NATIONAL NEWS

Nilinaw ni Marikina City Mayor Marcelino “Marcy” Teodoro na tanging mga residente ng lungsod ang maaaring sumali sa “Rat to Cash” Program, na layong mapigilan ang pagkalat ng sakit na leptospirosis, na nakukuha sa ihi ng daga.

Sa panayam ng DWIZ, sinabi ni Mayor Marcy na pinilahan ang unang araw ng programa na tatagal hanggang bukas, kung saan mahigit 1,700 na daga ang nakolekta ng City Environment Management Office.

Sa ilalim ng naturang programa, magbibigay ang LGU ng 200 pesos kapalit ng kada mahuhuling mga daga na may timbang na 150 gramo pataas, buhay man o patay.

Sa ngayon aniya ay mayroong tatlong kaso ng leptospirosis sa lungsod.

Sinabi pa ni Mayor Marcy na mayroon silang ipinamamahaging preventive medicine laban sa leptospirosis.

Aabot sa 709 na mga senior citizen sa San Jose Del Monte, Bulacan ang tumanggap ng pensiyon mula sa Department of Social Welfare and Development (DSWD).

Ayon sa DSWD, mag–uuwi ang bawat isang indigent senior citizen ng p1,500 para sa ikatlong kwarter ng taon bilang bahagi ng programa ng ahensya na makakatulong para sa gastusin at pangangailangang medikal ng edad 60 pataas.

Ayon sa ahensya, nito lamang nakalipas na Martes, nasa 709 ang eksaktong bilang ng mga benipisyaryong tumanggap para sa kanilang pensiyon.

Inihayag ng OCTA Research Team na majority sa mga Pilipino ang nagsasabing magpapatuloy parin sa pagsusuot ng facemask laban sa COVID-19.

Kasunod ito ng inilabas na Executive Order No. 3 ni Pangulong Ferdinand “Bongbong” Marcos Jr. Hinggil sa opsiyonal na pagsusuot ng face mask sa mga outdoor settings.

Sa isinagawang survey ng OCTA mula April 22 hanggang 25, 2022, napag-alaman na karamihan umano sa mga Pinoy ay naniniwalang mas magiging ligtas sila kung magpapatuloy ang pagsusuot ng facemask sa mga pampublikong lugar sa bansa.

Samantala, sinabi naman ni OCTA President Ranjit Rye, na 28% sa mga Pinoy ay nagsasabing patuloy silang magsusuot ng masks hanggang sa susunod pa na taon.

Plano ni Pangulong Ferdinand “Bongbong” Marcos Junior na magbigay ng bigas sa mga empleyado ng gobyerno bilang bahagi ng kanilang suweldo.

Ayon kay Pangulo Marcos, nais niyang matiyak na may bigas ang bawat pamilya.

Dahil pamahalaan na anya ang bibili ng bigas, makamumura ang mga empleyado at hindi kailangang bumili ng mas mahal.

Nilinaw naman ni PBBM na hindi mawawalan ng negosyo ang mga rice producer dahil magkakaroon ng demand, lalo’t maraming bibilhin ng gobyerno.

Ipinunto ng punong ehekutibo na maraming malalaking korporasyon ang magbibigay ng rice allowance kaya’t sisimulan na rin ito sa pamahalaan.

Nanganganib maapektuhan ang presyo ng mga produkto sa pagbagal ng pag-di-diskarga ng mga container mula sa mga barko at pagbiyahe ng mga kargamento bunsod ng port congestion sa Maynila.

Ito ang ibinabala ng Confederation of Truckers Association of the Philippines (CTAP).

Ayon kay CTAP President Mary Zapata, ang dagdag gastos sa logistics ay maaaring magresulta sa pagtaas ng presyo ng mga produkto, lalo ngayong nalalapit nang mag-pasko.

Halos 27% anya ng presyo ng mga produktong dumarating sa consumers ay dumaraan sa clearance, documents at ibang fees sa pagpo-proseso ng mga kargamento.

Idinagdag ni Zapata na sa katunayan ang Pilipinas ang may pinaka-mataas na logistics cost sa asya.

Sa ilalim ng kasalukuyang sistema sa mga pantalan, magdi-diskarga ang isang barko ng container vans upang i-imbak sa mga yarda at kukunin ang mga ito ng truckers upang ibyahe patungo sa destinasyon.

Ibinabalik naman ang walang lamang container vans sa yarda upang kunin ulit ng mga barko pero mas tumagal ng ilang araw bago i-diskarga ang containers na naglalaman ng mga produkto kaya’t dalawang beses na lamang bumibyahe kada linggo ang truckers sa halip na apat na beses.

Kailangan ding mabayad sa shipping line ng 1,000 pesos na “detention fee” sa empty container vans kada araw bukod pa sa 100,000 na ipinapataw ng shipping liners kumpara sa dating billing na 20,000 hanggang 30,000 pesos.

Sinupalpal ng isang consumer welfare group ang National Grid Corporation of the Philippines (NGCP) at Energy Regulatory Commission (ERC) sa kabiguang mapigilan ang power shortage sa Luzon.

Nito lamang Lunes ay isinailalim ng NGCP sa yellow at red alerts ang Luzon Grid dahil sa pagnipis ng reserbang kuryente mula sa mga power plant.

Ayon kay kuryente DOT Org National Coordinator Nic Satur Junior, hindi pa natutupad ng NGCP ang system upgrades na ipinangako nito noon upang mapigilan ang power shortage.

Ipinangako anya ng NGCP na isasakatuparan nito sa unang bahagi ng 2022 ang Mindanao-Visayas Interconnection Project para makatulong sa power supply situation sa Luzon pero walang nangyari.

Pinuna rin ni Satur ang kawalang-aksyon ng ERC sa mga unscheduled maintenance ng mga planta.

Bagaman maaari naman anyang pagmultahin ng ahensya ang mga power firm, napakaliit naman ng halaga ng multa kumpara sa kinikita ng mga kumpanya.

Lumobo na sa 145,341 ang kaso ng dengue sa bansa simula Enero hanggang Agosto ngayong taon.

Kumpara ito sa 52,697 cases sa kaparehong panahon noong isang taon o mas mataas ng 105%.

Ayon sa Department of Health (DOH), karamihan ng mga bagong kaso o halos 17,000 ay mula sa National Capital Region, CALABARZON at Cagayan Valley.

Mula sa kabuuang bilang, aabot na sa 461 ang death toll simula Enero 1 hanggang Agosto ngayong taon kumpara sa 181 dengue deaths sa kaparehong panahon noong 2021.

Samantala, muling pina-alalahanan ng DOH ang publiko na ugaliin ang pagsunod sa “4S” Strategy o Search and Destroy Breeding Places, Secure Self-Protection, Seek Early Consultation at Support Fogging o Spraying sa hotspot areas.

May go-signal na ni Pangulong Bongbong Marcos ang pag-angkat ng 150,000 metric tons ng asukal upang tugunan ang kakapusan ng suplay at ma-kontrol ang tumataas na presyo nito.

Alinsunod ito sa Sugar Order 2 na nilagdaan noong Martes, Setyembre a – 13 ni Pangulong Marcos, na kasalukuyang Agriculture Secretary.

Nakasaad sa kautusan na kalahati ng kabuuang import volume o 75,000 metric tons ay ilalaan sa industrial users o mga kumpanyang gumagamit ng asukal sa kanilang manufacturing process.

Ilalaan naman ang kalahati sa mga consumers o sa mga pamilihan.

Inihayag ng SRA na magsisimula na silang tumanggap ng aplikasyon para sa importasyon ng asukal, tatlong araw matapos maging epektibo ang nasabing kautusan.

Aabot sa 15,000 fried tilapia ang ipinamahagi ng Office of the Provincial Agriculturist at Bureau of Fisheries and Aquatic Resources-Provincial Fisheries Office sa mga mangingisda sa ilang bayan sa Aklan.

Ito ay bilang selebrasyon ng 59th Fish Conservation Week tuwing ikatlong linggo ng Setyembre kada taon na may temang “Tiyakin ang Pagkain ng Bansa, Isulong Natin ang Likas na Produksyon ng Isda”.

Kabilang sa mga nakatanggap ng fried fish ang mga mangisngisda mula sa mga bayan ng Banga, Madalag, Kalibo, Balete, Malinao at New Washington.

Bumuo na ng task force ang Quezon City LGUs na tututok sa electrical fire safety ng lungsod.

Ayon kay Quezon City Mayor Joy Belmonte, layunin nitong maiwasan ang naitatalang mga sunog at mabalangkas ang fire safety code sa kaniyang nasasakupan.

Iginiit ni Belmonte na kailangang mapag-aralan ang sunod-sunod na insidente ng sunog na naitatala sa lungsod para sa magiging hakbang na maaring gamitin sa pagkontrol nito.

Sakop ng Task Force on Fire Prevention and Preparedness ang iba’t ibang departamento at utility companies kabilang na dito ang meralco at water concessionaires na Manila Water at Maynilad services.

Samantala, hinikayat naman ni Belmonte ang mga residente na mag ingat at makiisa sa fire prevention programs ng lokal na pamahalaan, upang mapanatili ang kaligtasan ng bawat isa.