supply system sa mga nasabing lalawigan.

Gayunman, naghihintay pa anya sila ng tugon mula sa Energy Regulatory Commission kung papayagan ang kanilang inilatag na interconnecting plan.

Sa ngayon hindi pa interconnected ang apat na lalawigan at hindi pa kontrolado ng NGCP. —Sa ulat ni Jopel Pelenio (Patrol 17)

Kapwa nakumpirma na sa Commission on Appointnent sina Secretaries Jesus Crispin Remulla ng Department of Justice at Benjur Abalos ng Interior and Local Government habang hindi nakalusot sa ad interim appointment si Labor Secretary Bienvenido Laguesma.

Ito’y makaraang magkulang sa oras sa dami ng tanong ni Senator Risa Hontiveros.

Ayon kay Hontiveros, ipinatanong sa kanya ang ilang labor group bagay na mahalagang masagot ni Laguesma upang matiyak na ma-poprotektahan ang kapakanan ng mga manggagawa sa ilalim ng kanyang panunungkulan.

Lumabas sa pagdinig na dating nag-abogado ang law firm ni Laguesma sa ilang malalaking kumpanya para sa mga kaso laban sa mga manggagawa.

Iginiit ng senador na may nagsasabi na ang dating law firm ni Laguesma ay pro-management at union buster sa labor mobilization kaya’t paano umano nito ipaglalaban ang karapatan ng mga obrero.

Bilang tugon, inihayag ng kalihim na kung sino ang nasa tama ang bibigyan ng atensyon ng DOLE at nilinaw na nag-divest o umalis na siya sa law firm na kanyang itinatag.

Simula anya nang ma-appoint siya bilang DOLE secretary ay wala na umano siyang kinalaman sa mga kasong hawak ng law firm.

Gayunman, nanaig ang mosyon ni Hontiveros na suspendihin hanggang September 20 ang confirmation hearing ni Laguesma dahil marami pa umanong pumapasok na mga tanong mula sa iba’t ibang labor union. — Sa ulat ni Cely Ortega-Bueno (Patrol 19)

Inendorso na sa plenaryo ni Senate Committee On Electoral Reforms Chairperson Imee Marcos ang rekomendasyong ipagpaliban ng isang taon ang barangay at sangguniang kabataan elections.

Nakasaad sa committee report na isasagawa ang barangay at s.k. polls sa ikalawang Lunes ng December 2023 habang mag-uumpisa ang panunungkulan ng mga mahahalal na opisyal sa January 1, 2024.

Dahil dito, ma-e-extend ang panunungkulan ng mga kasalukuyang barangay at s.k. officials.

Ang susunod na baranggay at s.k. elections ay gaganapin sa ikalawang lunes ng mayo sa taong 2026 at mula roon, tuwing ikatlong taon na ang halalang pambarangay at sangguniang kabataan

Sa kanyang sponsorship speech, inamin ni Senator Marcos na nagsinungaling siya nang mangako siya noong 2019 na huling pagpapaliban ng nasabing halalan.

Nilinaw ng senador na mayroong mabibigat na dahilan bakit binawi niya ang pangako noon na hindi na muling mapo-postpone ang eleksyon partikular ang sistema ng barangay at s.k. — Sa ulat ni Cely Ortega-Bueno (Patrol 19)