NATIONAL NEWS

Pinalawak ng Department of Labor and Employment (DOLE) ang  mga regulasyon at kondisyon sa pagsasagawa ng work from home set up sa ilalim  ng  Department Order 237.

Ito’y kasunod ng inilabas ng kagawaran na layunin nito na  hikayatin ang mga stakeholder na magpatupad ng telecommuting program.

Kung saan nakasaad sa  binagong Implementing Rules and Regulations  (IRR) ng Republic Act 11165 o ang Telecommuting Law ang terms and conditions ng telecommuting.

Gaya ng pagturing sa Work From Home (WFH) na hindi iba sa trabaho na ginawa sa regular  na work place, pagkakaroon ng parehas na karapatan ng mga empleyado gaya ng pagkakaroon ng  rest days, holidays  special non-working days, parehas na work load at sahod.

Gayundin ang hindi pagturing sa mga empleyado na naka-work from home bilang field personnel maliban kung ang kanilang aktwal na oras ng trabaho ay hindi matutukoy o walang katiyakan.

Dapat  ding  ibilang sa working hours ng mga empleyadong naka work from home ang mga oras na kinakailangan ang mga ito sa tungkulin.

Binigyang kahulugan din sa kaparehong department order ang alternative workplace bilang isang anumang lokasyon o lugar  kung saan nagtatrabaho ang  isang empleyado sa pamamagitan ng telecommunication. –  sa ulat ni Tina Nolasco (Patrol 11)

Hinimok ng National Telecommunications Commission (NTC) ang publiko na isumbong ang mga natatanggap na scam text messages.

Ayon sa NTC, maaaring magreklamo sa pamamagitan ng pagpapadala ng email sa kontratextscam@ntc.gov.ph at ilagay ang kanilang kumpletong pangalan, address, email at contact number.

Maliban sa mahahalagang impormasyon ay isama rin umano sa ipadadalang email ay ang screenshot ng text scam message, numero ng nagpadala ng mensahe at larawan ng kahit anong government-issued ID.

Maliban sa pagpapadala ng email ay maaari rin umanong bumisita sa website ng ahensya upang magpasa ng complaint form.

Papalo sa mahigit 1,000 ang naserbisyuhan ng libreng sakay sa railway lines kasabay ng selebrasyon ng Philippine Civil Service Anniversary.

Ang naturang libreng sakay sa mga tren ng Metro Rail Transit-3 (MRT-3), Light Rail Transit-2 (LRT-2) at Philippine National Railways (PNR) ay bilang pasasalamat sa lahat ng mga lingkod bayan na tapat at buong dedikasyon na nag-aalay ng kanilang galing upang mapaglingkuran ang bansa.

Kaninang alas nuebe ng umaga ay nasa 661 na pasahero ng MRT-3, 292 sa LRT at 104 sa PNR ang nakinabang sa libreng sakay.

Sa MRT-3 at LRT-2, ang libreng sakay ay maaaring i-avail ng mga government workers mula alas-siete hanggang alas-nuebe ng umaga at mula alas singko ng hapon hanggang alas siete mamayang gabi.

Samantala, ang pagsakay sa tren ng PNR ay libre sa buong araw mula first hanggang last trip sa lahat ng operational routes nito.

Nakikipagtulungan ang regional offices ng labor department sa pag-institutionalize ng Public and Employment Service Office (PESO) upang maisakatuparan ang hangarin ni Department of Labor and Employment (DOLE) Secretary Bienvenido Laguesma na maipaabot sa mga mahihirap lalo na sa mga nasa liblib na lugar ang mga programa at serbisyo ng pamahalaan.

Sa Laging Handa Briefing sinabi ni DOLE-Bicol Regional Director Maria Zenaida Campita, dahil dito, magkakaroon na ng permanenteng mangangasiwa sa implementasyon ng mga programa ng kanilang ahensya.

Mas mapaghuhusay din nito ani Campita ang mga tungkuling gagampanan ng mga kinauukulang tanggapan ng gobyerno at ng mga Local Government Unit (LGU) upang maiparating sa mga malalayong lugar ang mga ginagawang pagsisikap ng pamahalaan na matulungan ang mga mahihirap.

Katuwang din aniya nila dito ang ibat-ibang pribadong sektor gaya ng mga school institutions. –  sa ulat ni Jopel Pelenio (Patrol 17)

Nakikita ng OCTA Research Group na ang mobility o ang paggalaw ng mga tao ang posibleng maging dahilan ng inaasahang muling pag-uptick ng COVID-19 cases sa bansa, at hindi ang ipinatupad na boluntaryong pagsusuot ng facemask sa mga open spaces.

Sa Laging Handa Brieding, sinabi ni OCTA Fellow Dr. Guido David na kung pagbabasehan ang Cebu na unang nagpatupad ng voluntary mask wearing, kapansin pansin na hindi na tumataas ang naitatala nilang kaso.

Kaya naman kung magkaroon man aniya ng bahagyang pag uptick ng COVID cases sa ilang lugar, may posibilidad na dulot ito ng mobility ng publiko.

Batid ng lahat ani David na nagbalik na ang face to face classes at marami na rin ang nagbalik trabaho kaya mas marami naring tao ang lumalabas ngayon na syang nakapagpataas ng mobility rate sa buong bansa.

Pero kung masusunod lamang aniya ang lahat ng nakasaad sa executive order na inilabas ni Pang. Ferdinand Marcos Jr. ukol sa voluntary mask wearing, posible aniyang hindi magkakaroon ng labis na pagtaas ang kaso sa bansa. –  sa ulat ni Jopel Pelenio (Patrol 17)

Patuloy na binabantayan ng Manila Economic and Cultural Office (MECO) sa sitwasyon ng mga Pilipino sa Taiwan.

Ito’y matapos ang sunod-sunod na pagyanig kung saan maraming establisyimento ang nasira.

Sa kasalukuyan, wala pang inilalabas ang Department of Foreign Affairs (DFA) na bilang ng mga Pilipino na posibleng naapektuhan ng malakas na lindol sa nasabing bansa.

Samantala, patuloy namang pinag-iingat ang Filipino community doon sa mga posibleng aftershocks.

 Siniguro ng Department of the Interior and Local Government (DILG) at Philippine National Police (PNP) tutuntunin nila ang lahat ng nasa likod ng iligal na operasyon ng Philippine Offshore Gaming Operator (POGO) sa bansa.

Ito ang iginiit ni DILG Secretary Benhur Abalos Jr., matapos ipasara ang Lucky 99 South Outsourcing Inc. Facility sa Pampanga na sangkot sa human trafficking ng mga dayuhang Chinese.

Dagdag pa ni Abalos na may mga pinaghahanap pa ang pulisya para panagutin sa nasabing kaso.

Sa ginawang pagsalakay ng mga otoridad sa kumpanya ay may inabutan pang 40 Chinese nationals sa lugar at 200 iba pa sa isang hotel na karamihan ay pawang hindi dokumentado at walang mga pasaporte.

Tiniyak ng kalihim na isasailalim silang lahat sa documentation ng Bureau of Immigration (BI) para hindi na mabiktima.

Kasabay nito, nakiusap si Abalos sa publiko na makipagtulungan sa PNP upang matuldukan ang ganitong uri ng kriminalidad.

Naglaan ang Department of Budget and Management (DBM) ng isang bilyong pisong pondo para sa susunod na taon bilang tulong sa mga nagtatanim ng mais at mangingisda.

Sinabi ni Budget Secretary Amenah Pangandaman na sa pondong ito 510.45 million pesos ay para sa Department of Agriculture (DA) upang maipagkaloob sa  mga nagtatanim ng mais o corn farmers habang ang 489.6 million pesos ay bahagi ng budget ng Bureau of Fisheries and Aquatic Resources (BFAR) para ibigay naman sa mga mangingisda.

Dagdag pa nito, doble ang budget na ito mula sa 500 milyong pisong budget para sa taong kasalukuyan.

Aniya, layunin nito na maipagpatuloy ang pamamahagi ng fuel discounts sa kwalipikadong magsasaka at mangingisda na nag-ooperate ng agricultural at fishery machineries.

Gayunpaman, ani Pangandaman na hindi pa naisasapinal ang patakaran para sa pagpapatupad nito dahil nakasalalay sa magiging kondisyon ng Dubai Crude Oil Price ang programa kung saan dapat mas mataas sa 80 dollars per barrel ang presyo ng krudo sa tatlong magkakasunod na buwan.

Samantala, tiniyak naman ni Pangandaman na may alokasyon din sila ng 10 bilyong pisong pondo para sa Right Competitive Enhancement Fund para sa susunod na taon.