NATIONAL NEWS

Nilinaw ng National Disaster Risk Reduction and Management Council (NDRRMC) na walang kaugnayan sa pananalasa ng Bagyong Karding ang isang napaulat na nasawi sa Bataan.

Dahil dito, sinabi ng NDRRMC na nananatili sa walo ang bilang ng nasawi sa bansa dahil sa pananalasa ng bagyo.

Kabilang sa mga kumpirmadong nasawi dahil sa bagyo ang  limang rescuers sa San Miguel, Bulacan; dalawa sa Zambales; at isa sa Quezon, na patuloy pang bineberipika.

Tatlo katao naman ang napaulat na nawawala dahil sa bagyo na nagmula sa Mercedes, Camarines Norte.

Batay pa sa ulat ng NDRRMC, aabot sa 60,817 indibidwal o 16,476 pamilya ang naapektuhan ng naturang bagyo mula sa 948 barangay sa Ilocos Region, Cagayan, Central Luzon, CALABARZON, MIMAROPA, Bicol, at Cordillera Administrative Region.

Sa nasabing bilang, 46,008 na mga indibidwal o 12,352 pamilya ang nananatili sa 976 evacuation centers habang nasa 5,803 katao o 1,648 pamilya ang nanunuluyan sa ibang lugar.

Sinabi pa ng NDRRMC na nasa 1,625,862 pesos na halaga ng tulong ang naipamahagi sa mga naaapektuhan ng bagyo sa  Cagayan, Central Luzon, Bicol, at Cordillera.

Samantala, aabot naman sa 3 milyong piso ang halaga ng pinsala sa imprastraktura na naitala sa MIMAROPA habang sumampa naman sa 1.525 million pesos ang halaga ng pinsala sa agrikultura sa Cordillera. –-sa ulat ni Gilbert Perdez (Patrol 13)

Umabot na sa mahigit P2-M halaga ng tulong ang naipamahagi sa mga lugar na naapektuhan ng bagyong Karding.

Sa nabanggit na bilang, sinabi ni Department of Social Welfare and Development (DSWD) assisant secretary Romel Lopez na P1.7 million dito ay mula mismo sa kagarawan, habang galing naman sa mga lokal na pamahalaan at iba pa ang  P876-K

Ayon pa kay Lopez, may nakalaan silang P1.1 billion na pondo para sa disaster response at assistance sa mga biktima ng nasabing bagyo.

Aniya, kasalukuyang nakatuon ang relief at assistance effort ng DSWD sa Ilocos Region, Cagayan Valley, Central Luzon, CALABARZON, MIMAROPA, Bicol Region, National Capital Region (NCR) at Cordillera Administrative Region (CAR) kung saan nasa 249k family food packs ang naipamahagi sa mga nasabing lugar.

Dagdag pa ni Lopez, nasa P5-K hanggang P10-K cash assistance naman ang ibinibigay ng kagawaran sa mga nasiraan ng bahay dahil sa lakas ng bagyo sa ilalim ng Assistance to Individuals in Crisis Situation (AICS) Program.

Labing-limang araw lamang pwedeng gamitin ang mga pampublikong paaralan bilang “Immediate Evacuation Site”.

Ito ang ipinaalala ng Department of Education (DepEd) sa mga lokal na pamahalaan na hindi para sa pangmatagalang tirahan ng mga apektadong pamilya o indibidwal ng anumang sakuna ang mga paaralan.

Anila, nakasaad din ito sa Department Order No. 37 Series of 2022 ni Vice President at Education Secretary Sara Duterte.

Bingyang-diin naman ng DepEd na hindi na maaaring gamitin ang mga paaralan bilang COVID-19 quarantine at isolation facility.

Ito ay dahil wala nang bisa ang awtoridad na ibinigay sa mga regional director sa ilalim ng Office Memorandum 2020-004 o ang Guidance to Regional Directors for Action Requests by Local Government Units to use DepEd Schools and Engage DepEd Personnel in Activities Related to COVID-19.

Nagpaabot ng pakikidalamhati si Vice President Sara Duterte-Carpio sa mga naapektuhan ng bagyong Karding sa Luzon.

Batay sa pahayag ng Office of the Vice President, taos-pusong nakikiramay ang Pangalawang Pangulo sa mga pamilyang nawalan ng mahal sa buhay sa kasagsagan ng bagyo.

Sa ngayon, nakikipag-ugnayan na si PBBM sa lahat ng ahensiya ng bansa at mga lokal na pamahalaan upang masiguro na mabilis na nakararating ang mga tulong sa mga naapektuhan ng naturang bagyo.

Tiniyak naman ng Pangalawang Pangulo ng bansa na kontrolado ng Marcos administration ang kinakaharap na problema ng bansa.

Minamadali na ng dalawang malalaking telecommunications company upang maibalik ang network signal sa mga lugar na binayo ni Karding.

Sinabi ni Press Secretary Atty. Trixie Cruz-Angeles na nagdodoble-kayod na ang Smart at Globe para maibalik ang network signal ng sa gayon ay may magamit na komunikasyon ang mga apektadong residente.

Sa ngayon ay nagtayo na ang dalawang telcos ng mga istasyon para sa libreng Wi-Fi connection, tawag, text at free charging ng cellphones.

Itinayo ito sa mga lalawigan ng Bataan, Aurora, Quezon Province, Tarlac, Bulacan, Nueva Ecija, Pampanga, Zambales, at iba pang mga lugar na naapektuhan ng bagyo.