NATIONAL NEWS

Inaasahang tatalakayin ni Pangulong Bongbong Marcos sa 77^th United Natons General Assembly o UNGA ang economic recovery, food security, climate change, rule of law at agricultural productivity.

Sa kanyang talumpati bago tumulak pa-Amerika, inihayag ng Pangulo na kanya ring bubuksan ang issue  sa magiging tungkulin ng Pilipinas at ambag nito upang palakasin ang international relations.

Makikipag-pulong din ang Punong Ehekutibo sa Filipino community sa New Jersey performing arts center kung saan nasa 1,200 Pinoy ang inaasahang dadalo.

Bago mag-alas-12 ng hatinggabi, oras sa Pilipinas, nang dumating sa Estados Unidos, si Pangulong Marcos para sa kanyang anim na araw na working visit.

56 pang ruta ng mga Public Utility Vehicles (PUV) ang nakatakda muling buksan ng LTFRB ngayong linggo.

Alinsunod na rin ito sa hiling ng mga commuter at PUV operator.

Kinumpirma ni LTFRB Chairperson, Atty. Cheloy Garafil na inihahanda na ang pagbubukas ng mga nasabing pre-pandemic route.

Noon lamang Agosto, 133 ruta ng mga PUV ang binuksan ng ahensya kasabay ng pagbabalik sa face-to-face classes ng mga estudyante.

Sa kabuuan, nasa 90% na ng PUV routes, na isinara sa kasagsagan ng COVID-19 pandemic noong 2020, ang muling binuksan ng LTFRB.

Sumadsad na sa below critical level ang tubig sa Angat dam sa Bulacan.

Mula sa mahigit 180 meters, bumagsak sa 176.52 meters ang lebel ng tubig sa nasabing dam.

Batay ito sa monitoring ng Provincial Disaster Risk Reduction and Management Office hanggang kahapon.

Ang Angat dam ang pangunahing pinagkukunan ng supply ng tubig ng Metro Manila at irrigation water para sa mga agricultural land sa Bulacan at ilang bahagi ng Pampanga.

Dumating na sa Estados Unidos si Pangulong Ferdinand “Bongbong” Marcos Jr. para sa kanyang anim na araw na working visit.

Alas-11:53 kagabi, oras sa Pilipinas, nang dumating si Pangulong Marcos kasama ang Philippine delegation sa Newark Liberty International Airport sa New Jersey.

Ito ang kanyang kauna-unahang biyahe sa Amerika bilang Pangulo ng Pilipinas.

Sinalubong naman sina PBBM ni Philippine Ambassador to US. Jose Manuel Romualdez at Philippine Permanent Representative to United Nations Antonio Manuel Lagdameo.

Bilang bahagi ng kanyang unang aktibidad, nakipagkita ang Punong Ehekutibo sa Filipino community sa New jersey Performing Arts Center kung saan nasa 1,200 Pinoy ang dumalo.

Nakatakda ring magtalumpati si PBBM sa 77th UN General assembly sa New York, bukas.

Makikipag-usap din si Presidente Marcos sa ilang world leaders at US businessmen bukod pa sa mga dadaluhang economic briefings.

Si PBBM ang ikalawang magsasalita sa afternoon session ng UN High-level general debate.

Si Marcos ang magiging kauna-unahang Southeast asian leader na magsasalita sa general debate at unang Filipino leader na haharap nang personal sa podium simula noong 2014.

40 pang dayuhang nagtatrabaho sa isang ilegal na Philippine Offshore Gaming Operations (POGO) company ang na-rescue sa Pampanga.

Sabado ng hapon nang salakayin ng DILG, PNP, DOJ, NBI katuwang ang Philippine Amusement and Gaming Corporation ang Lucky 99 South outsourcing incorporated sa Angeles City.

Isinagawa ito matapos ang kahalintulad na operasyon ng awtoridad sa isa pang POGO site sa Cainta, Rizal noong Biyernes, kung saan mahigit 80 dayuhang trabahador ang nadiskubre.

Ayon kay interior secretary Benjur Abalos, layunin ng kanilang operasyon na tuldukan ang mga kidnapping at human trafficking incident na may kaugnayan sa POGO.

I-tu-turn-over naman anya ang mga dayuhan sa Bureau of Immigration upang mabatid kung legal ang pananatili at pagtatrabaho ng mga ito sa bansa.

Agad ipinasara ng PAGCOR at DILG ang POGO company matapos matuklasang wala itong lisensya.

Nilinaw naman ng Phivolcs na walang naging banta ng tsunami sa Pilipinas matapos ang malakas na lindol sa Southeastern Taiwan kahit malapit lamang ito sa Batanes, kahapon.

Una nang naglabas ng tsunami alert ang Japan meteorological agency matapos ang magnitude 6.9 na pagyanig, kahapon pero agad ding binawi makalipas ang mahigit isang oras.

Mag-a-alas-3 ng hapon nang yumanig ang malakas na lindol at natunton ang sentro sa Taitung county.

Bago nito, niyanig din ng magnitude 6.4 na lindol ang Taiwan noong Sabado ng gabi.

Isa na ang patay makaraang mabagsakan ng equipment sa isang cement factory sa bayan ng Yuli sa kasagsagan ng malakas na lindol sa Taiwan, kahapon.

Apat katao naman ang na-trap sa isang gumuhong gusali at nasa 600 iba pa ang hindi rin nakabiyahe makaraang gumuho at magbagsakan ang mga bato sa Luishishi Mountain.

Sinuspinde rin ang byahe ng Taiwan railways administration sa Hualien City makaraang madiskaril ang isang tren.

Mag-a-alas-3 ng hapon, oras sa Pilipinas, nang yumanig ang magnitude 6.9 na lindol na natunton ang sentro, sa Taitung county.

Bukod sa Taipei, naramdaman din ang pagyanig sa mga karatig isla ng Okinawa, Japan; Fujian at Guangdong, China.

Samantala, tiniyak ni Manila Economic and Cultural Office chairman Silvestre Bello III na ligtas ang mga Pinoy sa Taiwan.