NATIONAL NEWS

Pinarerepaso ng isang senador ang pagpapatupad ng Pantawid Pamilyang Pilipino Program (4Ps) para sa mga mahihirap na Pilipino.

 Sa Senate Resolution 218 na inihain ni Senator Risa Hontiveros, ipinapa-convene nito ang Congressional Oversight Committee sa 4Ps.

 Tinukoy din sa resolusyon ang ulat ni Department of Social Welfare and Development (DSWD) Secretary Erwin Tulfo na may 850,000 na pamilya na tatanggalin sa listahan ng benepisyaryo ng 4Ps at ang sinabi ni DSWD Assistant Secretary Romel Lopez na may 187,000 na natanggal na.

Pero giit ni Hontiveros, may mga panawagan na lawakan pa ang coverage ng 4Ps dahil una, may guma-graduate dito na nananatiling mahirap at pangalawa, delikado na muling maging mahirap.

Kasama naman sa panawagan na pag-aralan at dagdagan ang halaga ng ibinibigay sa beneficiaries ng 4Ps na nasa 1,400 pesos at higit pa kada buwan depende sa bilang ng anak na nag-aaral. – mula sa ulat ni Cely Ortega-Bueno (Patrol 19)

Nilinaw ng National Disaster Risk Reduction and Management Council (NDRRMC) na walang kaugnayan sa pananalasa ng bagyong Karding ang isang napaulat na nasawi sa Bataan.

Dahil dito, sinabi ng NDRRMC na nananatili sa walo ang bilang ng nasawi sa bansa dahil sa pananalasa ng bagyo.

Kabilang sa mga kumpirmadong nasawi dahil sa bagyo ang  limang rescuers sa San Miguel, Bulacan; dalawa sa Zambales; at isa sa Quezon, na patuloy pang bineberipika.

Tatlo katao naman ang napaulat na nawawala dahil sa bagyo na nagmula sa Mercedes, Camarines Norte.

Batay pa sa ulat ng NDRRMC, aabot sa 60,817 indibidwal o 16,476 pamilya ang naapektuhan ng naturang bagyo mula sa 948 barangay sa Ilocos region, Cagayan, Central Luzon, CALABARZON, MIMAROPA, Bicol, at Cordillera Administrative Region (CAR).

Sa nasabing bilang, 46,008 na mga indibidwal o 12,352 pamilya ang nananatili sa 976 evacuation centers habang nasa 5,803 katao o 1,648 pamilya ang nanunuluyan sa ibang lugar.

Sinabi pa ng NDRRMC na nasa 1,625,862 pesos na halaga ng tulong ang naipamahagi sa mga naaapektuhan ng bagyo sa  Cagayan, Central Luzon, Bicol, at Cordillera.

Samantala, aabot naman sa 3 milyong piso ang halaga ng pinsala sa imprastraktura na naitala sa mimaropa habang sumampa naman sa 1.525 million pesos ang halaga ng pinsala sa agrikultura sa Cordillera.

Nasa 39 na libong pamilya ang naapektuhan ng bagyong Karding sa San Miguel, Bulacan.

Sa panayam ng DWIZ, sinabi ni Mayor Roderick Tiongson na nakauwi na sa kani-kanilang lugar ang mga nasa evacuation center.

Nasa dawalampung barangay naman ang lubog pa rin sa baha.

Dagdag pa ng alkalde na nagulat pa rin sila sa lakas ng ulan at pagbaha bagama’t inaasahan na ito.

Samantala, ikinalungkot naman ni tiongson ang pagkasawi ng limang rescuers.

Pinuri ng National Capital Region Police Office (NCRPO) ang extraordinary deeds na ipinakita ng medical team ng Southern Police District (SPD) matapos tulungan sa panganganak ang isang ginang sa Pasay City.

Ayon kay NCRPO Acting Region Director PBGen. Jonnel Estomo, nagsasagawa ng police visibility ang mga police trainees mula sa SPD-Medical and Dental Unit bilang bahagi ng S.A.F.E NCRPO Program nang makita ang ginang sa gilid ng kalsada sa J.W. Diokno Blvd.

Tumigil ang mga pulis at hindi nag-atubiling tumulong sa ale na hindi na umabot sa ospital para manganak.

Matapos mailuwal ang sanggol na lalaki sa bahay ng ginang, agad itong inihatid ng mga pulis sa ospital para sa post-natal care.

“I commend the immediate action of our law enforcers for their commendable action. Ito ang patuloy na tagumpay ng ating programang S.A.F.E NCRPO kung saan ang mga pulis ay nakadeploy sa mga kalsada upang magbigay ng mas mabilis na responde sa mga katulad nito na hindi inaasahang pangyayari. Asahan ninyo na ang mga pulis naninyong makikita sa daan ay inyong maaaasahan malalapitan at matatakbuhan tungo sa isang SAFE NCR,” pahayag ni Estomo.

Patuloy na binabantayan ng Department of Agriculture (DA) ang epekto sa presyo ng agricultural product sa buong bansa.
Ito’y dahil na rin sa pagtaas ng piso laban sa dolyar.

Ayon kay DA Undersecretary Kristine Evangelista na naaapektuhan din ng dollar exchange rate ang mga magsasaka kung saan gumagamit sila ng gasolina at krudo sa pagbyahe ng kanilang mga produkto.

Nabatid na ilang pamilihan sa Metro Manila ang nagtaas ng presyo ng gulay kasunod ng pananalasa ng bagyong Karding.
Pero, nilinaw ng Evangelista na patuloy pa rin nilang minomonitor ang presyo ng mga gulay, isda at bigas.

Samantala, wala aniyang dapat itaas sa presyo dahil ang kasalukuyang ibinibenta sa merkado ay stock na nabili bago pa man dumating ang naturang bagyo.

Nasabat ng pinagsanib na pwersa ng Makati City Police Station Drug Enforcement Unit operatives at Station Intelligence Section ang dalawang hinihinalang drug pushers sa Water Lily St. Brgy. Rizal sa nasabing lungsod.

Kinilala ni Southern Police District (SPD) Acting Director PCol. Kirby John Kraft ang mga suspek na sina Edseleto Montilla at Ralph Banaag.

Nakumpiska sa operasyon ang apat na bloke ng pinatuyong marijuana fruiting tops na tinatayang tumitimbang ng 5 kilograms, P1,000 buy bust money, P31, 000 boodle money, J&T express plastic bag, at brown Anello bag.

“The unyielding effort of our personnel is clearly portrayed through their successful anti-illegal drug operations. The duo will be facing complaints for Violation of Republic Act 9165 or the Comprehensive Dangerous Drugs Act of 2002,” wika ni Kraft.

Itinalaga bilang pinuno ng Commission on Human Rights (CHR) sa ilalim ng 6th Commission en Banc si dating FIO head Beda Epres.

Ayon sa CHR, pitong taong magsisilbi si Epres mula 2022 hanggang 2029, kapalit ni retired Commissioner Roberto Eugenio Cadiz.

Dagdag pa rito, ang matibay na pundasyon at karanasan sa gawaing pagsisiyasat ni Epres ay nagpapakita na karapat-dapat itong maging commissioner nila.

Samantala, kinumpirma ito ng palasyo kung saan ang appointment letter na may petsang September 15, 2022 ay nilagdaan ni Pangulong Ferdinand Marcos Jr. At nai-transmit sa CHR noong September 21, 2022.