NATIONAL NEWS

Kinumpirma ng Meralco na pumalya ang loadside facility ng NAIA – terminal 3 na nagresulta sa power outage noong Biyernes ng gabi.

Nilinaw ni Meralco vice president at corporate communications head Joe Zaldarriaga na wala naman sa kanila ang problema dahil maayos na gumagana ang kanilang pasilidad sa airport.

Ayon kay Zaldarriaga, naibalik ang kuryente sa terminal 3 dakong ala-6 ng umaga noong Sabado.

Umalalay anya ang Meralco habang inaayos ng mga airport engineer ang nakitang problema sa kanilang pasilidad.

Samantala, inihayag ni Cebu pacific director for corporate communications Carmina Romero na balik-normal na ang kanilang operasyon matapos ang blackout.

Apat na domestic at international flights ng CebuPac ang kinansela makaraan ang outage at kabilang sa 16 na international at 15 domestic flights na naapektuhan ng power interruption.

Nakapagtala ng pagtaas sa COVID-19 positivity rate ang anim na lugar sa Luzon.

Ayon kay OCTA Research Fellow Guido David, sumirit ang positivity rates ng Metro Manila, Bulacan, Cavite, Laguna, Pangasinan, at Rizal mula September 10 hanggang 17.

Batay pa sa datos, bumulusok ang positivity rates ng iba pang mga probinsya sa Luzon.

Nangunguna sa may pinakamataas na positivity rate ang Tarlac na may 33.2% habang pinakamababa naman ang Zambales na may 4.4% na tanging lugar na ikinukonsiderang nasa ”low” category.

Aarangkada na ngayong araw ang libreng-sakay sa mga tren ng Department of Transportation para sa mga government employee bilang pagdiriwang ng 122nd Philippine Civil Service anniversary, ngayong araw.

Ayon sa DOTR, libre ang sakay simula ala-7 hanggang alas-9 ng umaga at ala-6 ng hapon hanggang ala-7 ng gabi sa LRT-2 at MRT-3.

Buong araw naman ang free ride sa PNR sa lahat ng operational routes nito.

Kailangan lamang ipakita ng mga empleyado ang kanilang ID upang makapag-avail ng libreng-sakay.

Dapat nang i-ban ang Philippine Offshore Gaming Operators (POGO) sa bansa.

Ito ang apela ni House Committee on Appropriations vice chairperson at Iloilo 1^st District Rep. Janette Garin sa senado at sa mga kapwa mambabatas sa harap ng kidnapping incidents na kinasasangkutan ng ilang Chinese POGO workers.

Ayon kay Garin, ang sunud-sunod na insidente ng pagdukot at iba pang ilegal na aktibidad na kinasasangkutan ng mga Chinese ay nagdudulot na ng pangamba sa mga nais mamuhunan sa bansa.

Bagaman malaki anyang revenue ang pinapasok ng POGO sa PAGCOR, hindi naman ito sapat kung patuloy na masisira ang imahe ng Pilipinas.

Iginiit ng kongresista na nagsisilbi ng pugad ng undesirable aliens, illegal drugs, human trafficker, prostitution at iba pang sindikato ng money laundering at iba pang ilegal na aktibidad ang mga POGO.

Taong 2003 nang magsimula ang underground operation ng mga pogo sa Pilipinas pero naging fully operational simula noong 2016 matapos gawing legal sa ilalim ng termino ni dating Pangulong Rodrigo Duterte.

Sumampa na sa record-high na 879,429 deaths ang naitala sa Pilipinas noong nakaraang taon o sa ikalawang taon ng COVID-19 pandemic.

Ito na sa ngayon ang itinuturing na pinamakataas na bilang ng namatay sa bansa sa loob lamang ng isang taon kumpara sa 613 thousand 936 noong 2020 o sa unang taon ng pandemya.

Batay ito sa ulat ng Philippine Statistics Authority hanggang nitong Agosto 13.

Ayon kay Commission on Population and Development (POPCOM) executive secretary at undersecretary Juan Antonio Perez III, lumabas din sa datos ng PSA na 2,700 deaths ang naitala kada araw noong 2021.

Patunay anya ito na matinding hamon ang kinaharap ng health system ng bansa sa nasabing taon kaya kailangan ng karagdagang “resources” sa hinaharap.

Base sa POPCOM report, ang September 2021 ang panahon na nakapagtala ng pinaka-maraming namatay na umabot sa 119,758 o katumbas ng 4,000 deaths kada araw.

Gayunman, nilinaw ni Perez na hindi naman lahat ng sanhi ng kamatayan noong isang taon ay COVID-19 lalo’t 159,770 deaths ang “unrelated” sa pandemya.

Nangungunang mga dahilan ng pagkamatay ay sakit sa puso, stroke, diabetes at hypertension.