Walang Pilipinong nasaktan sa pananalasa ng bagyong Nanmadol sa Japan.
Ayon sa Department of Foreign Affairs, bago pa mag-landfall ang bagyo ay lumikas na ang maraming residente sa mga lugar na apektado ng kalamidad.
Inihayag naman ng Philippine Consulate General sa Osaka na ligtas na sa mga evacuation center ang ilang Pinoy na naninirahan sa Kagoshima prefecture.
Patuloy na mino-monitor ng konsulada ang sitwasyon ng Pinoy community sa Southwestern Japan.
Umakyat sa 15.6% ang weekly COVID-19 positivity rate sa National Capital Region.
Kumpara ito sa 13.3% noong September 10 at 14.5% noong September 14.
Ayon kay OCTA research fellow, Dr. Guido David, nag-peak na ang cases noong August 7 pero bumaba sa karamihan ng mga lalawigan, gaya ng Cebu at Davao.
Gayunman, nilinaw ni David na sa ilang lugar lamang sa Metro Manila tumaas ang positivity rate kasabay nang pagsisimula ng face-to-face classes.
Bukod sa NCR, tumaas din ang positivity rate sa mga karatig lalawigan ng Bulacan, Cavite, Rizal at Laguna.
Isa anya marahil sa dahilan nang pagtaas nito ang pagdami ng mga taong lumalabas at pagiging kampante ng publiko.
Ang positivity rate ay bilang ng mga taong nag-positibo sa COVID-19 mula sa kabuuang bilang ng mga indibidwal na sumailalim sa test.
Naghigpit ng border control points ang lokal na pamahalaan ng Legazpi City sa lalawigan ng Albay, upang mapigilan ang pagpasok ng iba’t-ibang klase ng sakit sa mga hayop partikular na ang african swine fever.
Ayon kay Dr. Manny Victorino, ang assistant veterinary officer ng Albay Provincial Veterinary Office, nakalatag na ang anim na animal veterinary quarantine check-point sa ilang lugar sa lalawigan.
Inaasahang mas hihigpitan ng mga otoridad ang mga borders sa darating na linggo.
Isang truck ang tumagilid sa munisipyo ng barangay Bagong Bayan Roxas, Palawan.
Sa imbestigasyon ng mga otoridad, patungo sana sa kasalan ang naturang truck sakay ang ilang mga pasahero nang sumadsad ito sa pababang bahagi ng kalsada dahilan para mawalan ng kontrol ang driver nito.
Wala namang naiulat na lubhang nasaktan sa aksidente habang nagsasagawa na ng operasyon ang mga otoridad sa nabanggit na lugar.
Aabot sa 21 bahay o katumbas ng 46 na pamilya ang nawalan ng tirahan makaraang sumiklab ang isang sunog sa Villalon Drive sa Sitio Lower Panaghiusa, Barangay Capitol Site, Cebu City.
Sa pahayag ng may ari ng bahay na pinagmulan ng sunog na kinilalang si Beltran Gador, nagsimulang sumiklab ang apoy matapos magrambulan ang dalawang pusa sa kanilang kisame dahilan upang mag-spark ang linya ng kuryente.
Nagsasagawa na ng malalimang imbestigasyon ang mga otoridad hinggil sa totoong pinagmulan ng sunog.
Nag-positibo sa covid-19 ang ilang mag-aaral mula sa tatlong section ng Koronadal National Comprehensive High School (KNCHS).
Ayon kay Valentin Dignadice, principal 1 ng nasabing paaralan, patuloy ang regular na klase sa kanilang eskwelahan habang pansamantalang ibinalik sa online modality o distance learning ang mga estudyanteng nagpositibo sa covid-19.
Nilinaw naman ni Dignadice na wala umanong dapat ikabahala ang mga magulang dahil na-contain na ang apektadong silid-aralan at nakapag-sagawa na rin ng disinfection ang city health office.
Umaasa ang Commission on Elections (Comelec) na maisasapinal na ang postponement o pagpapaliban ng barangay at sangguniang kabataan o bsk elections.
Sa pahayag ni Commission on Elections (Comelec) Chairperson George Garcia, ilang linggo na lamang ang natitira pero hindi pa rin nakapaglalabas ng pinal na desisyon ang kongreso hinggil sa naturang isyu.
Ayon kay Garcia, tiwala ang kanilang ahensya na maisasabatas na ang postponement ng bsk polls kasunod ito ng pagkaka-apruba ng kamara sa ikalawang pagbasa ang bersyon ng naturang panukala sa unang lunes ng disyembre ng susunod na taon.
Iginiit naman ni Garcia na dahil wala pang pormal na batas para ipagpaliban ang halalan, posibleng ma-bago pa ang naunang schedule na inilabas ng kanilang ahensya kabilang na ang araw ng filing ng certificate of candidacies.
Sa kabila nito, siniguro ng poll body chief na hindi masasayang ang mga inimprentang mga balota para sa bsk elections.
Arestado sa mga otoridad ang sampung indibidwal na sangkot sa iligal na sabong sa Dupax Del Sur, Nueva Vizcaya.
Kinilala ang mga suspek na sina Junel Poski; Rocky Baguio; Jack Basatan; Deogracias Fernandez; Elno Palnac; Rufino Pindog; Winzel Baniwas; Reggie Ramos; Andy Bumato; at Ronald Durana.
Ayon sa mga otoridad, agad silang nagkasa ng operasyon matapos makatanggap ng report hinggil sa iligal na aktibidad ng mga suspek sa compound ng CCQ Cockpit Arena.
Sa impormasyon ng mga otoridad mabilis na nagsitakbuhan ang mga sangkot sa iligal na aktibidad kung saan, dalawang pang suspek na kinilalang sina Jimmy Pasigon at Ronald Batchiliar ang nakatakas at patuloy pang pinaghahanap.
Nakumpiska sa raid, ang anim na ulo ng live cockfighting roosters, isang improvised cockfighting rink, at bet money na nagkakahalagang P5,845.
Nahaharap sa kasong paglabag sa Presidential Decree 449 para sa inquest proceedings laban sa mga naarestong suspek.
Isa ang patay habang sugatan naman ang isa pa matapos mauwi sa tagaan ang alitan ng mag-ama sa Tanay, Rizal.
Nasawi sa insidente ang ama na kinilalang si Crisanto Competente habang sugatan naman ang kanyang anak na si Salvador.
Sa impormasyong nakuha ng Tanay Municipal Police Station, lasing na nagtungo ang biktima sa tindahan ng kaniyang anak upang bumili pa ng alak pero nagalit umano si Salvador dahilan para magsimula ang tensiyon ng dalawa.
Dito na nagalit ang biktima saka itinakwil ang kaniyang anak dahilan para tagain sa kaliwang dibdib ng suspek ang kaniyang sariling ama na nagresulta ng agaran nitong pagkamatay.
Patuloy namang nagpapagaling sa ospital ang sugatang suspek matapos umanong manlaban ang biktima at nahaharap sa kasong parricide.
Muling dumipensa ang Department of Education (DepEd) hinggil sa P150 million na confidential funds na kinukwestiyon sa kanilang ahensya.
Ayon sa DepEd, pinahintulutan ang kanilang departamento na magkaroon ng confidential funds ang mga civilian offices kung saan, mayroon umano itong batayan alinsunod narin sa joint circular 2015-01 ng Department of Budget and management (DBM).
Matatandaang una nang dumipensa si Vice President at DepEd Secretary Sara Duterte-Carpio, hinggil sa naturang isyu at iginiit na maaari itong gamitin bilang tugon sa karahasan, kabilang na ang sexual abuse, graft, corruption, illegal drugs, insurgency, terrorism, child labor, at iba pa.
Iginiit din ng DepEd, na dapat masolusyonan ang mga problema at masuportahan ang mga proyekto ng ahensya para mabigyang proteksiyon ang kanilang mga tauhan maging ang mga mag-aaral.