NATIONAL NEWS

 Mahigpit na i-mino-monitor ni Pangulong Ferdinand ‘Bongbong’ Marcos Jr. ang patuloy na paghina ng halaga ng piso kontra dolyar.

 Sinabi ito ni Press Secretary Trixie Cruz-Angeles matapos bumagsak sa 58 pesos 50 centavos noong Biyernes ang palitan ng piso kontra isang dolyar.

Ayon kay Cruz-Angeles, patuloy ang pakikipag-ugnayan ng pangulo sa kaniyang economic team lalo’t malaki ang epekto ng exchange rate sa inflation ng bansa.

 Noong nakaraang linggo, pang-apat na beses nang bumagsak ang halaga ng piso dahil sa ipinatupad na polisiya ng Estados Unidos para makontrol ang inflation sa kanilang bansa.

Nakadaong sa port area sa Maynila ang barkong pandigma ng Estados Unidos na USS Tripoli o LHA-7 para sa port visit.

 Wala pang ibang impormasyon kaugnay sa port call ng barko pero matatandaang unang sinabi ng US Navy na nasa gitna ng operasyon ang USS Tripoli Amphibious Ready Group sa South China Sea, para paigtingin ang kooperasyon sa kanilang mga kaalyado at mapanatili ang kapayapaan sa Indo-Pacific region.

 Noong nakaraang linggo, unang nakita sa karagatan ng Pilipinas ang Uss Tripoli at sister ship nito na USS America o LHA-6.

Umapela sa pamahalaan ang Private Hospitals Association of the Philippines (PHAPI) na ibalik na ang mandatoryong pagsusuot ng face mask sa outdoor areas.

 Sa gitna ito ng bahagyang pagtaas ng kaso ng COVID-19 na naitatala sa bansa.

 Ayon kay PHAPI President Jose Rene De Grano, naobserbahan nilang tumaas ang active at daily cases ng COVID-19 sa nakalipas na dalawa hanggang tatlong linggo.

 Pero hindi nila masabi kung dahilan ng pagtaas ang boluntaryo nang pagsusuot ng face mask.

 Sa kabila nito, pinayuhan naman ni De Grano ang publiko na magsuot pa rin ng face mask kahit nasa labas ng bahay lalo’t tumataas ang kaso.

 Matatandaang una rito sinabi ng Department of Health (DOH) na tumaas ng 22% ang naitalang bagong kaso ng COVID-19 mula September 19 hanggang 25 kung ikukumpara noong naunang linggo.

Umabot na sa apat na senador ang nagsulong ngayon ng resolusyong naglalayong kilalanin ang limang rescuers sa San Miguel, Bulacan na nasawi sa gitna ng operasyon sa kasagsagan ng super typhoon Karding.

 Kinabibilangan ang mga ito nina Senator Joel Villanueva, Robin Padilla, Bong Revilla at Lito Lapid.

 Sa Senate Resolution 240 na inihain ni Senator Villanueva, layunin nitong papurihan ang pambihirang kabayanihan ng limang rescuer.

 Kinilala naman ni senator lapid sa inihain nitong resolution 235 ang katapangan, pagiging makatao at pagmamalasakit sa kapwa ng mga nasawing rescuers na sina George Agustin, Troy Justin Agustin, Marby Bartolome, Jersob Resurrection at Narciso Calayag Jr.

 Samantala, sa ilalim ng Resolution no. 234 na inihain ni Senator Padilla ay kinikilala ang kabayanihan ng limang rescuer at nakasaad pa na kapuri-puri at dapat magsilbing inspirasyon ang ipinamalas nilang dedikasyon, tapang at commitment.

 Nakasaad naman sa Senate Resolution no. 233 ni Senator Revilla na dapat parangalan ang kabayanihan ng mga rescuer na nagsakripisyo ng kanilang buhay sa pananalasa ng bagyong Karding. –  mula sa ulat ni Cely Ortega-Bueno (Patrol 19)

Pinarerepaso ng isang senador ang pagpapatupad ng Pantawid Pamilyang Pilipino Program (4Ps) para sa mga mahihirap na Pilipino.

 Sa Senate Resolution 218 na inihain ni Senator Risa Hontiveros, ipinapa-convene nito ang Congressional Oversight Committee sa 4Ps.

 Tinukoy din sa resolusyon ang ulat ni Department of Social Welfare and Development (DSWD) Secretary Erwin Tulfo na may 850,000 na pamilya na tatanggalin sa listahan ng benepisyaryo ng 4Ps at ang sinabi ni DSWD Assistant Secretary Romel Lopez na may 187,000 na natanggal na.

Pero giit ni Hontiveros, may mga panawagan na lawakan pa ang coverage ng 4Ps dahil una, may guma-graduate dito na nananatiling mahirap at pangalawa, delikado na muling maging mahirap.

Kasama naman sa panawagan na pag-aralan at dagdagan ang halaga ng ibinibigay sa beneficiaries ng 4Ps na nasa 1,400 pesos at higit pa kada buwan depende sa bilang ng anak na nag-aaral. – mula sa ulat ni Cely Ortega-Bueno (Patrol 19)