NATIONAL NEWS

Naglaan ang Department of Budget and Management (DBM) ng isang bilyong pisong pondo para sa susunod na taon bilang tulong sa mga nagtatanim ng mais at mangingisda.

Sinabi ni Budget Secretary Amenah Pangandaman na sa pondong ito 510.45 million pesos ay para sa Department of Agriculture (DA) upang maipagkaloob sa  mga nagtatanim ng mais o corn farmers habang ang 489.6 million pesos ay bahagi ng budget ng Bureau of Fisheries and Aquatic Resources (BFAR) para ibigay naman sa mga mangingisda.

Dagdag pa nito, doble ang budget na ito mula sa 500 milyong pisong budget para sa taong kasalukuyan.

Aniya, layunin nito na maipagpatuloy ang pamamahagi ng fuel discounts sa kwalipikadong magsasaka at mangingisda na nag-ooperate ng agricultural at fishery machineries.

Gayunpaman, ani Pangandaman na hindi pa naisasapinal ang patakaran para sa pagpapatupad nito dahil nakasalalay sa magiging kondisyon ng Dubai Crude Oil Price ang programa kung saan dapat mas mataas sa 80 dollars per barrel ang presyo ng krudo sa tatlong magkakasunod na buwan.

Samantala, tiniyak naman ni Pangandaman na may alokasyon din sila ng 10 bilyong pisong pondo para sa Right Competitive Enhancement Fund para sa susunod na taon.

Optimistiko si Pangulong Ferdinand Bongbong Marcos Jr. na kanyang makakaharap at makakausap si US President Joe Biden.

Ito ang inihayag ni Pangulong Marcos Jr. sa harap ng Filipino community sa New Jersey Performing Arts Center.

Giit ni Pang. Marcos Jr., na hindi sya nawawalan ng pag-asa na kanyang makakausap sa isang bilateral meeting ang US president.

Kaakibat ng paniniwala ng punong ehekutibo na magkakaharap at magkaka-usap sila ng pangulo ng Amerika, ang pananaw nito kaugnay sa maayos at magandang relasyon ng Pilipinas at Estados Unidos.

Dagdag pa ni Pangulong Marcos Jr., nananatiling matatag at tiyak na mas lalakas pa ang bilateral relations ng dalawang bansa dahil na rin sa patuloy na matagal ng pagkakaibigan ng Pilipinas at Amerika.  – sa ulat ni Jopel Pelenio (Patrol 17)

Ipinanawagan ni Construction Workers Solidarity Party-list at Committee on Health Member Rep. Edwin Gardiola sa Food and Drug Administration (FDA) na bigyan na ng full approval ang pagtuturok ng moderna at Pfizer COVID-19 vaccines sa edad 12 pataas.

Pinapalawig aniya  proclamation  no. 57 ang legal na batayan para sa Emergency Use Authorization (EUA) para sa mga bakuna sa COVID, ngunit hindi aniya maaaring patuloy na gamitin ang EUA  habang buhay.

Aniya nananatili umanong crucial sa line of defense laban sa COVID  ang mga bakuna dahil karamihan sa mga pasyenteng mayroong severe at kritikal na sintomas ay mga hindi bakunado.

Habang, ang mga booster dose naman aniya ay lalong mahalaga para sa mga teenager, seniors, immunocompromised, PWDs, at working adults.

Dagdag pa nito, lagpas 72 milyong tao na ang naturukan ng primary doses at kailangan pang mabakunahan ang nasa higit sa 30 milyon  kabilang ang 3 milyong nakatatanda. - sa ulat ni Tina Nolasco (Patrol 11)

Suportado ni Deputy Majority Leader at ang Probinsyano Partylist Rep. Alfred  Delos Santos ang rekomendasyon ng Department of Health (DOH) na amyendahan ang R.A. no. 7305 o ang Magna Carta of Public Health Workers para maisama ang mga mangagawa sa kalusugan na nasa pribadong sector.

Gayunman, dapat aniya itong sumailalim sa malawakang pag-aaral sa kongreso upang matiyak na matutugunan ang mga isyu at hamon na kinakaharap ng mga health worker sa publiko at pribadong sektor.

Aniya, bagama’t mayroon pang hindi nalulutas na mga problema para sa mga health workers sa civil service,  pantay na kinikilala ang mga suliranin ng mga ito partikular sa benepisyo gayundin sa mga pamantayan sa paggawa  at pagkakaiba ng sahod na maaari aniyang suriin sa pamamagitan ng pagpapahusay sa tripartite wages and productivity board.

Mungkahi ng mambabatas sa DOH, na pormal na ihain ang panukalang batas sa House Committees on Health at Civil Service and Professional Regulation. –  sa ulat ni Tina Nolasco (Patrol 11)

Naging maayos at mahusay ang isinagawang plebisito para sa paghahati ng lalawigan ng Maguindanao sa dalawa.

Ito ang naging obserbasyon ng Parish Pastoral Council for Responsible Voting (PPCRV) kasunod ng desisyon ng mahigit 700 libong residente ng lalawigan na hatiin ito bilang Maguindanao del Sur at Maguindanao del Norte.

Pangunahing rason dito ay ang kawalan ng ulat at mga insidente ng karahasan at pananakot sa naturang lugar.

Bukod sa mga pulis na sundalo, napansin din ng PPCRV na nagpakalat ng pamatay sunog para tumulong sa pagpapanatili ng katiwasayan.

Nakatakdang magsalita si Pangulong Ferdinand Bongbong Marcos Jr. Sa New York Stock Exchange Economic Forum para sa kanyang ikalawang araw sa New York.

Dakong alas kwatro ng hapon at alas kwatro ng madaling araw ng Martes ay magsasalita at magbibigay ng public statement ang punong ehekutibo sa nasabing forum.

Pero bago ito ay may mauuna munang ilang mga aktibidad ang pangulo sa umaga.

Samantla, dumalo naman sa meeting sa Caryle Hotel kaninang alas diyes ng umaga sa New York at isang aktibidad naman ang dinaluhan ni PBBM kaninang alas dose ng tanghali.

Ito ay ang pagdalo sa business lunch na inihanda sa pangulo ng US – Philippine society.

Binigyang-diin ng Department of Education (DEPED) na may solidong legal na basehan ang “confidential funds” na nagkakahalaga ng 150 million pesos sa proposed budget nito para sa taong 2023 na alinsunod sa Joint Circular 2015-01.

Ayon sa kagawaran, bahagi ng mandato ang pagsuporta sa national security ng civilian offices tulad ng DEPED lalo na at may banta sa learning environment at kaligtasan ng mga personnel nito.

Ipinaliwanag pa ng ahensya na kabilang ang sexual abuse, karahasan, korapsyon, pagkakasangkot sa ilegal na droga ng mag-aaral at personnel at marami pang iba sa mga isyung dapat tugunan at kailangan ng surveillance at intelligence gathering.

Samantala, titiyakin umano nito na target-specific ang mga proyekto ng DEPED at protektado ang mga kawani at mga mag-aaral.

Naniniwala ang Private Hospitals Association of the Philippines Incorporated o PHAPI na hindi pa napapanahon na alisin ang mandatory use ng facemasks sa outdoor settings.

Ito’y sa kabila ng executive order number 3 na nilagdaan ni Pangulong Bongbong Marcos na nagpapahintulot na gawin na lamang “optional” ang pagsusuot ng facemask sa outdoor maliban sa mga indoor areas.

Sa katunayan, ayon kay PHAPI president, Dr. Jose Rene De Grano, dapat ipagpatuloy ng publiko ang pagsusuot ng face masks, lalo’t bahagya muling tumaas ang kaso ng COVID-19 simula nang luwagan ang restriksyon.

Pinayuhan din ni De Grano ang publiko, partikular ang mga immuno-compromised at senior citizen, na magpaturok ng booster bilang dagdag proteksyon ngayong hindi na obligado ang pagsusuot ng facemask sa labas ng bahay.