NATIONAL NEWS

Papatawan ng parusa ang sinumang nag-uudyok ng karahasan sa social media na maaaring maglagay sa isang Hukom sa panganib.

Ito ang ibinabala ng Supreme Court matapos talakayin ang pahayag ni dating National Task Force to End Local Communist Armed Conflict spokesperson Lorraine Badoy laban kay Judge Marlo Magdoza-Malagar ng Manila Regional Trial Court Branch 19.

Si Malagar ang naglabas ng desisyon na nagbasura sa hirit ng Department of Justice na ideklarang Terrorist Group ang CPP-NPA.

Ayon sa Korte Suprema, parusang Contempt of Court ang haharapin ng sinumang magbabanta laban sa isang Hukom at pamilya nito.

Una nang inakusahan ni Badoy si Judge Malagar na nag aabogado para sa CPP-NPA nang magpasya itong ang rebelyon at political crimes ay hindi maituturing na Acts of Terrorism.

Nagbanta pa si Badoy na kung papatayin niya ang naturang hukom dahil sa kaniyang political belief ay dapat maging maluwag din sa kanya ang Korte gaya ng ginagawa umano sa NDF-CPP-NPA.

Bahagya na namang bumaba ang daily COVID-19 cases sa bansa.

Karagdagang 1,555 daily COVID-19 cases ang naitala ng Department of Health kahapon kumpara sa 2,001 noong Lunes.

Dahil dito, bahagya muling umakyat sa 38,315 ang aktibong kaso.

Sumampa naman sa 3,941,656 ang total caseload kabilang ang 3,840,492 recoveries at 62,849 deaths.

Nangunguna pa rin ang Metro Manila sa may pinaka-maraming kaso sa nakalipas na dalawang linggo na 13,839; CALABARZON, 5,211 at Central Luzon, 2,791.

Samantala, nananatili ang Quezon City sa may pinaka-maraming COVID infections sa Metro Manila na 3,263.

Sinuspinde na rin ngayong araw ang mga klase sa pribado at pampublikong paaralan sa iba pang lugar sa Luzon bunsod ng epektong idinulot ng bagyong Karding.

Kabilang sa mga nagsuspinde ng klase ang:

• Masantol, Pampanga – all levels, public at private (in person at online classes)

• Pasok sa Candaba, Pampanga – all levels, public at private

• San Ildefonso, Bulacan – all levels, public at private

• Hagonoy, Bulacan – all levels, public at private (in person at online classes)

• Calumpit, Bulacan – all levels sa pampublikong paaralan

• Patnanungan, Quezon – all levels, public at private

• at Cabanatuan- all levels, public at private

Inihayag ng Department of Agriculture (DA), na sapat at walang kakulangan sa suplay ng mga gulay sa bansa.

Sa panayam ng DWIZ, sinabi ni Agriculture Undersecretary Kristine Evangelista, na tinitignan pa rin ng kanilang ahensya ang kalagayan at kalidad ng suplay sa bansa partikular na ang mga lugar na tinamaan ng nagdaang bagyong Karding.

Sinabi ni Evangelista, na pinaka-naapektuhan ng pananalasa ng bagyo, ang suplay ng palay.

Dagdag pa ni Evangelista nakatutok ngayon ang kanilang ahensya sa mga lugar na sinalanta ng bagyo kung saan, pinakikilos na ang libreng trucking para madala ng mga magsasaka sa mga pamilihan sa Metro Manila ang kanilang mga produkto.

Nilinaw naman ni Evangelista na kung mayroon mang pagtataas sa presyo ng mga vegetable products sa National Capital Region (NCR), ay hindi dahil sa epekto ng bagyo kundi dahil sa pagbagsak sa palitan ng piso kontra dolyar.

Bibigyang-pagkilala at parangal ng Bulacan Provincial Government (BPG) ang limang rescuer ng Provincial Disaster Risk Reduction and Management Office (PDRRMO) na nasawi habang nagsasagawa ng operasyon sa gitna ng pananalasa ng Typhoon Karding.

Ayon sa Lokal na Pamahalaan ng Bulacan, sisimulan ang paggawad ng parangal sa darating na Biyernes, September 30, 2022, kasabay ng huling lamay sa burol ng mga nasawing biktima.

Nangako naman ang BPG, na magbibigay din sila ng tulong pinansyal sa pamilya ng limang rescuer na biktima ng kalamidad.

Samantala, umaasa naman ang pamunuan ng Bulacan, na mananatiling bayani sa puso ng taumbayan ang limang rescuer na nag-alay ng kanilang buhay para mailigtas ang mga apektadong pamilya sa san Miguel, Bulacan.